ናይ መወዳእታ መልእኽቲ!
ነዘን ክልተ ቓላት እዚኤን ክንደይ ከም እንጸልአን – ብፍላይ ዕዳና ንምኽፋል እንተ ደኣ ተጸጊምና። ይኹን እምበር፡ እዘን ክልተ ቓላት እዚኤን ኣይጠፍኣን እየን፡ ግናኸ ምስ ኣበዳሪና እንተ ዘይተሰማሚዕና፡ ናብ ተግባር ኪቕየራ እየን።
ዕዳ ምግባር ክንደይ ቀሊል እዩ። ሰዓታት ከም ደቒቕ ይስምዓና፡ እናወጻእና፡ እናወጻእና፡ እናወጻእና። ዝያዳ ዝኸበረ ሞዴል ክንመርጽ ወይ ዝያዳ ነገራት ክንእዝዝ ከሎና፡ ሰባት ብፍሽኽታ ይኸብቡና።
ግናኸ ክንከፍል ምስ ዘይንኽእል፡ እቲ ኩነታት ይቕየር። ሕሳባትና ንምፍታሕ ምስ እንደናጕይ፡ እቶም ብፍሽኽታ ዝሸጡ ብቕጽበት ባህርያቶም ይቕይሩ። ጸሓይ ምብራቕ ተቋርጽ፡ ደበናታት ነጎዳ ድማ ንሰማይ የጸልምዎ። እቲ ድግስ ወዲኡ፡ እቲ ስነስርዓት ቀብሪ ድማ ጀሚሩ። ክንዕድግ ከሎና ኵሉ ሰብ ፈታዊና እዩ። ግናኸ ናብ ምኽፋል ምስ ዝመጽእ፡ ኣብ ዓለም ሓደ እኳ ፈታዊ የብልናን። እንተ ዘይኰነስ፡ ገለ ዝርሕርሕ ደጋፊ ንምሕጋዝና እንተ መጺኡ፡ ንዕኡ ድማ ዝያዳ ዕዳ ኽንህልወና ንኽእል ኢና። ብሓቂ፡ እቲ ካልኣይ ኣበዳሪ ኻብቲ ቐዳማይ ዝኸፍአ ኪኸውን ይኽእል እዩ።
ዕዳ ዘለዎም ንኣምላኽ
ንኣቶም ብግዜኦም ዝኸፍሉ ዝመስሎም ሰባት፡ ኵሉ ሓላፍነት ዝስምዖ ሰብ ንኣምላኽ ዕዳ ከም ዘለዎ ኪንገር ኣለዎ። ጐይታ የሱስ በደላትና ምስ ገንዘብ ወይ ንጐይታ ዝውሃብ ንብረት ኣነጻጺርዎ። ስለዚ ድማ ንደቀ መዛሙርቱ ኣምላኽ «ዕዳኦም» ወይ «በደላቶም» ምእንቲ ኺሓድገሎም ኪጽልዩ መሃሮም (ማቴዎስ 6:12, 14)።
ብንጹር፡ ንዝዓበየ ዕዳ ዝዓበየ ሳዕቤናት ክንርኢ ንኽእል ኢና። እቶም ሚልዮናት ዕዳ ዘለዎም ካብቶም ሽሓት ወይ ሚእቲ ዝውሕድ ዕዳ ዘለዎም ዝኸፍአ ምላሽ ኪጽበዩ ይኽእሉ እዮም። ግናኸ ሓደ እኳ ኣምላኽ በደላቶም ብፍሽኽታ ኺሓልፎም ኣይጽበን እዩ።
ዕዳ ምግባር ክንደይ ቀሊል ምዃኑ ንርኢ፡ ምስ ኣምላኽ እውን እንተዀነ። ኣብ መዓልቲ ዓሰርተ ግዜ እንተ በዲልና፡ ኣብ ዓመት 3,650 ግዜ ንበድል። ኣብ ሓምሳ ዓመት ሓጢኣት፡ 182,500 «ባንክ ሰማይ» ዶላር ዝኸውን ሕሳብ ኣዋጺእና። ማለት፡ ብመንፈሳዊ መገዲ ምፍላስና እዩ። ምኽንያቱ ንኣምላኽ ክንከፍል ዝኽእል ኣገባብ የብልናን፡ ንሱ ድማ ነቲ ዘይተሓደገ ሓጢኣት «ክቡር» ተግባራት ከም ዘይጠቅም ገንዘብ ይርእዮ።
እቶም ጽቡቕ ባህርይ ዘለዎም ሓጥኣን እውን እንተዀኑ፡ ሚልዮናት ዕዳ ኣለዎም። ገለ ጉድኣት ከም ዘይገበርካ እንተ ደኣ ሓሲብካ፡ እቲ ድምር ናይ «ንኣሽቱ» ሓጢኣትካ ዓብዪ መጠን ከም ዝኸውን ዘክር።
ናይ ኣምላኽ እንኮ ናይ መወዳእታ መልእኽቲ
እቲ እንኮ መገዲ ንዕዳና ንምስራዝ፡ የሱስ ክርስቶስ ንዓኻ ኻብ ኵሉ በደላትካ፡ ዓብይን ንእሽቶን፡ ንምፍታሕ ኣብ መስቀል ከም ዝሞተ ምእማን እዩ። በደልካ ንምእማንን ንኣምላኽ ምእንቲ ኺሓድገካ ንምልማንን ድሉው እንተ ዄንካ፡ ንሱ ኺርሕርሓልካን ኵሉ ብነጻ ኺሓድገልካን እዩ። ስለምንታይ? ምኽንያቱ
ኣምላኽ ንዓለም ክሳዕ ክንድዚ ስለ ዝፈተዋ፡ ንሓደ ወዱ በጃ ሃበ፡ ብእኡ ዝኣምን ኵሉ ምእንቲ ኸይጠፍእ፡ የግዳስ ናይ ዘለኣለም ህይወት ምእንቲ ኺረክብ (ዮሃንስ 3:16 NKJV)።
እንተ ዘይኰነስ፡ ኣይትታለሉ – ኣምላኽ ኵሉ ዕዳኡ ኺሓትት እዩ፡ እቶም ንምሕረት ኣዝዩ ዘርሕቑ ናብዛ ምድሪ እዚኣ ዝሞቱ ድማ ኵሉ ገንዘብ ብወለድ ኣብ «ባህሪ ሓዊን ዲንን … ለይትን መዓልትን ንዘለኣለም ኪሳቐዩ እዮም» (ራእይ 20:10) ኪኸፍሉ እዮም።
ሕሳባት ምምጣጠን
ንዕዳ ዘለዎም ሰባት ኻብ ጾሮም ንምውጋድ፡ ኣምላኽ ካብቲ ሓጢኣት ዘይብሉ ወዱ ክፍሊት ወሲዱ፡ ንሱ ድማ ኣብ ክንዳና ተቐጺዑ፡ «ገና ሓጥኣን ከሎና ክርስቶስ ምእንታና ሞተ» (ሮሜ 5:8)።
ብዚ መገዲ እዚ ኣምላኽ እቲ ዝውሃቦ ዘለዎ ብምሉኡ ተኸፊሉ፡ ምኽንያቱ እቲ ዕዳ ብኻልእ፡ ብየሱስ ክርስቶስ፡ ተኸፊሉ፡ ንሱ ድማ ምንም ዕዳ ዘይነበሮ፡ ግናኸ ኣብ ክንዲ እቲ ዕዳ ዘለዎ ሰብ ዝተሰቐለ። «ሕሳባት ንምምጣጠን» ኣምላኽ ንወዱ ድሕሪ ሰለስተ መዓልቲ ኻብ ምዉታት ኣተንስኦ፡ ኵሎም ዝንስሑን ዝኣምኑን ሓጢኣቶም ምእንቲ ኺሕደገሎምን ሓድሽ ህይወት (ሮሜ 6:4-8) ብቐዋሚ ንጹህ ሕሳብ ምእንቲ ኺጅምሩ!
ብየሱስ ክርስቶስ ገይርካ ምሕረት ሓጢኣት ትደሊ ዲኻ? ዝያዳ ኽንነግረካ ንኽእል ኢና።
