ኵሉ ሰብ ሰላም ኪህልዎ ይፈቱ፡ ግናኸ መጽሓፍ ቅዱስ ሰላም ይስራሕ እዩ ይብል። ብቐሊሉ ኣይፍጠርን። ሓጢኣት ካብ ዝኣተወሉ ግዜ ጀሚሩ፡ ኣንፈት ተፈጥሮን ዝምድናታትን ናብ ባእስን ምፍልላይን እዩ ዚኸይድ፡ ዘይኮነስ ናብ ሰላም። እቲ ዝዓበየ መርትዖ ኸኣ ክርስቶስ “ብደም መስቀሉ” ሰላም ኪገብር ከም ዘለዎ እዩ፡ ቅድሚ ምስ ኣምላኽ ዝምድና ኺህልወና ምኽኣሉ (ቈሎ. 1:20)። ሞቱ እውን መሰረት ሰላም ኣብ መንጎ ክርስትያናት እዩ። ከምቲ ኤፌሶን 2:14 ዚምህሮ፡ እቲ ኣብ መንጎ ኣይሁድን ኣህዛብን ዝነበረ ምፍልላይ እውን ተሰይሩ እዩ፡ “ንሱ ባዕሉ ሰላምና እዩ እሞ፡ ንኽልቲኦም ሓደ ዝገበረ” — ብተመሳሳሊ መሰረት ድማ፡ ኣብ መንጎ ምእመናን ዘሎ ኵሉ ተፈጥሮኣዊ ምፍልላይ ተሳዒሩ እዩ።
ግናኸ ጐይታ የሱስ ሰላም ኪገብር ናብ ዓለም፡ ናብ ግጭት ዝመልኣ ቦታ ኺኣቱ ነይርዎ። እዚ ግሩም ሓቂ እዩ፡ ግናኸ እዚ ኸኣ ሎሚ ኣብ መንጎ ምእመናን ሰላም ዚገብሩ ሰባት እውን ናብ ከባቢ ግጭት ኪኣትዉ ከም ዘለዎም የርኢ። እዚ ቐሊል ኣይኮነን። ሰላም እንተ ዘይብሉ፡ ኩነታት ብውጥረት፡ ብጥርጣረ፡ ብኽሲ፡ ብቝጥዓ፡ ብክርክር፡ ብነቐፌታ፡ ብዘይምእማን፡ ብስምዕታን ብዘይምርዋሕን ኪምልከት እዩ። ካባና መን እዩ ብፍቓዱ ብኸምዚ ዝበለ ነገራት ኪኸበብ ዚመርጽ፧ ግናኸ ገሊኦም ነቲ ዕዮ ኺወስዱ ኣለዎም፡ ወይ ፍረ ጽድቂ ፈጺሙ ኣይኪዕምብብን እዩ። እቶም ካብ ብጾት ክርስትያናት ጽድቂ ጥራይ ዚሓትቱ ፈጺሞም ኣይኪርእይዎን እዮም። ፍረ ጽድቂ ዚበቍል ኣብ ሰላም ምስ ተዘርአ ጥራይ እዩ።
ምሳሌ 15:18 ገሊኦም ናብ ህዱእ ክፍሊ ኺኣትዉ እሞ ሽግር ኪፈጥሩ ከም ዚኽእሉ ይብል፡ “ሓደ ቘጣዒ ሰብ ባእሲ የለዓዕል።” ግናኸ ካልኦት፡ እታ ፍቕዲ እቲኣ ትብል፡ ናብ ባእሲ ኺመጹ እሞ ሰላም ኬምጽኡ ይኽእሉ እዮም። ኣምላኽ ገና ኣብ ገለ ዝተወሰነ ግጭት ሰላም ንምግባር ኣይዓጠቐናን እንተ ዀይኑ፡ ቢያንስ ሽግር ዚፈጥሩ ሰባት ኣይንኹን! ኣምላኽ ከኣ ንብዙሓት ካብቶም ከም ክርስቶስ ንርእሶም ዜወፍዩ፡ ንመስዋእታዊ ስራሕ ሰላም ምግባር ጥበብ ይሃቦም።
