በረኸት ስላሴ: ካብ ጸሎት ናብ ኣምልኾን ስግደትን

ናብ ኣምልኾ ምዕራግ

ሰለስቲኦም ኣካላት ስላሴ ኣብ መጽሓፍ ቅዱስ ብዘይ በረኸት ተራኺቦም ኣይፈልጡን ምባሉ ዘጸናንዕ ሓቂ እዩ። ነፍሲ ወከፎም በይኖም ደው ኢሎም ፍርሂ ዘርእዩሉ እዋናት ኣለዉና: ኣቦ ብነጐዳ ሲና ተኸዲኑ (ዘጸ. 19:12,16,18; 20:18; እብ. 12:20)፤ ወዲ ከምቲ ዝፈርስ እምኒ ንሓመድ ዝፍሕኽ (ማቴ. 21:44; ሉቃ. 20:18)፤ መንፈስ ቅዱስ ድማ ነቲ ንዕኡ ዝበደለ ሓጢኣት ከቶ ዘይቕድዖ (ማቴ. 12:31-32; ማር. 3:28-29)።

“ግናኸ ሰለስቲኦም ኣካላት ስላሴ ብዘይ ጸጋ ተራኺቦም ዝተመዝገበ ነገር ኣብ መጽሓፍ ቅዱስ የልቦን። ምሉእነት ኣምላኽ ድማ ብምሉእ ባህርዩን ተግባሩን ንምሕረት እንተዘይኮይኑ ተጠቒሱ ኣይፈልጥን።” ከምዚ ኢሉ እዩ እቲ ዝሓለፈ ጀምስ ቮን: ጽቡቕ ዝተማህረ ኣገልጋሊ ኣምላኽ: ጽሒፉ።

ምሉእ ትምህርቲ ስላሴ ናይ ምስትውዓል ዘይኮነስ ናይ እምነት ጉዳይ እዩ። “ቅዱስ: ቅዱስ: ቅዱስ: እግዚኣብሔር ኣምላኽ ኩሉ ዝኽእል: ዝነበረን ዘሎን ዝመጽእን!” (ራእ. 4:8) ኢሎም ክጭድሩ ከለዉ ንመላእኽቲ ዝመልኦም መንፈስ ሒዝና ናብ ኣምላኽ ክንመጽእ ኣሎና። እዚ ኻብ ጸሎት ናብ ኣምልኾ: ካብ ልማኖ ናብ ስግደት ንኽንዓርግ ኣብነት ክኸውን ይግባእ።

ንዒ ንስገድን ንምብርከኽን፤ ኣብ ቅድሚ እግዚኣብሔር ፈጣሪና ንምብርከኽ። ንሱ ኣምላኽና እዩ እሞ: ንሕና ድማ ህዝቢ መጓሰኡ: ኣባጊዕ ኢዱ ኢና።መዝሙር 95:6-7

ደራሲ ዘይፍለጥ