ሓደገኛታት ዓሌታውያን ይጎዩ ነበሩ ብናይ ውግእ ጭርሖታትን ጦሮም እናወዛወዙን፡ ዳዊት ሊቪንግስቶን (1813-1873)፡ እቲ ዓብዪ ፈርቀኛ ሚስዮናዊ ኣብ ኣፍሪቃ፡ ናብ ገምገም ባሕሮም ምስ ቀረበ። ሊቪንግስቶን ከመይ ገይሩ እዩ ብሰላም ከም ዝመጸን ጽቡቕ ክገብረሎም ከም ዝደልን ከረድኦም ዝኽእል? ቋንቋኦም ክዛረብ ኣይከኣለን፡ ንሳቶም ከኣ ንዕኡ ክርድእዎ ኣይከኣሉን። ድሕሪ ሓጺር ግዜ ሓደ ትልሚ ሓሰበ እሞ ንሰበይቱ ንንእሽቶ ቖልዓኦም ሓተታ። ንዕኡ ኣብ ኣእዳዉ ሒዙ ካብ ጃልባ ናብ ገምገም ባሕሪ ብማይ ኣቢሉ ተጓዕዘ እሞ ናብቶም ኣብኡ ብህድኣት ደው ኢሎም ዝነበሩ ዓሌታውያን በጽሐ። ንሳቶም ንሊቪንግስቶን ተረዲኦምዎ፡ ከመይሲ እቲ ኣብ ኣእዳዉ ዝነበረ ንእሽቶ ቖልዓ ብሰላም ከም ዝመጸ ምልክት ነበረ።
እዛ ዛንታ እዚኣ ንኻልእ ብሰላም ብቅርጺ ንእሽቶ ቖልዓ ናባና ዝመጸ የዘኻኽረና። ወዲ ኣምላኽ ኣብ ዓለም ኣብ ቤተልሔም ምስ ተወልደ፡ መልኣኽ ጐይታ ከምዚ ከም ዝበለ ትዝክር ኢኻ፦
ሎሚ ኣብ ከተማ ዳዊት መድሓኒ፡ ንሱ ክርስቶስ ጐይታ እዩ፡ ተወሊዱልኩም ኣሎ። እዚ ኸኣ ምልክት ይኹነኩም፤ ንቖልዓ ብመጠምጠሚ ተጠምጢሙ ኣብ መብልዕ እንስሳታት ተነቢሩ ኽትረኽብዎ ኢኹም (ሉቃስ 2:11-12 KJV)። እቲ ቖልዓ የሱስ፡ ኣምላኽ ንነፍሲ ሰብ ንምድሓንን ንርእሱ ሰብ ክርድኦ ብዝኽእል መገዲ ንምግላጽን ብፍቕሪ ብሰብኣዊ ቅርጺ ናብ ሰብ ከም ዝመጸ ምልክት እዩ።
ሕጂ ብዛዕባ ኣምላኽ ጥራይ ኣይንፈልጥን ኢና ብግብሪ ኢዱ ኣብ ፍጥረት፡ የግዳስ ንልብን ባህርይን ኣምላኽ ብንጹር ኣብ ሰብ ክርስቶስ የሱስ፡ ፍቑር ወዱ፡ ንርኢ። ኣብ የሱስ – ኣብ ምድሪ ከም ባዕልና ዝነበረ ሰብ፡ ግናኸ ብዘይ ሓጢኣት –
ኣምላኽ ብስጋ ተገሊጹ ነበረ (1 ጢሞቴዎስ 3:16)። ማለት፡ ኣምላኽ ብሰብኣዊ ቅርጺ ተገሊጹ ነበረ፡ ንኹሉ ሰብ ክርእዮን ክርድኦን ዝኽእል። ኩሉ እቲ ፍቕራዊ፡ ጸጋዊ ቃላት የሱስ ዝተዛረቦን ኩሉ እቲ ንድኻታትን ንዝደኸዩን ዝገበሮ ደግ ተግባራትን ኣምላኽ እንታይ ምዃኑን ንኹሉ ሰብ ከመይ ከም ዘፍቅርን ይሕብር።
የሱስ ሎሚ ኣብ ምድሪ ክንርእዮ እንኽእል እንተ ዘይኮነ እውን፡ መጽሓፍ ቅዱስ ክነንብብ ንኽእል ኢና፡ ካብ ኣርባዕተ ወንጌላት ከኣ ብዛዕባ እቲ ኣብ ምድሪ ዝገበሮ ኩሉ ክንማሃር ንኽእል ኢና። ብእምነት ንዕኡ ከምቶም ብስጋ ኣብ ምድሪ ዝረኣይዎ ብሓቂ ንርእዮ። ካብ ኩሉ ንላዕሊ፡ ንሓጢኣትና ከም ዝሞተ፡ ምእንቲ ክንድሕንን ናብ ሰማይ ክንከይድን ንማሃር!
