መእተዊ
ናይ MIF: 2019 መሪሕ ጥቕስታትና ኻብ ማቴዎስ 28:18-20 እዮም:
የሱስ ድማ ቀሪቡ ኸምዚ ኢሉ ተዛረቦም፡ «ኵሉ ስልጣን ኣብ ሰማይን ኣብ ምድርን ተዋሂቡኒ ኣሎ። ስለዚ ኸዱ ንዅሎም ኣህዛብ ደቀ መዛሙርቲ ግበሩ፡ ብስም ኣቦን ወልድን መንፈስ ቅዱስን ኣጥምቕዎም፡ ዝኣዘዝኩኹም ኵሉ ኺሕልዉ ምሃርዎም፡ እንሆ ድማ ኣነ ኽሳዕ መወዳእታ ዓለም ኵሉ ግዜ ምሳኹም እየ። ኣሜን።» (ማቴዎስ 28:18-20)
ኵሉ ደቀ መዝሙር ምእመን እኳ እንተኾነ፡ ኵሉ ምእመን ግና ከም ደቀ መዝሙር ዝነብር ኣይኮነን። እቲ ክምለስ ዘለዎ ሕቶ፡ «ደቀ መዝሙር የሱስ ክርስቶስ እንታይ እዩ እሞ ብኸመይ ይርአ?» ብዙሓት እቲ ቓል ደቀ መዝሙር ንቐዳሞት ሰዓብቲ ክርስቶስ ወይ ንሓደ ፍሉይ መንፈሳዊ ክርስትያን፡ ንሓደ ዝለዓለ ደረጃ ዘለዎ ክርስትያን ጥራይ ከም ዝምልከት ይሓስቡ ይኾኑ! ግን ኣምላኽ ሕጂ እውን ኵሉ ክርስትያን ደቀ መዝሙር ክኸውን ይደልን ይጽበን እዩ።
እቲ ቓል «ደቀ መዝሙር» ኣብ ግሪኽ ሓድሽ ኪዳን እንተ ወሓደ 261 ግዜ ተጠቒሱ ኣሎ፡ ኣብ ወንጌላትን ግብሪ ሃዋርያትን ጥራይ እዩ ዝርከብ። እቲ ናይ ቀዳማይ ክፍለ ዘመን ቤተ ክርስቲያን ክርስትያናዊ ተመክሮ ንብዙሓት ኣብ ቤተ ክርስቲያን ሎሚ ፍሉይ ክመስል ይኽእል እዩ፡ ግን ንኣቶም ቀዳሞት ምእመናን፡ ደቀ መዝሙር ምዃን ንቡር ክርስትያናዊ ህይወት ነበረ። ብመንፈስ ቅዱስ ተሓይሎምን ተደሪኾምን፡ ንዓለሞም ንክርስቶስ ኢሎም ገልቢጦምዎ። ንሳቶም ናይ ሓቂ ደቀ መዛሙርቲ የሱስ ክርስቶስ ነበሩ።
እቶም ኣብዛ ሰሙን እዚኣ ክንመራመር ዝደለና ሕቶታት እዚኦም እዮም:
- «ናይ ደቀ መዝሙር ምዃን ሕቶታት እንታይ እዮም?»
- «ናይ ሓቂ ደቀ መዝሙር ባህርያትን መዓልታዊ ስነ-ስርዓታትን እንታይ እዮም?»
- «ሓደ ደቀ መዝሙር ብኸመይ ደቀ መዛሙርቲ ዝገብር ይኸውን?»
