ሕቶ፦ ንርእስና ብፍቕሪ ኣምላኽ ከመይ ጌርና ንሕሉ (ይሁዳ 21)?
«ኣቱም ፍቑራት ግና፡ ኣብቲ ቕዱስ እምነትኩም ንርእስኹም እናሃነጽኩም፡ ብመንፈስ ቅዱስ እናጸሌኹም፡ ንዘለኣለማዊ ህይወት እናተጸበኹም ንምሕረት ጐይታና የሱስ ክርስቶስ፡ ንርእስኹም ብፍቕሪ ኣምላኽ ሐልዉ። ንገሌኦም ድማ፡ እናፈለኹምዎም ምሐርዎም፡ ንገሌኦም ከኣ ካብ ሓዊ እናመንጠልኩም ብፍርሃት ኣድሕንዎም፡ ነቲ ብስጋ ዝረኸሰ ኽዳውንቲ እኳ ጽልእዎ።» –ይሁዳ 20-23 NKJV
መልሲ፦
ይሁዳ ነዛ ሓጻር መልእኽቱ ንብጾት ክርስትያናት – ንጐይታ የሱስ ክርስቶስ ከም መድሓኒኦምን ጐይታኦምን ብውልቂ ዝኣመኑ ሰባት እዩ ጸሓፋ። ነፍሲ ወከፍ ምእመን ብዛዕባኡ «ወዲ ኣምላኽ፡ ንኣይ ዝፈቐረን ንርእሱ ምእንታይ ዝሃበን» (ገላትያ 2:20) ኢሉ ኺዛረብ ይኽእል። እቲ ወዲ ኸኣ፡ «ኣብኡ ስለ ዝኣመንኩም፡ ኣቦ ባዕሉ ይፈትወኩም እዩ» (ዮሃንስ 16:27) ኢሉ የረጋግጸልና። ብዙሓት ካልኦት ጥቕስታት መጽሓፍ ቅዱስ እውን ኣምላኽ ከም ዝፈትወና የርእዩ።
እቲ ንርእስና ብፍቕሪ ኣምላኽ ንኽንሕሉ ዝቐርብ ምትብባዕ ወይ ምሕጽንታ፡ ካብቲ ናይ ምርግጋጽ ቃል ንላዕሊ እዩ፤ ንኽንቅጽሎ ዝቐርብ ምሕጽንታ – ክንክተሎ ዝግባእ ትእዛዝ እዩ። እዚ ኣብታ ዓንቀጽ እቲኣ ዘሎ ማእከላይ ሓሳብ እዩ፡ ከመይሲ እተን ካልኦት ሰለስተ ክፍሊ ዓንቀጻት፡ ንርእስና ብፍቕሪ ኣምላኽ ክንሕሉ እንኽእለሉ መገድታት ይገልጻ። እዘን መገድታት እዚኤን፡ ምስ ካልኦት ክልተ ኣብቲ ምንባብ ዘለዋ፡ እዘን ዝስዕባ እየን፦
1. «ኣብቲ ቕዱስ እምነትኩም ንርእስኹም እናሃነጽኩም» ኣብ ዘይፍርሃት ኣምላኽ ዝመልኦ ዓለም ኢና ዘለና – ኣብ ዓለም ናይ ርእሰ-ፍቕርን ዕልወትን ጸላእነትን ንኣምላኽ። ብቓሉ ክንጸምድ፡ ከነስተንትንን ንምጽናዕ ግዜ ክንህብን የድሊ። በዚ ኸኣ ኣምላኽ ብጸጋኡ ንናቱ እንታይ ከም ዘለዎ ንርኢ። ሃብቲ ጸጋኡ ንመሃርን ናብ ፍቕራዊ ልቡ ንቐርብን።
2. «ብመንፈስ ቅዱስ እናጸሌኹም» ልብና ብጸሎት ይምልሰሉ። ጸሎት «ሃበኒ» ዝብል ዓይነት ጥራይ ዘይኮነስ፡ ኣምልኾን ምስጋናን ንመንነቱ ንዝገበሮን። ኣብዛ እክይቲ ዓለም እዚኣ ብዛዕባ ረብሓታቱን ዕላማታቱን ብዛዕባ ድሌታት ካልኦትን ንሓስብ፡ ነዚ ጉዳያት እዚ ድማ ብምልጃ ናብ ኣምላኽ ነቕርቦ። ምስ መድሓኒናን ምስ ኣምላኽ ኣቦናን ሕብረት ነስተማቕር።
3. «ንዘለኣለማዊ ህይወት እናተጸበኹም ንምሕረት ጐይታና የሱስ ክርስቶስ» ኣብዛ እንነብረላ ዓለም – ዕልወታ ንኣምላኽን ርእሰ-ፍቕራን – ክንሓስብ ከለና፡ ልብና ምስ ጐይታ ንኽንከውን ይናፍቕ። ብዛዕባ ተስፋኡ ንሓስብን ንምፍጻሙ ንናፍቕን፡ ንሱ ንኽወስደና ንምምጻኡ። ካብዛ ዓለም እዚኣ ተወሲድና ንዘለኣለም ምስኡ ምዃን ክንደይ ምሕረት ኰን እዩ! ግናኸ ገና ዝበዝሕ ኣሎ።
4. «ንገሌኦም ድማ፡ እናፈለኹምዎም ምሐርዎም» ፍቕሪ ኣምላኽን ሃብቲ ጸጋኡን ክንርእይን ክንሕጎስን ከለና፡ ካልኦት ኣብዛ ድኻ ዓለም – ፍቑራት፡ ኣዕሩኽን ጎረባብትን – ኣብዚ ነገር እዚ ኺካፈሉ ንደሊ። ባዶነቶምን ድሌቶምን ክስምዓና እዩ፡ ከምቲ ንሕና ዘድሓናን ዝባረኽናን ኪድሕኑን ኪባረኹን ንናፍቕ። ክንበጽሖምን ዘሎና ኽንካፍሎምን ክንፍትንን ኢና።
5. «ንገሌኦም ከኣ ካብ ሓዊ እናመንጠልኩም ብፍርሃት ኣድሕንዎም፡ ነቲ ብስጋ ዝረኸሰ ኽዳውንቲ እኳ ጽልእዎ» ብዙሓት ኣብ ከባቢና ዘለዉ እኩይነቶምን ብልሽውናኦምን ግሉጽ እዩ። ኣብ መንጎኦም ስለ ዘይተመችኣና ንርሕቆም፡ ብዘይፍላጥ ካብኦም ንርሕቕ። ኣብ መንጎ እቲ ዝተዋህበና ብርሃንን እቲ ዘለዉዎ ዕምቈት ጸልማትን ሕብረት የልቦን። ግናኸ ንሳቶም እውን መድሓኒ የድልዮም እዩ፡ ጐይታ እውን ምእንትኦም ሞይቱ እዩ። ብምርኻቦም ክንረክስ ብፍርሃት ክንፈርህ ከለና፡ ዓብዪ ድሌቶም ይስምዓናን ናብቲ ብጽምኢ ዝደልይዎ መድሓኒና ክንሰሓቦም ንደሊ።
ንርእስና ብፍቕሪ ኣምላኽ ክንሕሉ እንተደሊና፡ እዚ ኩሉ ኣገዳሲ እዩ። ብፍላይ ነተን ናይ መጀመርታ ሰለስተ ንውልቃዊ መንፈሳዊ ረብሓና የድልየና። እተን ናይ መወዳእታ ክልተ ድማ ናብቶም ድሌት ዘለዎም ካልኦት ዝፈስስ እዩ። ኣምላኽ ኣብዚ ኩሉ መገድታት እዚ ብፍቕሩ እናተሓጎስና ንርእስና ኽንሕሉ ይሓግዘና!
