ኣምላኽ ንዓለም ክሳዕ ክንድዚ ስለ ዝፈቐራ፡ በቲ ሓደ ወዱ ዝኣመነ ዅሉ ኸይጠፍእ፡ የግዳስ ናይ ዘለኣለም ህይወት ምእንቲ ኺረክብ፡ ንእኡ ሃበ።
(ዮሃንስ 3:16)
ኣብዚ ግዜ ዓመት እዚ፡ ማእከላት ዕዳጋ ብሰባት ንፍቑራቶም ህያባት ኪዕድጉ ይበዝሑ። ኣብ ዅሉ እዚ ግርግርን ምብዛሕን፡ ደው ኢልካ ነቲ ዝበለጸ ህያብ ምዝካር ጽቡቕ እዩ—ህያብ ዘይተዓደገ፡ ግናኸ ብነጻ እተዋህበን ምስናይና እተኻፈለን፡ ህያብ ፍቑር ወዲ ኣምላኽ። ጳውሎስ፡ «ንኣምላኽ ብዘይግለጽ ህያቡ ምስጋና ይኹን!» ይብል (2 ቈረንቶስ 9:15)።
ኣብዚ ዘደንቕ ህያብ ምሕሳብ ኣብ መዓልታዊ ህይወትና ንዝምባሌና ኽንምልስ ይሕግዘና። እዚ ቃላት እዚ ምዝካር ጽቡቕ እዩ።
«እምበኣርሲ ብዛዕባ እዚ ነገር እዚ እንታይ ክንብል ኢና? ኣምላኽ ምሳና እንተ ኾይኑስ፡ መን ኪጻረረና ይኽእል? ንወዱ ዘይሓረመ፡ የግዳስ ንዅላትና ዝሃበ፡ ከመይ ኢሉኸ ምስኡ ዅሉ ነገር ብነጻ ኣይህበናን?» (ሮሜ 8:31–32)
ኣምላኽ ነቲ ዝዓበየ ድሌትና—ምድሓን—ብህያብ ወዱ እንተ ተኸናኺንዎ፡ ንዅሉ ካልእ ድሌትና ድማ ኣይክተኸናኽኖን ድዩ? ብርግጽ ኪኸናኽኖ እዩ! ግናኸ ከምቲ ምስ ምድሓንና፡ ንእኡ ኽንእምኖ ኣሎና። በዓል ልደት መድሓኒና ንፍቑር ኣቦና፡ ንወዱ ንኣና ምእንቲ ኺብጅወና ኣብ መስቀል ህይወቱ ኺህብ ዝለኣኾ፡ ክንእምኖ ሓድሽ መዘኻኸሪ እዩ። እቲ ሓደ ወዲ ሕጂ ኣብ የማን ኣቦ ኾይኑ ከም ካህንናን ፍቑር መድሓኒናን ይቕመጥ፡ ሓደ መዓልቲ ድማ ከም ንጉስ ነገስታትን ጐይታ ጐይተታትን ኪግለጽ እዩ።
ኣብዚ ህያብ ምሕሳብ ኣብ ጸልማትን ግርምትን ዝመልአት ዓለም ካብ መዓልቲ ናብ መዓልቲ ብእምነት ክንነብር ይሕግዘና። ጳውሎስ ብጽቡቕ ገሊጽዎ።
«ምኽንያቱ እቲ ምድሓን ዜምጽእ ጸጋ ኣምላኽ ንዅሎም ሰባት ተገሊጹ እዩ፡ ንኣና ድማ ንዘይፍርሃ ኣምላኽን ንዓለማዊ ትምኒትን ክንነጽግ፡ ኣብዛ ሕጂ ዘላ ዓለም ብልክዕን ብጽድቅን ብፍርሃ ኣምላኽን ክንነብር፡ ነቲ ብጹእ ተስፋን ክብሪ ምግላጽ ዓብዪ ኣምላኽናን መድሓኒናን የሱስ ክርስቶስን ክንጽበ፡ ንሱ ንኣና ንዅሉ ዓመጻዊ ግብሪ ምእንቲ ኼድሕነናን ንርእሱ ፍሉይ ህዝቢ ኺገብረናን፡ ንጽቡቕ ግብሪ ቕንኣት ዘለዎም፡ ንርእሱ ሃበ» (ቲቶስ 2:11–14)
በዚ ህያብ እዚ፡ ንጽባሕ ተስፋ ሒዝና ሎሚ ክንነብር ንኽእል—ተስፋ ናብ ምምላስ እቲ ፈለማ ከም ሕጻን ኣብ መብልዕ ዝመጸ፡ እንደገና ድማ ብትሕትና ዘይኮነስ፡ ብኽብሪ ከም ስዓሪ ንጉስ ዚምለስ።
መሰረት ንሎሚ።
«ንኣምላኽ ብዘይግለጽ ህያቡ ምስጋና ይኹን!» 2 ቈረንቶስ 9:15
