ብንህቢ ተወጊእካ ትፈልጥ ዲኻ? ሓሚሙካ ድዩ? እርግጽ ሓሚሙካ! ብዙሓት ሰባት ንንህቢ ይርሕቕዎ ምእንቲ ኸይወግእዎም።
ሓደ ክረምታዊ ድሕሪ ቀትሪ ሓደ ንእሽቶ ወዲ ኣብ ደገ ገዝኡ ይጻወት ነበረ። ኣዲኡ ኣብቲ ቐረባ ኣብ ቤት ማእከላይ ኩሽና ነበረት። ብድንገት ሓደ ንህቢ ኣብ ርእሲ እቲ ወዲ ኺድሃይ መጺኡ ኣፍረሖ። ብኢዱ ኺሰጕጎ ፈተነ፡ ግናኸ ኣናደዮ ጥራይ። ደጊሙ ደጊሙ መጺኡ፡ ኵሉ ግዜ ድማ እናቐረበ።
ብፍርሃት ናብ ኣዲኡ ጐየየ፡ ንሳ ድማ ትርእዮ ነበረት። ብፍቕሪ ኣደኣ ኣእዳዋ ኣብኡ ኣጠቕለለት፡ ሓለወቶ ድማ። እዚ ምስ ገበረት፡ እቲ ንዱይ ንህቢ ወገኣ። ንሳ ሕማም ተሰምዓ፡ ግናኸ ወዳ ኸም ዘይሕመም እውን ትፈልጥ ነበረት። ንእኡ፡ “ሕጂ ድሑን ኢኻ፤ እቲ ንህቢ ኺሕምየካ ኣይኽእልን እዩ። መውጋእቲኡ ኣብ ኢደይ ኣሎ። ሓንሳእ ጥራይ ኺወግእ ይኽእል እዩ” በለቶ።
መውጋእቲ ሓጢኣት
እዚ የሱስ ምእንታና ዝገበሮ ድንቂ ስእሊ እዩ። ብሰንኪ ሓጢኣትና፡ ብኣምላኽ ኽንቅጻዕ ይግብኣና። ግናኸ የሱስ ብፍቓዱ ምእንቲ ሓጢኣትና ኣብ መስቀል ተሰቒሉ ሞተ፡
ምእንቲ በደልና ቖሰለ፡ ምእንቲ ዓመጻና ድማ ተደቝሰ … ብመውጋእቲኡ ድማ ሓዊና … ጐይታ ድማ ዓመጻ ኵላትና ኣብኡ ኣንበረ (ኢሳይያስ 53:5,6)።
ንሱ ተካኢና ነበረ። ኣምላኽ ምእንቲ ሓጢኣትና ኣብ ክንዲና ቐጽዖ፡
ክርስቶስ እውን ምእንታና ተሰቐለ … (ንሱ) ሓጢኣትና ኣብ ስጋኡ ኣብ ዕጨይቲ ተሰኪሙ … ክርስቶስ እውን ምእንቲ ሓጢኣት ሓንሳእ ተሰቐለ፡ ጻድቕ ምእንቲ ዓመጸኛታት፡ ምእንቲ ናብ ኣምላኽ ኬብጽሓና (1 ጴጥሮስ 2:21,24፤ 3:18)።
ሓንቲ መውጋእቲ ጥራይ
ካብቲ ሞት ዜምጽእ መውጋእቲ ሓጢኣት ንምድሓን፡ ንየሱስ ከም ተካኢና ኽንቅበሎ ኣሎና። እዚ ድማ ሓጢኣትና ንኣምላኽ ብምግላጽ ንገብሮ። ምእንቲ የሱስ ኪሓድገልና እዩ። መውጋእቲ ፍርዲ ኣምላኽ ብየሱስ ተወስደ፡ ኣምላኽ ድማ ንሓጢኣትና ክልተ ግዜ ኣይቅጽዕን እዩ። እዚ ድንቂ ኣይኮነን ድዩ?
ቓለይ ዚሰምዕን ብእቲ ዝለኣኸኒ ዚኣምንን ዘለኣለማዊ ህይወት ኣለዎ፡ ናብ ፍርዲ ድማ ኣይመጽእን፡ የግዳስ ካብ ሞት ናብ ህይወት ሓሊፉ እዩ (ዮሃንስ 5:24)።
ክትቅበል ዲኻ?
ኵሉ ኽትገብሮ ዘሎካ ሓጥእ ምዃንካ ምእማንን የሱስ ምእንቲ ሓጢኣትካ ኸም ዝሞተ ምእማንን እዩ። ኣምላኽ ምእንቲ የሱስ ኪሓድገልካ እዩ፡ ኣይትቅጻዕን ድማ ኢኻ። ከምቲ እቲ ወዲ ኣብ ዛንታና ናብ ኣዲኡ ዝጐየየ፡ ናብኡ ኽትጐዪ ይጽበየካ ኣሎ። ሎሚ ክትገብሮ ዲኻ?
