መለኮታዊ ርክብ፡ ናብ ቅጽበታዊ መልስታት ኣምላኽ ምብጻሕ

እቶም ንሓደስቲ ሞባይል ቴሌፎናት ዚወጹ ምልክታታት ክንደይ ዘገርሙ እዮም! ምብጻሕ—ቅጽበታዊ ምብጻሕ—ኣየናይ ቦታ ይኹን፡ ኣየናይ ግዜ ይኹን። (ብርግጽ፡ ኣብቲ ኻልእ ወገን ቴሌፎን ኪህሉ ኣለዎ!) ግን… ቅጽበታዊ? ካብ ዚንቀሳቐስ መኪና ወይ ነፋሪት ወይ ኣብ ዱር እናተጓዓዝካ ኻብ ኪሎ ሜትራት ርሑቕ “ናብ ቤት ምድዋል” ይከኣል ይኸውን፡ ግን ኣብታ ሓንቲ ከተማ ናብ ቤት ጽሕፈት ቀሊል ድዋለ ፈትን!

ሓቀኛ ሰማዒ

ደጋጊምካ ነቲ ልሙድ “ሓደ ጠውቕ፡ ክልተ ጠውቕ” ዝብል ምርጫታት ክትረክብ ኢኻ፡ ድሕሪኡ ኸኣ ብዛዕባ እታ ዓባይ ኩባንያ ዝርዝርን ኣድካምን መግለጺ፡ ብኻልእ ድምጺ ኸኣ፡ “ድዋለኻ ኣገዳሲ እዩ፤ በጃኻ ጽናሕ” እናበለ ዜቋርጽ።

ነዚ ምስቲ ኣብ ቃል ኣምላኽ ዘሎ ንጹር ተስፋ ኣነጻጽሮ፦

“ቅድሚ ምጽዋዖም፡ ኣነ ኽምልስ እየ፤ ገና ኺዛረቡ ኸለዉ ኸኣ፡ ኣነ ኽሰምዕ እየ” (ኢሳይያስ 65:24)።

ዘገርም! “ቅድሚ ምጽዋዖም፡” እቲ መልሲ ኣብ መገዱ እዩ። ድሕሪኡ “ገና ኺዛረቡ ኸለዉ፡” ይሰምዕ። “ድምጺ መልእኽቲ” የለን—ኣብ መንጎ እቲ ዚሰምዕ ኣምላኽን እታ እትጽሊ ነፍስን ምንም የለን። ብሓቂ፡

“ሓሳባተይ ከም ሓሳባትኩም ኣይኮነን፡ መገድታተይ እውን ከም መገድታትኩም ኣይኮነን፡ ይብል እግዚኣብሔር። ከመይሲ ሰማያት ካብ ምድሪ ልዕል ከም ዝበለ፡ ከምኡ ኸኣ መገድታተይ ካብ መገድታትኩም፡ ሓሳባተይ ከኣ ካብ ሓሳባትኩም ልዕል ይብል” (ኢሳይያስ 55:8-9)።

መፍለጢ ደዋሊ

ድሕሪኡ መፍለጢ ደዋሊ ኣሎ። ናብቲ ዚድውል ቴሌፎን ሓንሳብ ምጥማት፡ “ሰላም!” ኪብል እንተ ዀይኑ ይፈልጥ፡ ወይ እቲ ቁጽሪ እንተ ዘይፈልጦ፡ ነቲ ድዋለ ይሓድጎ። ኣምላኽ እውን መፍለጢ ደዋሊ ኣለዎ። ብዛዕባ ናቱ ኸኣ፡ “ኣነ እፈልጦም…” ይብል፡ ድዋላቶም ከኣ ብቕጽበት ይበጽሖ። ግን ንኻልኦት ሓደ መዓልቲ ብሓዘን፡ “ኣይፈልጠኩምን እየ…. ካባይ ርሓቑ” ኪብሎም እዩ።

ምምጥጣን

ድሕሪኡ ሓድሽ ሞባይል ቴሌፎንካ “ኪምጥጥ” ኣለዎ። ቴሌፎን ምህላውካን ብዛዕባ ኣጠቓቕምኡ ዅሉ ምፍላጥካን ጥራይ ኣይበቅዕን—እንታይ ቁልፊ ኸም እትጠውቕ፡ እንታይ ስነ-ስርዓት ከም እትስዕብ—“ኪምጥጥ” ኣለዎ። እዚ ኸኣ ን“ምርኻብ” ናይ ገመድ ቴሌፎናት ዚመሳሰል እዩ። እንተ ዘይኮይኑ፡ እቲ ቴሌፎን ጥራይ ምዉትን ዘይጥቕምን ኪኸውን እዩ።

እዚ ኣዝዩ ኣገዳሲ እዩ፡ ከምኡ’ውን ኣዝዩ ቀሊል! ጐይታ የሱስ ኣብ መስቀል ቀራንዮ ህይወቱ ኺህብ ከሎ “ክፍሊት ምምጥጣን” ከፊሉ እዩ። ሕጂ ሓደ ሰብ ብውልቁ፡ ማለት ንርእሱ፡ መስዋእቱ ኺቕበል—ኪኣምንን ኪቕበልን—ጥራይ የድልዮ፦ ከመይሲ

“ንዅሎም እቶም ዝተቐበልዎ፡ ንእቶም ብስሙ ዚኣምኑ ኸኣ፡ ደቂ ኣምላኽ ኪኾኑ መሰል ሃቦም” (ዮሃንስ 1:12)።

እቲ ምምጥጣን—እቲ ምርኻብ—እቲ ሓይሊ—ሕጂ መሰል ዅሉ ምእመን እዩ፡ ምስ ዅሉ እቲ ዘለኣለማዊ ረብሓታት ዚሰንዮ።

“ስለዚ፡ ብእምነት ስለ ዝጸደቕና፡ ብጐይታና የሱስ ክርስቶስ ምስ ኣምላኽ ሰላም ኣሎና፤ ብእኡ ኸኣ ብእምነት ናብዚ ጸጋ እዚ ኣቲና ኢና፡ ኣብኡ ኸኣ ደው ኢልና ብተስፋ ክብሪ ኣምላኽ ንሕጐስ” (ሮሜ 5:1-2)።

“ብጐይታ የሱስ ክርስቶስ እመን፡ ክትድሕን ኢኻ” (ግብሪ ሃዋርያት 16:31)።