ንሱ ኸኣ ምስኡ ዝነበሩ ዅሎም ብዛዕባ እቲ ዝሓዝዎ ዓሳ ተገረሙ። ከምኡ ድማ ያእቆብን ዮሃንስን፡ ደቂ ዘብዴዎስ፡ ምስ ስምኦን መሓዙት ዝነበሩ፡ ተገረሙ። የሱስ ከኣ ንስምኦን፡ «ኣይትፍራህ። ካብ ሕጂ ንደሓር ሰባት ክትድህር ኢኻ» በሎ። ጀላቡኦም ናብ ገምገም ምስ ኣምጽኡ ኸኣ፡ ኵሉ ሓዲጎም ሰዓብዎ። ሉቃስ 5:9–11
ንሉቃስ 5:1–11 ንሓንሳብ ንመወዳእታ ንምልስ እሞ ሓንቲ ሕቶ ንሓትት። እቲ ጴጥሮስ ምስ ክርስቶስ ዝገበሮ ርክብ ከምዚ ንሓትት ኣገዲዱና፡ «ንውድቀት ከመይ ንምልስ?» (ፍቕዲ 1–2)፡ «ንባለ ስልጣን ከመይ ንምልስ?» (ፍቕዲ 3–5)፡ ከምኡ እውን «ንዓወት ከመይ ንምልስ?» ሕጂ፡ ነቲ ናይ መወዳእታ ፍቕድታት ናይዚ ርክብ እዚ ክንርኢ ከለና፡ ከምዚ ንሓትት፡ «ንህይወት እምነት ከመይ ንምልስ?»
ጴጥሮስን እቶም ምስኡ ዝነበሩን ንዓብዪ ሓይሊ ጐይታ የሱስ መሰኻኽር ነበሩ፡ እዚ ኸኣ ከፍርሆም ገበሮም። ጐይታ ከምዚ ጥራይ ኣይበለን፡ «ኣይትፍራህ፡» ነቲ ጭንቕ ዝበለ ልቦምን ሓሳቦምን ብምህዳእ፡ ሓድሽ ጽውዓ እውን ሃቦም፡ «ካብ ሕጂ ንደሓር ሰባት ክትድህር ኢኻ።» ቀደም፡ ኣብ ፍቕዲ 4ን 9ን፡ እቲ ን«ምድሃር» ዝውክል ቃል ንምቕታል ምድሃር ዝብል ሓሳብ ከም ዝሓዘ፡ ኣብዚ ግና ንምድሓን ምድሃር ዝብል ሓሳብ ከም ዝሓዘ ምጥቃስ ኣገዳሲ እዩ።
ፍርሃት ኣብቲ ጐይታ ዝጸውዖም ህይወትን ዕዮን ቦታ ኣይህልዎን እዩ። ኣብ ወንጌል ሉቃስ፡ እዚ ተደጋጋሚ ሓሳብ እዚ «ኣይትፍራህ» ሸውዓተ ግዜ ንርእዮ (ሉቃስ 1:13, 30፤ ሉቃስ 2:10፤ ሉቃስ 5:10፤ ሉቃስ 8:50፤ ሉቃስ 12:7, 32)። ጐይታ ብእምነት ክንነብር እምበር፡ ብፍርሃት ከይንነብር ይጽውዓና፡
«ብዘይ እምነት ንኣምላኽ ምሕጓስ ኣይከኣልን እዩ፡ ከመይሲ ናብ ኣምላኽ ዚመጽእ፡ ንሱ ከም ዘሎን ነቶም ዚደልይዎ ኸኣ ዓስቢ ኸም ዚህብን ኪኣምን ይግብኦ።» (እብራውያን 11:6)
ነዚ እምነት እዚ ከመይ ንምዕብሎ? ጴጥሮስ ከም ዝገበሮ፡ «ብቓልካ» (ሉቃስ 5:5)።
«እምነት ካብ ምስማዕ እያ እትመጽእ፡ ምስማዕ ከኣ ብቓል ኣምላኽ።» (ሮሜ 10:17)
ህይወት እምነት ንምንባር፡ ንጐይታ ብቓሉ ክንኣምኖ ኣሎና። ብቓሉ ምንባር ኣብ ጸልማትን ሞትን ዘላ ዓለም ብርሃኑ ክንከውን የበርትዓና። እዛ ዓለም እዚኣ ካብ መዓልቲ ናብ መዓልቲ ብፍርሃት ዝነብሩ ሰባት ምልእቲ እያ። ግናኸ፡
«ኣምላኽ መንፈስ ፍርሃት ዘይኮነስ፡ ናይ ሓይሊን ናይ ፍቕሪን ናይ ልቦናን መንፈስ እዩ ዝሃበና።» (2 ጢሞቴዎስ 1:7)
እቲ ኣረጊት ሃዋርያ ዮሃንስ እውን ከምዚ ብምባል የዘኻኽረና፡
«ኣብ ፍቕሪ ፍርሃት የልቦን፡ ፍጹም ፍቕሪ ግና ንፍርሃት የውጽኦ፡ ፍርሃት ስቓይ ስለ ዘለዎ። እቲ ዚፈርህ ግና ብፍቕሪ ኣይተፈጸመን።» (1 ዮሃንስ 4:18)
መርከብ ንሎሚ
ቓል ኣምላኽ ንምብርትዓናን ንምህናጽናን ተዋሂቡና ኣሎ። ንቓሉ ንሓዝ።
