ሓደ ኣብ ብሪጣንያዊ ባሕራዊ ሓይሊ ብዓቢይ መዓርግ ዝነበረ ኣድሚራል፡ ንሕቶታት ብቕልጡፍ ምምላሱ ዝፍለጥ እዩ። ኣብ ደረቱ ዘለዋ ምልክታት እናረኣየ፡ ሓደ ግዜ እንታይ ማለት ምዃነን ተሓቲቱ። ሓጺር መልሱ ድማ፡
«ዝተጠቕመለን ዕድላት።»ብዛዕባ ንጥፈት፡ ትብዓት፡ ጽንዓት ኣብ ባሕራዊ ስርሑ ይዛረባ ነበራ።
ዝጠፍኡ ዕድላት ዝበሃሉ ነገራት ኣለዉ። ኩላትና ነዚኣቶም ክንበኪ ንኽእል ኢና። ካብ «ዝተጠቕመለን ዕድላት» ንላዕሊ ብዙሓት ከም ዝኾኑ ንፈርህ። ኣብ ከባቢና ኩሉ መዓልቲ ብዙሓት ዕድላት ኣለዉ። «ዝተጠቕመለን» ወይስ «ዝጠፍኡ» ተባሂለን ክስየማ እየን? ምናልባት ብዙሓት ዕድላት «ዝጠፍኡ» ተባሂለን ክስየማ ዘለወን ሓደ ምኽንያት፡ ትብዓት ስለ ዘይብልና እዩ። ካልእ ምኽንያት ድማ፡ ወዮ! ምሉእ ልቢ ስለ ዘይብልና እዩ።
እተን ዕድላት ኣለዋ፡ ኣብ ኩሉ ሸነኽ፡ ኣብ ኩሉ መዓልቲ ህይወትና ይጸቕጣና ኣለዋ፡ ንዕአን ንምጥቃም ጸጋ ይሃበና። ተመኺርና ኢና፡
«ግዜ ተጠቐሙ፡ ምኽንያቱ እተን መዓልታት ክፉኣት እየን» (ኤፌሶን 5:16)።
«ምስቶም ኣብ ወጻኢ ዘለዉ ብጥበብ ተመላለሱ፡ ግዜ ተጠቐሙ» (ቈሎሴ 4:5)።
መንእሰያት ክርስትያናት ብስጋዊ ሓይሎም ን«ዝተጠቕመለን ዕድላት» ግሩም ዕድላት ኣለዎም። ገሊኦም ኣብ ዓዶም፡ ገሊኦም ኣብ ኣረማውያን ሃገራት፡ ገሊኦም ኣብ ገዛኦም፡ ኣብ ዝቕጽል ጎደናኦም ንጐይታ የገልግሉ። ጐይታና ድማ፡
«ኣዒንትኹም ኣልዕሉ፡ ነቲ ግራት ድማ ርኣዩ፡ ንሱ ንምሕጻድ ጻዕዳ ኾይኑ ኣሎ» (ዮሃንስ 4:35)።
እተን ዕድላት ርሑቕ ኣይኮናን። ኣብ ቅድሚ ኣዒንትና እየን። ዕድላት ክጥቀመለን ካብዚ ንላዕሊ ኣገዳሲ ዝኾነ መዓልቲ ኣይነበረን።
