«ዮሃንስ ከኣ፡ መምህር፡ ሓደ ብስምካ ኣጋንንቲ ዜውጽእ ርኢናዮ ኔርና፡ ምሳና ስለ ዘይሰዐበ ኸኣ፡ ከነርሕቖ ፈቲናዮ ኢና፡ በሎ።» (ማርቆስ 9:38)
መጀመርታ ርእይቶ፡ ደቀ መዛሙርቲ የሱስ ንኣገልግሎት የሱስ ከምኡ ብጥንቃቐ ምሕላዎም ክቡር ነገር ይመስል። ብስም የሱስ ኣጋንንቲ ዜውጽእ ሰብ ረኸቡ፡ እዚ ሰብ እዚ ኸኣ ካብ ጉጅለኦም ኣይነበረን ወይ ድማ ኣብ ትሕቲ ቁጽጽሮም ኣይነበረን፡ ንሱ ኸኣ ደው ክብል ደለዩ። የሱስ ግና ንግብዝና ደቀ መዛሙርቱ ፈለጠ። ደቀ መዛሙርቲ እውን ኣጋንንቲ ንምውጻእ ስልጣን ተዋሂብዎም ነበረ (ማቴዎስ 10:8)፡ ግናኸ ብኸቢድ ፈሺሎም ነበሩ (ማርቆስ 9:28)።
ኣብ ቅድሚ ህዝቢ ኻብ ሓደ ንእሽቶ ወዲ ኣጋንንቲ ከውጽኡ ምስ ፈሸሉ፡ ንደቀ መዛሙርቲ ክንደይ ዘሕፍር ይኸውን! ግናኸ፡ እዚ ሰብ እዚ ኸምኦም ምስ የሱስ ብቐጻሊ ዘይነበረ ኾይኑ፡ ኣጋንንቲ ብዓወት የውጽእ ነበረ። ብዘይ መንፈሳዊ ሓይሎምን ህይወቶምን ክጭነቑ ነበሮም። ብዛዕባ እምነቶም ብጐይታኦም ብዝተዋህቦም ጽኑዕ ተግሳጽ ክሕረሙ ነበሮም (ማቴዎስ 17:20)። ኣብ ክንዲኡ ግና፡ ኣብ ካልኦት ኣተኩሮም። ኣብ ክንዲ ሓጢኣቶም ዝንስሑን ብመንፈሳዊ ድኻሞም ዝሓዝኑን፡ ደቀ መዛሙርቲ መንፈሳዊ ዓወት ዝረኸበ ሰብ ከዕንቅፉ ፈተኑ።
ሓድሓደ ግዜ፡ ንናይ ካልኦት መንፈሳዊ ዓወታት ምድኻም ካብ ንናይ ገዛእ ርእስና ውድቀታት ብሓቀኛ ምግጣም ዝቐለለ እዩ። ምላሽ የሱስ ንደቀ መዛሙርቱ፡ «ኣይተኽልክልዎ» (ማርቆስ 9:39) ምስ በለ፡ ከም ዝገረሞም ኣይተርፍን። «እቲ ዘየባእሰና ምሳና እዩ» (ቁ. 40) ኢሉ ኣረጋገጸሎም። ነዚ ኣገዳሲ ትምህርቲ እዚ ተማሂርካዶ? ብመንፈሳዊ ዓወታት ካልኦት ብሓቀኛ ኽትሕጐስ ትኽእልዶ? ንጐይታ ብዝተፈላለየ መገዲ ዘገልግሉ ወይ ድማ ካብ ናትካ ዝተፈላለየ ጉጅለ ዝኾኑ ተተባብዖምዶ ኣለኻ?
