«የሱስ ድማ፡ ‘ኣቦ፡ ዚገብርዎ ኣይፈልጡን እዮም እሞ፡ ሕደገሎም’ በለ።» (ሉቃስ 23:34) ጐይታ የሱስ ኣብ መስቀል ተሰቒሉ ኸሎ፡ እተወግኡ ኣእዳዉ ንሕሙማት ከገልግሉ ኣይከኣሉን—ብሰብኣዊ ኣዘራርባ። እግሩ፡ ብሚስማር እተወግአ፡ ወንጌል መንግስቲ ንምእዋጅ ኣብ ከተማታትን ገጠራትን ኪመላለስ ኣይከኣለን። እቶም ኩሎም ዝሃደሙ ደቀ መዛሙርቱ እውን ከምኡ ኪምህሮም ኣይከኣለን።
ኣብዚ ዘስካሕክሕ ሰዓታት እዚ ንህዝቢ በረኸት ኪኸውን ዚኽእል ዝገብሮ ነገር ኣይነበረንዶ? እወ፡ ኪጽሊ ይኽእል ነይሩ—ንሱ ድማ እዚ እዩ ዝገበረ! ኣብ መንጎ ሰማይን ምድርን ተሰቒሉ ኸሎ፡ «ምእንቲ ገበነኛታት ምልጃ» ገበረ (ኢሳይያስ 53:12)። ንነፍሲ ወከፍና ኣገዳሲ ትምህርቲ!
ኣብነት ጐይታ የሱስ ድማ፡ ብሰብኣዊ ኣዘራርባ፡ ኪድሕኑ ዘይከኣል ዝመስሉ ንዝኾኑ ሰባት ክንጽሊ የባራትዓና። ኣብዚ ኩነታት እዚ፡ ካባና መን እዩ ብእምነት ምእንቲ እዞም ቀተልቲ ዝጸለየ? ግናኸ እዚ ናይ ወዲ ኣምላኽ ጸሎት እዚ፡ ድሕሪ 50 መዓልታት ኣቢሉ 3000 ሰባት ብሓንሳእ ንምቕያር ኣይተሓባበረንዶ?
ንዝዓበየ ሓጥእ፡ ነቲ ማሕበር ኣምላኽ ክሳዕ ደም ዘሳድድ ዝነበረ፡ ንኣመንቲ ናብ ቤት ማእሰርቲ ዘእቱ ዝነበረ፡ ንደቀ መዛሙርቲ ድማ ስም ጐይታኦም ኪጸርፉ ዘገድድ ዝነበረ፡ መን እዩ ዝጸለየ? እስጢፋኖስ! ኣምላኽ እዚ ከመይ ገይሩ መለሰ? ነቲ ቅድሚ ሕጂ ጸራፊ፡ ኣሳዳዲ፡ ዕቡይ ተቓዋሚ ዝነበረ (1 ጢሞቴዎስ 1:13 ተመልከት)፡ ኣገልጋሊ ወንጌልን ማሕበር ኣምላኽን ገበሮ (ቈሎሴ 1:23, 25 ተመልከት)። ጸጋ ኣምላኽ ነዚ ሰብ እዚ፡ 14 መልእኽታት ሓድሽ ኪዳን ኪጽሕፍን ካብ ኩሎም ካልኦት ሃዋርያት ዝበዝሕ ኪዓይን ተጠቐመሉ (1 ቈረንቶስ 15:10 ተመልከት)!
ሕጂ ብሕማም ወይ ብኻልእ ኩነታት፡ ንጐይታ ኽትገብሮ ዝደለኻዮ ፍሉይ ዕዮ ኽትገብር ዘይትኽእል ዲኻ? ምናልባት ኣምላኽ ንኣኻ ናብ ሓደ ሸነኽ ወሲዱካ ይኸውን፡ ምእንቲ ኣብቲ ኣገዳሲ ኣገልግሎት ምልጃ ዝያዳ ግዜ ኽትጽሊ።
ኣብ መንጎ እቶም እትፈልጦም ሰባት፡ ኪቕየሩ ፍጹም ተስፋ ዘይብሎም ዝመስሉ፡ ምጽላይ ኣይትሕደግ። «ምስ ሰብ ዘይከኣል እዩ፡ ምስ ኣምላኽ ግና ኣይኮነን። ምኽንያቱ ምስ ኣምላኽ ኩሉ ይከኣል እዩ» (ማርቆስ 10:27)!
