ጸሓፊ መጽሓፍ እብራውያን፡ ጐይታ የሱስ፡ ዘለኣለማዊ ወዲ ኣምላኽ፡ ንርእሱ መስዋእቲ ሓጢኣት ኪኸውን ኢሉ ሰብ ዝኾነ፡ ካብ ኩሉ ሰብን ካብ ኩሉ ነገርን ዝበለጸ ምዃኑ ብምርግጋጽ ይጅምር!
ኣብ ናይ ሎሚ ጥቕሲ፡ ንሱ “ዝበለጸ” ዝብል ቃል ይጥቀም፡ እዚ ቃል እዚ ኣብ መጽሓፍ እብራውያን እንተወሓደ ዓሰርተ ሰለስተ ግዜ ተጠቒሙ ኣሎ። እቲ “ዝበለጸ” ተባሂሉ እተተርጐመ ቃል ብሓቂ “ዝዓበየ፡ ዝበለጸ፡ ዝበዝሐ ጥቕሚ ዘለዎ፡ ዝበዝሐ ኣገልግሎት ዝህብ፡ ወይ ዝበለጸ” ማለት እዩ። ካብተን ዓሰርተ ሰለስተ ግዜታት ሸውዓተኡ ኣብ ምዕራፋት 7–10 ይርከባ፡ ኣብኡ ድማ ጐይታ የሱስ ብዝበለጸ ኪዳን (እብ. 8) ፡ ኣብ ዝበለጸ መቕደስ (እብ. 9) ፡ ከምኡ’ውን ብዝበለጸ መስዋእቲ (እብ. 10) ኣገልግሎት ከም ዝገበረ ንምብብ።
እቲ ጸሓፊ ብንጹር ዝበለጹ ነገራት ብክርስቶስን ብእኡ ኣቢሉን ከም ዝመጹና (11:40) ክንርድእ ይደሊ። ግናኸ ካብኡ ንላዕሊ፡ ጐይታ የሱስ ክርስቶስ ካብ ዝኾነ ይኹን ነገርን ካብ ዝኾነ ይኹን ሰብን ዝበለጸ ምዃኑ ክንርድእ ይደሊ። ካብ ነብያት ዝዓበየ (1:1–3) ፡ ካብ መላእኽቲ ዝዓበየ (1:4–2:18) ፡ ካብ ሙሴን እያሱን ዝዓበየ (3:1–4:13) ሓደ ኣሎና፤ ክህነቱ ድማ ካብ ናይ ኣሮን ዝዓበየ እዩ (4:14–7:28) ። ካብ መቕደስን መስዋእትታትን ብሉይ ኪዳን ዝዓበየ እዩ (8:1–9:10) ። ኩሉ ብዛዕባ ስብእናን ዕዮን ክርስቶስ ኣብዛ ህይወት እዚኣ ክንሕዞ ካብ እንኽእሎ ዝኾነ ይኹን ነገር ኣዝዩ ዝበለጸ እዩ።
ክንምልሶ ዘሎና ሕቶ፡ እሞኸ ስለምንታይ ኢና ካብቲ ኣዝዩ ዓብዪ ዝኾነ ንምስዓብ ንርእስና ክንበታተንን ክንዕገትን እንፈቅድ! ነዛ መዓልቲ ጐይታ እዚኣ ኣዒንትና ኣብኡ ብምጥባቕ ንጅምራ። ኣብ ምሉእ መዓልቲ ድማ፡ ምናልባት ንጐይታ የሱስ ክርስቶስ፡ እቲ ኣዝዩ ዝበለጸ፡ ንጹር ርእየት ንምርካብ ትኹረትና ምምሕያሽ የድልየና እንተኾይኑ ደው ኢልና ክንርኢ ንኽእል።
