«መስዋእቲ ምስጋና ኸቕርበልካ እየ፡ ስም እግዚኣብሔርውን ክጽውዕ እየ።»
መዝሙር 116:17
መስዋእቲ ምስጋና (ዘሌዋውያን 7) ብምርዋሕ ደም መስዋእቲ ሰላም ኪቐርብ ነበሮ (ቍ. 14)። እዚ ኸኣ ኩሉ ምስጋናና ብፈሰሰ ደም የሱስ ክርስቶስ እተሰረተ ምዃኑ የርኢ። መንፈስ ምስጋናይ ይከኣል እዩ፡ ምኽንያቱ ሓጢኣተይ ድሮ ተሓዲጉ እዩ እሞ፡ ናይ ነፍሰይ ዘለኣለማዊ ዕድል ድማ ብደም ተረጋጊጹ እዩ። ምስ ጳውሎስ ከምዚ ኽብል እኽእል እየ፡ «ንኣምላኽ ግና ብዛዕባ እቲ ዘይነገር ስጦታኡ ምስጋና ይኹኖ» (2 ቈረንቶስ 9:15)። በቲ ስጦታ—የሱስ ክርስቶስ—ምኽንያት፡ ንዝኾነ ይኹን ዝመጸኒ ነገር ኽምስግን እኽእል እየ። ስጦታ ኣምላኽ ናይ ምድሓን፡ ንዝኾነ ይኹን ኣብ ህይወተይ ዝፈቕዶ ነገር ኽጸውርን ክምስግንን የኽእለኒ።
ስጋ እቲ ምስ መስዋእቲ ምስጋና ዝቐረበ እንስሳ ኺብላዕ ነበሮ (ቍ. 15)። ገለ መስዋእትታት ብምሉኡ ንኣምላኽ ከም ዝተዋህበ መስዋእቲ ኺቃጸል ነበሮ። እዚ መስዋእቲ ግና ኺብላዕ ነበሮ። እዚ ኸኣ ካህን፡ ህዝቢ፡ ከምኡውን ኣምላኽ ብሓደ ኣብ ሓደ ምግቢ ናይ ቡሩኽ ሕብረት ኪካፈሉ ኣኽኢሉ እዩ። መስዋእቲ ምስጋና ንህዝቢ ኣምላኽ ንሓድሕዶም ከምኡውን ንኣምላኾም የቐርቦም። መዝሙራዊ ከምዚ ይብል፡ «ኣብ ዓባይ ማሕበር ከመስግነካ እየ፤ ኣብ ብዙሕ ህዝቢ ኸኣ ከውድሰካ እየ» (መዝሙር 35:18)። ልቢ ምስጋና ናብ ዝበለጸ ሕብረት ምስ ኣምላኽን ምስ ህዝቡን የቐርበና።
እቲ መስዋእቲ ኣብታ ዝቐረበላ መዓልቲ ኺብላዕ ነበሮ። ክሳዕ ንግሆ ዝተርፍ ነገር ኣይነበረን (ቍ. 15)። እዚ ኸኣ ናይ ትማሊ ልቢ ምስጋና ንሎሚ ከም ዘይበቅዕ የምህረና። ነፍሲ ወከፍ መዓልቲ ናይ ገዛእ ርእሳ መግለጺታት ምስጋና ኺህልዋ ኣለወን፡ እንተ ዘይኮይኑ እቲ ናይዛ መዓልቲ ዕድል ንዘለኣለም ኪጠፍእ እዩ። ክንምስግን ኣለና ሎሚ ኸሎ። ትማሊ ሓሊፉ እዩ፡ ንጽባሕ ድማ ተስፋ የብልናን። በዚ ምኽንያት እዚ እዩ መዝሙራዊ ከምዚ ዝበለ፡ «እዛ እግዚኣብሔር ዝገበራ መዓልቲ እያ፤ ብእኣ ባህ ኪብለናን ኪንሕጐስን ኢና» (መዝሙር 118:24)።
መርከብ ንሎሚ፡
ልቢ ምስጋና መዓልታዊ ኺሕደስ ኣለዎ።
