ውልቃዊ ተግሳጽ ንኣገልገልቲ ኣምላኽ ንህዝባዊ ኣገልግሎት የዳልዎም

ጸሓይ ክትዓርብ ከላ ድማ፡ ዓሚቕ ድቃስ ኣብ ኣብራም ወደቐ፡ እንሆ ድማ፡ ዓብዪ ጸልማት ፍርሂ ኣብኡ ወደቐ። ንኣብራም ከኣ በሎ፡ ዘርእኻ ኣብ ዘይናቶም ምድሪ ጋሻ ኪኸውን፡ ኬገልግልዎም፡ ኣርባዕተ ሚእቲ ዓመት ከኣ ኬሳቕይዎም ምዃኖም ብርግጽ ፍለጥ፡ ነታ ዜገልግልዋ ህዝቢ ድማ ኣነ ኽፈርዳ እየ፡ ድሕሪኡ ድማ ብብዙሕ ገንዘብ ኪወጹ እዮም . . . ጸሓይ ምስ ዓረበትን ምስ ጸልመተን ድማ፡ እንሆ፡ ሓዊ ዜትክኽ ምድጃን ኣብ መንጎ እቶም ክፋላት ዝሓለፈ ዚነድድ መብራህትን (ዘፍጥረት 15:12-14+17)።

ኩሉ ታሪኽ እስራኤል ኣብዞም ክልተ ምስልታት፡ እቲ «ምድጃ»ን እቲ «መብራህቲ»ን ተጠቓሊሉ ኣሎ። እቲ ቐዳማይ ነቶም ኣብ ስቓይን ፈተናን ዝኣተዉሉ እዋናት ታሪኾም የቕርበልና፡ ንኣብነት፡ እቲ ነዊሕ እዋን ባርነት ግብጺ፡ ንነገስታት ከነኣን ምግዛኦም፡ ምፍናው ባቢሎን፡ ሕጂ ዘለዎም ዝተበተነን ዝተዋረደን ኩነታት። ኣብ ኩሎም እዞም እዋናት እዚኦም ብሓዊ ዜትክኽ ምድጃ ሓሊፎም ከም ዘለዉ ኪሕሰብ ይከኣል እዩ። (ዘዳግም 4:20፡ 1 ነገስት 8:51፡ ኢሳይያስ 48:10 ርአ)

ድሕሪኡ፡ ኣብቲ ዚነድድ መብራህቲ፡ ኣብ ታሪኽ እስራኤል ኣብቶም የሆዋ ብጸጋ ንምድሓኖም ዝተገብረሎም ነጥብታት ኣሎና፡ ንኣብነት፡ ብኢድ ሙሴ ካብ ግብጺ ምድሓኖም፡ ብኣገልግሎት እቶም ዝተፈላለዩ ፈራዶ ካብ ትሕቲ ስልጣን ነገስታት ከነኣን ምድሓኖም፡ ብትእዛዝ ቂሮስ ካብ ባቢሎን ምምላሶም፡ ክርስቶስ ብኽብሩ ምስ ዝቕልቀል ድማ እቲ ናይ መወዳእታ ምድሓኖም።

እቲ ውርሻ ብምድጃ ኪበጽሕ ኣለዎ፡ እቲ ጸልማት ምድጃ ዝበዝሐ መጠን፡ እቲ መብራህቲ ድሕነት ኣምላኽ ዝያዳ ብሩህን ዘሐጉስን ኪኸውን እዩ። እዚ ስርዓት እዚ ንህዝቢ ኣምላኽ ብሓፈሻ ጥራይ ኣይተሓጽረን፡ ንውልቀ ሰባት እውን ብምሉኡ ይምልከት እዩ።

ኩሎም እቶም ከም ኣገልገልቲ ናብ ልዑል ቦታ ዝበጽሑ፡ ቅድሚ እቲ መብራህቲ ምጥዓሞም ነቲ ምድጃ ተጻዊሮም እዮም። «ዓብዪ ጸልማት ፍርሂ» ኣብ መንፈስ ኣብርሃም ሓሊፉ። ያእቆብ ኣብ ቤት ላባን 21 ዓመት ብርቱዕ ሽግር ኪጻወር ነይርዎ። ዮሴፍ ምድጃ ስቓዩ ኣብ ቤት ማእሰርቲ ግብጺ ረኸበ። ሙሴ 40 ዓመት ኣብ በረኻ ኣሕለፈ። ከምኡ ድማ ኩሎም ኣገልገልቲ ኣምላኽ ኪኸውን ኣለዎም።

ቅድሚኡ «ኪፍተኑ» ኣለዎም፡ ምእንቲ «እሙናት» ኮይኖም ምስ ተረኽቡ፡ «ናብ ኣገልግሎት ኪኣትዉ»። እቲ ናይ ኣምላኽ ስርዓት፡ ብዛዕባ እቶም ዜገልግልዎ፡ ኣብዞም ቃላት ቅዱስ ጳውሎስ ተገሊጹ ኣሎ።

ሓድሽ ኣይኹን፡ ምናልባት ብትዕቢት ተለዓዒሉ፡ ናብ ፍርዲ ዲያብሎስ ከይወድቕ (1 ጢሞቴዎስ 3:6)።

ወዲ ኣምላኽ ምዃን ሓደ ነገር እዩ፡ ኣገልጋሊ ክርስቶስ ምዃን ግን ፍጹም ካልእ እዩ። ንወደይ ኣዝየ ክፈትዎ እኽእል እየ፡ እንተዀነ ግን፡ ኣብ ኣታኽልተይ ኪዓዪ እንተ ኣዘዝክዎ፡ ካብ ጽቡቕ ንላዕሊ ክፉእ ኪገብር ይኽእል እዩ። ስለምንታይ? ፍቑር ወዲ ስለ ዘይኮነ ድዩ? ኣይፋሉን፡ ግን ልምምድ ዘለዎ ኣገልጋሊ ስለ ዘይኮነ እዩ። እዚ ኩሉ ፍልልይ ይገብር። ዝምድናን ስራሕን ዝተፈላለዩ ነገራት እዮም። ካብ ደቂ ንግስቲ ሓደ እኳ ሕጂ ቀዳማይ ሚኒስተር ክትከውን ኣይትኽእልን እያ። ኩሎም ደቂ ኣምላኽ ዝገብርዎ ነገር፡ ዝስቀይዎ ነገር፡ ዝመሃርዎ ነገር የብሎምን ማለት ኣይኮነን። ብርግጽ ኣለዎም፡ እንተዀነ ግን፡ ህዝባዊ ኣገልግሎትን ውልቃዊ ተግሳጽን ኣብ መገዲ ኣምላኽ ብሓደ ዝተኣሳሰሩ እዮም ዝብል ሓሳብ ኩሉ ሳዕ ሓቂ እዩ።

እቲ ኣብ ህዝቢ ብዙሕ ዝቕልቀል ሰብ፡ ነቲ ዝተገስጸ መንፈስ፡ ነቲ ዝበሰለ ፍርዲ፡ ነቲ ዝተገዝአን ዝሞተን ኣእምሮ፡ ነቲ ዝተሰብረ ፍቓድ፡ ነቲ ዝለዘበ ድምጺ፡ እዚኦም ድማ እቲ ናይ ኣምላኽ ስውር ተግሳጽ ዝፈጠሮም ርግጽን ጽቡቕን ውጽኢት እዮም፡ የድልዮ እዩ፡ ብሓፈሻ ድማ እቶም ብዘይካ እዚኦም ዝተጠቕሱ ስነ-ምግባራዊ ብቕዓታት ዝዓበየ ቦታ ዝወስዱ፡ ፈጺሞም ወይ ድሒሮም ኪወድቁ እዮም።

ጐይታ የሱስ፡ ንድኹማት ኣገልገልትኻ ናብቲ ቅዱስ ሰብነትካን ኣብ ኢድካን ኣዝዮም ቀረባ ግበሮም።