ትሰምዕዶ ኣሎኻ፧
ኵሎም ድማ ተገሪሞም ተጨኒቖም ድማ ንሓድሕዶም «እዚ እንታይ ይኸውን፧» በሉ። ገሊኦም ግና እናላገጹ «ብሓድሽ ወይኒ ሰኺሮም እዮም» በሉ። —ግብሪ ሃዋርያት 2:12-13 NKJV
ንዝተጸውዑ … ክርስቶስ ሓይሊ ኣምላኽን ጥበብ ኣምላኽን እዩ። —1 ቈረንቶስ 1:24
ኣብ የሩሳሌም ዘገርሙ ነገራት ይፍጸሙ ነበሩ፡ ብርቱዕ ህቦብላ ንፋስ፣ ልሳናት ሓዊ ኣብ ርእሲ ሰባት ይቕመጡ፣ ዘይተማህሩ ገሊላውያን ድማ ዘይፈልጥዎም ቋንቋታትን ዘዬታትን ይዛረቡ ነበሩ! እቲ ህንጡይ ህዝቢ ምስ ተኣከበ፣ ነዞም ተኣምራዊ ፍጻሜታት ክልተ ምላሻት ተራእዩ። እቲ ቐዳማይ ድንቊርናኡ ተኣሚኑ ምስትውዓል ደለየ፤ እቲ ኻልኣይ ድማ ምስትውዓል ኣለኒ ኢሉ ስለ ዝሓሰበ ድንቊርናኡ ኣርኣየ። እቲ ቐዳማይ ንምምሃር ሕቶ ሓተተ፤ እቲ ኻልኣይ ድማ ዝመሃሮ ነገር ከም ዘይብሉ ገይሩ መግለጺ ሃበ። እቲ ቐዳማይ ንሓቂ ዝተኸፍተ ኣእምሮ የርኢ፤ እቲ ኻልኣይ ድማ ብገዛእ ርእሱ ርእይቶታት ዝተዓጽወ ኣእምሮ የርኢ።
ነገራት ብዙሕ ኣይተቐየሩን። እቲ ዘመናዊ ሰብ፣ ምስ መጽሓፍ ቅዱሳዊ መዝገብ ተኣምራት ምስ ተጋጠመ፣ ሓደ ካብ ክልተ ነገራት ይገብር። ወይ ምንጩን ትርጉሙን ይደሊ፣ ወይ ድማ ንሱ ገለ እኳ ስለ ዘይረኣየን ኣብታ ንሱ ሓቂ ኢሉ ዝሰመያ ንእሽቶ ዝተዓጽወት ሳጹን ስለ ዘይሰማምዑን፣ ከም ኣፈ ታሪኽ – «ብሓድሽ ወይኒ ዝሰኸሩ» ሰባት ምናባዊ ፍጥረት ገይሩ ብዕብዳን ይነጽጎም።
ግናኸ ኣምላኽ ከምቲ ኣብ የሩሳሌም ኣብ መዓልቲ ጰንጠቆስቴ ንሰባት ዝገበሮ፣ ንዝሰምዑ ሰባት ገና ይገልጽ እዩ። በታ ኣጋጣሚ እቲኣ መንፈስ ቅዱስ ብጴጥሮስ ኣቢሉ ተዛረበ፣ ነቶም ዝተጨነቑ ሕተተቲ ናብ ክርስቶስ ኣመልከተ። ሎሚ ድማ ብኣገልገልቱ ኣቢሉ ብሓጎስ ንክርስቶስ የሱስ ከም ጐይታ እናኣወጁ ብተመሳሳሊ መገዲ ይዛረብ።
ሓደ ክርስትያናት «ብሓድሽ ወይኒ ሰኺሮም እዮም» ኢሉ ዝወሰነ ተላጋጺ ሓደ ግዜ «ከመይ ገይረ እየ ከም ዝተጸዋዕኩ ዝፈልጥ፧» ኢሉ ሓተተ። እቲ ብቕጽበት ዝተዋህበ ጥበባዊ መልሲ ድማ «እቲ ክትገጥሞ ዘሎካ ሕቶ ‘ተጸዊዐዶ እየ፧’ ዘይኮነስ ‘እሰምዕዶ ኣሎኹ፧’ እዩ» ዝብል ነበረ።
ትሰምዕዶ ኣሎኻ፧
