ንዕምቆት ድሌትና ዝኸውን በጊዕ
ተገሪሞምዶ ይኾኑ ዮሃንስ ንየሱስ ጠቒሱ «እንሆ፡ ሓጢኣት ዓለም ዜርሕቕ ገንሸል ኣምላኽ!» (ዮሃንስ 1፡29) ምስ በለ? ንሳቶም ኣይሁድ እዮም፣ ብዛዕባ ገንሸላት ዝገልጽ ናይ ፋስጋ ጽሑፋት ይፈልጡ ነበሩ፦ ሕቶ ይስሃቅ፣ «በጊዕ ንመስዋእቲ ምሕራቕ ኣበይ እያ?» (ዘፍጥረት 22፡7)፤ ትእዛዝ ፋስጋ ሙሴ፣ «ነፍሲ ወከፍ ሰብ ንርእሱ በጊዕ ይውሰድ ... ብዘይ ነውሪ» (ዘጸኣት 12፡3-5)፤ ከምኡ’ውን ትንቢት ኢሳይያስ፣ «ሰብ ሓዘን ... ከም በጊዕ ናብ መብሓርቲ ተወሲዱ ... በደሎም ኪጸውር እዩ» (ኢሳይያስ 53፡3-7)። ዮሃንስ ንየሱስ ከም እቲ ንዕምቆት ድሌቶም ከማልእ ዝኽእል በጊዕ ምዃኑ ምስ ገለጸሎም ክንደይ ተገሪሞም ክኾኑ ኣለዎም!
እቲ ሓረግ፣ «ገንሸል ኣምላኽ» ንኣይሁድ ኣገሪምዎምዶ ይኸውን? የሱስ ብሓቂ እቲ ብኣምላኽ ዝተዋህበ በጊዕ ድዩ? ንዘመናት ንቤተ መቕደስ መስዋእቲ ንምቕራብ ባዕላቶም በጊዖም ከቕርቡ ነበሮም። ሕጂ ዮሃንስ ኣምላኽ በጊዕ ከም ዝሃበ ይነግሮም ነበረ – ንሓደ ሰብ፣ ንሓደ ስድራቤት፣ ወይ ንሓደ ህዝቢ ጥራይ ዘይኮነስ፣ ንዅላ ዓለም! እቲ በጊዕ ድማ የሱስ እዩ! ንሱ ዅሉ ሓጢኣት ናይ ዅላ ዓለም ን ዅሉ ግዜ ከርሕቕ ምዃኑ ካብ ዅሉ መስዋእቲ ፍሉይ ገይርዎ እዩ!
ሓደ ሰብ ከመይ ገይሩ ንዅሉ ሓጢኣት ምሕረት ክገብር ይኽእል? መዝሙር 49፡7 «ሓደ እኳ ንሓዉ ኺብጀዎ ወይ ንኣምላኽ በጃኡ ኺህቦ ኣይከኣሎን እዩ» ይብል። እዚ ከምዚ እንተኾይኑ፣ ሓደ ሰብ ከመይ ገይሩ ንዅሉ በደል ዓለም ጸይሩ ንጻድቕ ኣምላኽ ዘርብሕ ዋጋ ክኸፍል ይኽእል?
የሱስ እዚ ሕቶ እዚ መለሰ፣ «ኣምላኽ ንወዱ በይኑ ኽሳዕ ዚህብ፡ ንዓለም ክሳዕ ክንድዚ ኣፍቀራ» ኢሉ እዩ። ኣምላኽ ባዕሉ ድማ – ዮሃንስ ንየሱስ ከም «ገንሸል ኣምላኽ» ምስ ኣፋለጠሉ ድሕሪ ሓጺር ግዜ ካብ ሰማይ ተዛሪቡ – ብዛዕባኡ፣ «እዚ ፍቑር ወደይ እዩ፡ ብእኡ ባህ ይብለኒ» (ዮሃንስ 3፡16፤ ማቴዎስ 3፡17)። የሱስ ንዕምቆት ድሌትና ንምምላእ ዝተዋህበ በጊዕ ኣምላኽ እዩ።
