ኣምላኽ ንዓናን ንጥቕምናን ዘለዎ ምስትውዓል ክንርኢ ክንደይ ዘደንቕ እዩ። ኣምላኽ ጭንቀትናን ፍርሃትናን ይፈልጥ እሞ ኣብኡ ክንእመን የረጋግጸና። ብዙሕ ግዜ «ኣይትፍራህ» ይብለና። ሓደ ሰብ ሓደ ግዜ እዚ ሓሳብ እዚ ኣብ መጽሓፍ ቅዱስ 365 ግዜ: ማለት ንሓደ ዓመት ሓደ መዓልቲ: ከም ዝደጋገም ነጊሩኒ። ከምኡ እኳ እንተ ኾነ: ኣምላኽ ከም እንፈርህ ይፈልጥ እሞ ንዓና ምድላው ይገብር። እዚ ኣብ ትምህርቱ ንእስራኤል ብዛዕባ ውግእ ንርእዮ። እቶም ዝመጽእ ዘሎ ውግእ ዝፈርሑ ክዋግኡ ኣይነበሮምን (ዘዳ. 20:8)። ኣምላኽ ምስ ጌዴዎን ዘርኣዮ ትዕግስቲ ንርኢ: ሕቶኡ ብዛዕባ እቲ ጸምሪ ክልተ ግዜ መለሰሉ: ድሕሪኡ ድማ ብዛዕባ ሕልሚ ሓደ ጸላኢ ወተሃደር ዘደንቕ መግለጺ ሃቦ (መሳ. 6–7)።
ኣምላኽ ምስና ዘለዎ ምምሕዳር: ምስና ዘለዎ ትዕግስቲ: ንድኻምና ዘለዎ ምስትውዓል ክንርኢ ክንደይ ዘደንቕ እዩ። ግናኸ ንሕና እውን ንሓውና ወይ ንሓብትና ፍርሃቶም ወይ ድኻሞም ክገልጹ ወይ ከርእዩ ከለዉ ነቲ ሓደ ምስትውዓል: ምሕረት: ከምኡ ድማ ክንክን ኣለናዶ?
ጳውሎስ «ምግቢ ንሓወይ እንተ ኣዕንቕሎ: ድሕሪ ሕጂ ስጋ ኣይበልዕን» (1 ቈረ. 8:13) በለ። ኣብ ሮሜ 15:1–3 ድማ «ንድኻም ድኹማት ክንጸውር: ንገዛእ ርእስና ድማ ከየሐጐስና» ተባሂልና ኣለና። «ነፍሲ ወከፍና ንብጻዩ ንጽቡቑ: ንምህናጽ ይሕጐስ።» ከምኡ ድማ «እተን ዝወረዳ ኣእዳው: ከምኡ ድማ እተን ዝደኸማ ኣጕልባብ ኣበርትዑ» (እብ. 12:12)። ኵላትና ሓደ መጠን እምነት የብልናን: ግናኸ እቲ እምነት ዘለዎ: ካብ ጐይታ ዝተቐበሎ መጠን ብምፍላጥ: ከምኡ ይግበር። ምስዚ ድማ እዚ ኣተሓሳስባ እዚ ክኸውን ኣለዎ: «ብትሕትና ልቢ ነፍሲ ወከፍ ንኻልኦት ካብ ገዛእ ርእሱ ዝበለጹ ይቘጽር … እዚ ኣተሓሳስባ እዚ ኣብ ክርስቶስ የሱስ ዝነበረ: ኣብ ኣባኻትኩም እውን ይኹን» (ፊል. 2:3–5)።
