«ሕጂ ኸኣ፡ ንዓይ ስለ ዝነዓቕካኒ፡ ንሰበይቲ ኦርያ ሂታዊት ድማ ሰበይትኻ ስለ ዝገበርካያ፡ ሰይፊ ኻብ ቤትካ ኣይርሕቕን እዩ።» (2 ሳሙኤል 12:10) ኣምላኽ ንሓጢኣት ንምሕራይ እንታይ የድሊ? ንስሓ። ግን ንስሓ እውን ንሳዕቤናት ሓጢኣት ምውጋድ ኣየረጋግጽን እዩ። ሳዕቤናት ብዙሕ ግዜ ከም መዘኻኸሪ ናይቲ ዘሰክፍ፡ ኣጥፋኢ ባህሪ ሓጢኣት ይተርፉ።
ዳዊት ንኸቢድ ሓጢኣታቱ፡ ማለት ስስዔ፡ ምንዝርና፡ ስርቂ፡ ቅትለት፡ ተሓሪዩ። ኣምላኽ ፍጹም ይቕረ በለሉ እሞ ሓጢኣቱ ካብኡ ብምሉኡ ኣርሓቖ (መዝሙር 103:12)። ኣምላኽ ግን፡ ዳዊት ብሰንኪ በደላቱ ዝቕበሎ ስቓይ ኣየወገደን። ብምንዝርና ዳዊት ዝተወልደ ቘልዓ ሞተ (2 ሳሙኤል 12:14)። ወዲ ዳዊት ኣምኖን ንጓል ዳዊት ታማር ደፈራ (2 ሳሙኤል 13:14)። ወዲ ዳዊት ኣቤሴሎም ንኣምኖን ቀተሎ (2 ሳሙኤል 13:28-29)። ኣቤሴሎም ንመንግስቲ ናብ ዕልወት ኣእተዋ (2 ሳሙኤል 15)። ንዝተረፈ ግዜ ግዝኣት ዳዊት፡ ዓመጽ ቤቱን መንግስቱን መሊኡዎ ነበረ። ዳዊት ከም ዝተሓርየ እኳ እንተ ፈለጠ፡ ንዝተረፈ ህይወቱ ግን ነቲ ሓጢኣቱ ዘምጽኦ ስቓያዊ ሳዕቤናት ጸረ።
ኣብ ሓጢኣትካ ምስ ተነስሓካ፡ ኣምላኽ ኩሉ ሳዕቤናት ብኡብኡ የወግድ እዩ ኢልካ ምሕሳብ ትዕቢት እዩ። ንስሓ ምስ ኣርኣኻ፡ ኣምላኽ ኩሉ ከም ዝነበረሉ ብኡብኡ ክመልሶ እዩ ኢልካ ኣይትሕሰብ። ከይገብሮ ይኽእል እዩ። ገለ ሓጢኣታት፡ ከም ምንዝርና፡ ካብ ጉድለት ባህሪ ዝመጹ እዮም። ኣምላኽ ብኡብኡ ንሓጢኣት ይቕረ ይብል፡ ግን ባህሪ ንምህናጽ ብዙሕ ግዜ ይወስድ። ኣምላኽ ናብ ህይወትካ እንታይ ከምጽእ ዝውስን ባህሪ እዩ እምበር ምሕረት ኣይኮነን።
ምስናፍና ዘምጽኦ ዘስካሕክሕ ሳዕቤናት ስለ እንፈልጥ፡ ንኹሉ ሓጢኣት ብትግሃት ንወግዶ እሞ «ነቲ ኣብ ቅድሜና ዘሎ ጕያ ብትዕግስቲ ንጕየዮ» (እብራውያን 12:1ለ)።
