21 እግዚኣብሄር ኣምላኽ ድማ ንኣዳምን ንሰበይቱን ካብ ቈርበት ክዳን ገበረሎም፤ ከደኖምውን።
29 ንሱ ንብዙሓት ኣሕዋት በዅሮም ምእንቲ ክኸውን፥ ነቶም ኣቐዲሙ ዝሓረዮም፥ ንምስሊ ወዱ ኽመስሉ ኣቐዲሙ መደቦም። 30 ነቶም ኣቐዲሙ ዝመደቦም፥ ንኣኣቶም ከዓ ፀውዖም፤ ነቶም ዝፀውዖም ድማ ኣፅደቖም፤ ነቶም ዘፅደቖምውን ኣኽበሮም።
1 ብፍቓድ እግዚኣብሄር፥ ሃዋርያ ኢየሱስ ክርስቶስ ካብ ዝኾነ ጳውሎስ፥
ናብቶም ኣብ ኤፌሶን ዘለዉ ቅዱሳንን፥ ብኢየሱስ ክርስቶስ ከዓ እሙናትን፥
2 ካብ እግዚኣብሄር ኣቦናን፥ ካብ ጐይታና ኢየሱስ ክርስቶስን፥ ፀጋን ሰላምን ምሳኻትኩም ይኹን።
3 እቲ ብዅሉ መንፈሳዊ በረኸት፥ ብክርስቶስ ገይሩ ኣብ ሰማያት ዝባረኸና፥ ኣቦ ናይ ጐይታና ኢየሱስ ክርስቶስ፥ እግዚኣብሄር ይባረኽ። 4 ኣብ ቅድሚኡ ቕዱሳንን፥ ነውሪ ዘይብልናን ምእንቲ ኽንከውን፥ ቅድሚ ምፍጣር ዓለም፥ ብክርስቶስ ሓረየና። 5 ስለ ዘፍቀረና፥ ብፅቡቕ ፍቓዱ፥ ብኢየሱስ ክርስቶስ ናቱ ውሉድ ክንከውን፥ ኣቐዲሙ መረፀና። 6 እዙይ ከዓ፥ በቲ ዘፍቅሮ ወዱ ገይሩ ዝሃበና ኽቡር ፀጋ፥ ምእንቲ ኽምስገን ኢሉ እዩ። 7 ብእኡ፥ ማለት ብደሙ ድሕነት፥ ከምቲ ሃብቲ ፀጋኡ ድማ፥ ስርየት ሓጢኣት ረኸብና። 8 ንሱ ነዝ ፀጋ እዙይ፥ ብዅሉ ጥበብን ፍልጠትን፥ ኣብ ልዕሌና ኣብዝሖ። 9 ሰናይ ፍቓዱ ኾይኑ ኸዓ፥ ነቲ ብክርስቶስ ገይሩ ኣቐዲሙ ዝወሰኖ፥ ናይ ፍቓዱ ምስጢር ኣፍለጠና። 10 እዙይ ከዓ፥ እቲ ምልኣት ዘመናት ምስ በፅሐ፥ ኵሉ ኣብ ሰማይ ኮነ ኣብ ምድሪ ዘሎ፥ ኣብ ትሕቲ ስልጣን ክርስቶስ፥ ምእንቲ ኽጥቕለል እዩ።
11-12 ንሕና ኣቐዲምና ብክርስቶስ ተስፋ ዝገበርና፥ ንናይ ክብሩ ምስጋና ምእንቲ ኽንከውን፥ እቲ ብፍቓዱ ንዅሉ ነገራት፥ ከም ምኽሩ ዝገብር እግዚኣብሄር፥ ወረስቲ ኽንከውን ብወዱ ሓረየና። 13 ንስኻትኩምውን፥ ነቲ ናይ ምድሓንኩም ቃል ሓቂ ዝኾነ ወንጌል ምስ ሰማዕኹም፥ ብእኡውን ምስ ኣመንኩም፥ በቲ ዘተስፈዎ መንፈስ ቅዱስ ሓቲሙ፥ ናቱ ገበረኩም። 14 ንኽብሩ ምስጋና ክኸውን፥ እግዚኣብሄር ነቶም ናይ ባዕሉ ዝኾኑ ዅሎም ክሳዕ ዘድሕኖም፥ መንፈስ ቅዱስ፥ ነቲ ኽንረኽቦ ዘለና ርስቲ፥ ዕርቡን እዩ።
15 ኣነውን እቲ ኣብ ኢየሱስ ክርስቶስ ዘለኩም እምነትን፥ ንዅሎም ቅዱሳን ዘለኩም ፍቕርን፥ ካብ ዝሰምዕ ጀሚረ፥ 16 ኣብ ፀሎተይ እናዘከርኩኹም፥ ምእንታኻትኩምውን ንእግዚኣብሄር ምምስጋን ኣብኲረ ኣይፈልጥን። 17 ነቲ ኣቦ ኽብሪ፥ ኣምላኽ ጐይታና ኢየሱስ ክርስቶስ፥ ንእኡ ብዝበለፀ ምእንቲ ኽትፈልጥዎ፥ መንፈስ ጥበብን መንፈስ ምግላፅን፥ ምእንቲ ኽህበኩም፥ 18 ኣዒንቲ ልብኹም በሪሁ፥ ናይቲ ዝፀውዐኩም ተስፋ፥ እንታይ ከም ዝኾነ ምእንቲ ኽትፈልጡ፥ እቲ ንቕዱሳን ዘተስፈዎም ክቡር ርስቲ፥ ክንደየናይ ብዙሕ ከም ዝኾነ ምእንቲ ኽተስተውዕሉ፥ እፅሊ ኣለኹ። 19 ኣባና ኣብ እንኣምን ከዓ፥ እቲ ኽግመት ዘይከኣል ዕቤት ሓይሉ፥ እንታይ ከም ዝኾነ ምእንቲ ኽትፈልጡ እፅሊ ኣለኹ። እዝ ኣባና ዝሰርሕ ዘሎ ሓይሉ ኸዓ፥ 20 እቲ ንክርስቶስ ካብ ሞት ዘተስአሉን፥ ኣብ ሰማያት ኣብ የማኑ ዘቐመጠሉን ሓይሉ እዩ። 21 ኣብዛ ዓለም እዚኣ ጥራሕ ዘይኮነስ፥ ኣብታ እትመፅእ ዓለምውን፥ ኣብ ልዕሊ ግዝኣትን ስልጣንን ሓይልን ምልክን ሸይሙ፥ ኣብ ልዕሊ ዅሉ ዝፅዋዕ ስም ሃቦ። 22 ንዅሉ ኸዓ፥ ኣብ ትሕቲ ኣእጋሩ ኣግዝኦ። ርእሲ ቤተ ክርስቲያን ገይሩውን፥ ኣብ ልዕሊ ዅሉ ሸሞ። 23 ንሳ ኣካሉ እያ፤ ንኣኣን ንዅሉን ዝመልእ፥ ናቱ ምልኣቱ እያ።
ዘፍጥረት 3:21 · ሮሜ 8:29–30 · ኤፌሶን 1 · ትመ15
እቲ ኣብ ጥቕስና ዘሎ ቀዳማይ ኣገላልጻ፣ ቅድመ-ምድላው፣ ኣብ ዘለኣለማዊ ዝሓለፈ ግዜ ተፈጺሙ፣ ከምኡ ድማ እቲ ናይ መወዳእታ ኣገላልጻ፣ ክብሪ፣ ናብ ዝመጽእ ዘለኣለማዊ ግዜ ይወስደና። ኣብ መንጎ እዚ ኸኣ ኣምላኽ ሎሚ ምስ ህዝቡ ዘሎዎ ምትሕግጋዝ ኣሎና።
እቲ ቓል ቅድመ-ምድላው ንበረኸት ምምልካት ማለት እዩ። ኣብ ምርጫ ኣምላኽ ንሰባት ንበረኸት ይመርጽ። ኣብ ቅድመ-ምድላው፣ ንምሩጻቱ ኺወሃብ ዝግብኦ በረኸት ይመርጽ። እዚ ኽልቲኡ ናይ ስውር ምኽሩ እዩ፣ ግናኸ ንበረኸት ከምቲ ኣብ ኤፌሶን 1 ተገሊጹ ዘሎ ገሊጽልና እዩ። ኣብዚ ኣብ ሮሜ 8፣ እቶም ንበረኸት እተመደቡ፣ ኣምላኽ ከም ዝጸውዖም ተነጊርና ኣሎና። እዚ ኸኣ ብጸዋዕታኡ ንኣዳም፣ «ኣበይ ኣሎኻ?» ብምባል ይግለጽ። ሎሚ ብኸመይ ይጽውዕ? ብወንጌል እዩ። ኣብዚ ምንባብ፣ እቲ ጸዋዕታ ፍሩይ እዩ፣ ብኻልእ ኣዘራርባ ኣብዚ ጥቕሲ እዚ ዝተጸውዑ ዘይመልሱ የለዉን። እቶም ዝተጸውዑ ድሕሪኡ ይጸድቁ። ዘደንቕ በረኸት! ሓጢኣትና ጥራይ ዘይኰነስ ዝጸረየ፣ ኣምላኽ ባዕሉ ንዝጸውዖም (ምእመናን) ጻድቃን እዩ ይብሎም! ንሱ ከምቲ ዝተመልሰ ወዲ ጠፋኢ፣ ድሕሪ ሕጂ ብርኹስ ክዳን ዘይኰነስ፣ ብዝበለጸ ክዳን ናይ ባዕሉ ምድላው ተኸዲንና ይርእየና። መለኮታዊ ጽድቂ፣ ጽድቂ ኣምላኽ፣ ኣሎና፣ እዚ ኸኣ ንጸዋዕታኡ ምስ መልስና ይወሃበና። እዚ ኸኣ ብቘርበት፣ እግዚኣብሔር ባዕሉ ንኣዳምን ሄዋንን ኣብ ገነት ድሕሪ ምውዳቖም ዝኸደኖም፣ ይግለጽ። ካልእ ኣብ ክንኦም ኪመውት ነይርዎ። ኣብቲ ስእሊ እንስሳ ነይሩ፤ ንኣና ግና ወዲ ኣምላኽ ባዕሉ ነይሩ። ዘደንቕ ጸጋ!
ድሕሪኡ ድማ እቶም ዝጸደቑ ንሱ ከም ዘኽበሮም ተነጊርና ኣሎና። ኵሉ ግዜ ብዙሕ ክብሪ ከም ዝረኸብና ኣይስምዓናን ይኸውን! ግናኸ ኣብ ሓሳብ ኣምላኽ፣ እዚ ድሮ ተፈጺሙ እዩ። ንጐይታ ቀልጢፉ ንምምጻእ ንጽበ፣ ሽዑ ስጋና ኺልወጥን ኪኸብርን እዩ።
