እቲ ዝበጽሓና ጽውዓ ብምሉኡ ጸጋ እዩ። ከምቲ ሃዋርያ ጳውሎስ ኣብ ሮሜ 4:4–5 ዝነግረና፡ «እቲ ዚዓዪ ግና ዓስቡ ኸም ጸጋ ዘይኰነስ፡ ከም ዕዳ እዩ ዚቝጸረሉ፡ እቲ ዘይዓዪ ግና ነቲ ንሓጥኣን ዜጽድቕ ዚኣምን፡ እምነቱ ጽድቂ ዀይና ትቝጸረሉ።» ብኻልእ ኣበሃህላ፡ ምድሓን ወይ ካልእ ዝኾነ ነገር ብሰንኪ ግብርታትናን ጻዕርታትናን እንተተረኺቡ፡ እዚ ጸጋ ኣይኮነን። እዚ ንግብርታትና ዓስቢ ምቕባል ጥራይ እዩ። እንተኾነ ግን ነቲ ንሓጥኣን ዜጽድቕ ኣምላኽ ጥራይ እንተኣሚንና፡ እዚ ንግብርታትና ዓስቢ ምቕባል ኣይኮነን፡ የግዳስ ብምሉኡ ጸጋ እዩ። «በቲ ብእምነት ዝረኸብኩምዎ ጸጋ ኢኹም ዝድሓንኩም፡ እዚ ኸኣ ካባኻትኩም ኣይኰነን፡ ህያብ ኣምላኽ እዩ እሞ፡ ሓደ እኳ ኸይተመክሕሲ፡ ብግብሪ ኣይኰነን» (ኤፌ. 2:8–9) ።
ስለዚ እንደገና ምድሓን ውጽኢት ናይ ግብርታትና ከም ዘይኮነ፡ ከምኡ’ውን ክንድሕን ስለ ዝግብኣና ዘይኮነስ፡ ብጽውዓ ጸጋ ኣምላኽ ምዃኑ ንርኢ። ኣብ ጥቕስና፡ እዚ ኣብ ጉዳይ ሃዋርያ ጳውሎስ ሓቂ ምንባሩ ንረክብ። ጐይታ የሱስ ኣብ መገዲ ደማስቆ ብቐጥታ ረኺብዎ። ገሊኣቶም ካባና ኣብ ክርስትያናዊ ስድራቤት ንምዕባይ ዓብዪ ፍሉይ መሰል ረኺቦም ይኾኑ፡ ካብ ንእስነቶም ድማ ናብ ምድሓን ተጸዊዖም ይኾኑ። ካልኦት ድማ ቅድሚ ምጽውዖም ህይወት ብዕልግናን ንኣምላኽ ብምቅዋምን ሓሊፎም ይኾኑ። ምናልባት ተመክሮና ኣብ መንጎ እዞም ክልተ ጉዳያት እዚኦም ይኸውን። ነፍሲ ወከፍ በረድ ፍሉይ ዝገብር ፈጣሪ ኣምላኽ፡ ንሓጥኣን ናብ ምድሓን ብኸመይ ከም ዝጽውዕ ድማ ፍሉይ እዩ። እቲ ጽውዓ ብዝኾነ መገዲ ይምጻእ፡ ኣብ ነፍሲ ወከፍ ጉዳይ ብምሉኡ ጸጋ እዩ።
