ሽዑ ጸሓፍትን ፈሪሳውያንን ሓንቲ ብምንዝርና እተታሕዘት ሰበይቲ ናብኡ ኣምጽኡ። ኣብ ማእከል ምስ ኣቕመጥዋ ኸኣ: «መምህር: እዛ ሰበይቲ እዚኣ ብምንዝርና: ብግብሪ ኸላ: ተታሒዛ። ሕጂ ሙሴ ኣብ ሕጊ: ከምዚኣቶም ኪውገሩ ኣዘዘና። ንስኻ ግን እንታይ ትብል?» >ዮሃንስ 8:3–5
እዚ ምስ ሓንቲ ብምንዝርና እተታሕዘት ሰበይቲ ዘጋጠመ ምርኻብ ኣብ ፈለማ ዓሰርተ ሓደ ጥቕስታት ዮሃንስ 8 ይርከብ። እዚ ምዕራፍ እዚ ብብዙሕ ምምስሳልን ግርጭታትን ይጅምር: ጸጋን ሕግን (ጥቕስታት 1–11)፡ ብርሃንን ጸልማትን (ጥቕስታት 12–20)፡ ህይወትን ሞትን (ጥቕስታት 21–30)፡ ሓርነትን ባርነትን (ጥቕስታት 31–47)፡ ክብሪን ዘይምኽባርን (ጥቕስታት 48–59)። ግን ብዛዕባ እዛ ሰበይቲ ምስ ጐይታ የሱስ ቀጥታዊን ህይወት ዚቕይርን ምርኻብ ብምግባር ይጅምር።
ብኣንጻሩ እታ ብሕማም ደም እተሰቀየት ሰበይቲ—ኣብ ማቴዎስ 9: ማርቆስ 5: ከምኡ’ውን ሉቃስ 8 እትርከብ—ብፍቓዳን ብተስፋን ናብ ጐይታ የሱስ ዝመጸት: እዛ ሰበይቲ እዚኣ ብምርጫኣ ኣይመጸትን። ተገዲዳ መጸት: ብምንዝርና ብግብሪ ድሕሪ ምትሓዛ ናብ ኣደባባይ ቤተ መቕደስ ተጎቲታ። እቲ ዅሉ ትርኢት ከም ዝተሰርሐ ይመስል: ምኽንያቱ እቲ ፈለማ ኪሕተት ዘለዎ ሕቶ: እቲ ሰብኣይ ኣበይ ኣሎ?
እቲ ሕጊ ብንጹር ከምዚ ይብል ነበረ: ክልቲኦም ኣብ ምንዝርና እተታሕዙ ተሳተፍቲ ተሓተቲ ኪኾኑ ነበሮም (ዘሌዋውያን 20:10፣ ዘዳግም 22:22)። እሞ ስለምንታይ እታ ሰበይቲ ጥራይ ተቕረበት? እቲ ጽሑፍ መልሲ ይህብ:
>«እዚ ኸኣ ኪፍትንዎ: ዚኸስስዎ ነገር ምእንቲ ኺረኽቡ: በሉ» (ጥቕሲ 6)።
እዛ ሰበይቲ እዚኣ ንጐይታ የሱስ ንምጥዋር ኣብ ዝገብርዎ ፈተና ከም መሳርሒ ትጥቀመሉ ነበረት። ጐይታ ግን ንዅሎም ሰባት ይፈልጥ ነበረ: ኣብ ልቦም ዘሎ ኸኣ ይፈልጥ ነበረ (ዮሃንስ 2:24–25)። ንልቢ ከሰስቲኣን ንልቢ እታ ኣብ ቅድሚኡ ደው ኢላ ዝነበረት ሰበይትን ይፈልጥ ነበረ።
ብቕጽበት ኣብኣ ፍርዲ ከም ዘይሓለፈ: ን ፈረድቲ ፈረደ እሞ: ከምዚ በለ:
>«ካባኻትኩም ሓጢኣት ዘይብሉ: ንሱ ቕድም እምኒ ይደርብያ።»
ብመሰረት ሕጊ: እቶም ከሰስቲ ነተን ፈለማ እምኒ ኺደርብዩ ነበሮም (ዘዳግም 17:7)። ብናይ ገዛእ ርእሶም ሕልና ተወቒሶም: ካብቶም ዓበይቲ ጀሚሮም ክሳብ እቶም ንኣሽቱ ኺወጹ ጀመሩ (ጥቕሲ 9)።
እታ ሰበይቲ ምስ ጐይታ የሱስ በይና ተረፈት። ንሱ: እቲ ሓጢኣት ዘይብሉ: ኣብኡ ዝነበረ ንእኣ ኺዅንን መሰል ዝነበሮ በይናዊ ሰብ ነበረ። ምናልባት ካብ ቅዱስ ከናፍሩ ፍርዲ ኺወርድ ትጽበ ነበረት። ግን ብኣንጻሩ: ነዚ ጸጋ ዝመልኦ ቓላት ሰምዐት:
«ኣነ እውን ኣይዅንንክን እየ: ኪዲ እሞ ደጊም ኣይትበድሊ።»
ቅዱስ ህላዌኡ ኣብታ መዓልቲ እቲኣ ንዅሉ ልቢ ኣቃልዐ: ንሱ ኸኣ ብቐጻሊ ከምዚ ይእውጅ:
>«ኣነ ብርሃን ዓለም እየ። ዚስዕበኒ ኣብ ጸልማት ኣይከይድን: ብርሃን ህይወት ግን ኪህልዎ እዩ።»
መርከብ ንሎሚ:
ኦ! ጐይታ የሱስ ከመይ ዝበለ መድሓኒ እዩ: ስሙ ብቕዱሳኑ ኺምስገን ይግባእ! ብደሙ ኻብ ሲኦል ኣድሒንዎም: ንዘለኣለም ኣድሒንዎም ናብ ኣምላኽ ኣምጺእዎም።
ሕጂ ኣብ ክብሪ ንሕልና ሰላምን ንልቢ ሓጐስን ኪህብ ይጽበ ኣሎ— ንሕልና ሰላምን ንልቢ ሓጐስን ኪህብ ይጽበ ኣሎ— ጸጋ ኺህብ: ኪቕጽዕን ኪፍውስን ይጽበ ኣሎ ንዅሎም ሓጢኣቶምን መከራኦምን ዚስምዖም።
ኣሽሓት ናብቲ ብዅናት እተወግአ ጐድኑ ሃዲሞም: ዅሎም ብደሓን ተቐቢሎም: ሓደ እኳ ኣይተነጽገን፣ ድኹማትን ጾር ዝጸዓኑን: ዅሎም ተባሪኾም: ሕጂ ብሓጐስ ኣብቲ መድሓኒ ይዕርፉ።
