ሕቶ:
ጐይታ ብድሌቱ ርእሱ ምሃቡ እንታይ ኣገዳስነት ኣለዎ?
መልሲ:
ጐይታ የሱስ ኣምላኽ እዩ – ወዲ ኣምላኽ – ምስ ኣምላኽ ኣቦን ኣምላኽ መንፈስ ቅዱስን ማዕረ እዩ። ንሱ እዩ ኩሉ ነገር ዝተፈጥረሉን ኩሉ ነገር ዝጸንዓሉን። ንሱ ኩሉ ዝኽእል እዩ፡ ከም ኣምላኽ ድማ ልዑል እዩ። ኣብ ምድሪ ኸሎ፡ ንፋሳትን ማዕበላትን፡ ዓሳ ባሕርን፡ ኩሉ ዓይነት ሕማማትን፡ ከምኡ እውን ንኣጋንንትን ንሞትን ይግዝኦም ነበረ።
ብድሌቱ ርእሱ ምሃቡ ምስ ፍቕሩ ዝተኣሳሰረ እዩ። ኣብ ዮሃንስ 10 ብዛዕባ ርእሱ ከም ጽቡቕ ጓሳ ተዛረበ፡ ህይወቱ ድማ ምእንቲ ኣባጊዑ ከም ዝህብ ተዛረበ። ህይወቱ ካብኡ ዝወስድ ኣይነበረን፡ ግናኸ ብድሌቱ ክህባን እንደገና ክወስዳን እዩ። ነዚ ንምግባር ሓይሊ ነበሮ፡ ነቲ ሓይሊ ድማ ክጥቀመሉ እዩ። ኣብ ምድሪ ከም ሰብ ኸሎ፡ ዝገበሮ ኩሉ ብምጥባቕ ፍቓድ ኣቦ እዩ ዝገበሮ። እዚ ንምርድእና ዝኸብድ እዩ፡ ግናኸ ካብ ልብና ኣምልኾን ውዳሰን የውጽእ።
ምኽንያቱ ፍቕሪ ነበረ – ፍቕሪ ንኣቦን ፍቕሪ ንዓናን። ገላትያ 2:20 ኣዝዩ ብሕታዊ እዩ። ነፍስ ወከፍና ነዚ ፍቕዲ እዚ ብዓብዪ ምስጋና ኣብ ርእስና ክንጥቀመሉ ንኽእል ኢና፡ ወዲ ኣምላኽ፡ ንሱ ኣፍቂሩኒ ንርእሱ ድማ ምእንታይ ሃበ (ገላትያ 2:20)። ኤፌሶን 5:2 ሓደ ስጉምቲ ንላዕሊ ይኸይድ፡ ክርስቶስ እውን ኣፍቂሩና ንርእሱ ድማ ምእንታና ሃበ (ኤፌሶን 5:2)። ብሓባር። ፍቕዲ 25 ናይቲ ሓደ ምዕራፍ ኣዝዩ ፍሉይ እዩ፡ ክርስቶስ እውን ንቤተ ክርስቲያን ኣፍቂሩ ንርእሱ ድማ ምእንታኣ ሃበ (ኤፌሶን 5:25)። ርእሱ ምሃቡ ካብ ዝኾነ ይኹን ካልእ ከምኡ ዝበለ ተግባር ንላዕሊ ዝኾነ ተግባር ፍቕሪ ነበረ። ምኽንያቱ ቅዱስን ንጹህን ነበረ፡ ንኣምላኽ ድማ ክብሪ ኣምጸአ፡ ብምሉኡ ድማ ኣሐጐሶ።
ብድሌቱ ርእሱ ምሃቡ ካብ ካልእ መዳይ ክንርእዮ ኸሎና፡ መክብብ 8:8 ንሕና ደቂ ሰባት ነፍስና ንምውጋድ ተፈጥሮኣዊ ወይ ውሽጣዊ ሓይሊ ከም ዘይብልና ይነግረና። ኣብ ዮሃንስ 19:28-30 ንየሱስ ንርኢ፡ ብዛዕባ መስቀሉ ዝተነግረ ኩሉ ከም ዝተፈጸመ እናፈለጦ፡ ጽምኡ ገለጸ። እቲ ሓምጺ – እቲ መራር ወይኒ ናይ ወተሃደራት ሮሜ – ምስ ተዋህቦ፡ “ተፈጺሙ” በለ። ርእሱ ኣድኒቑ ነፍሱ ሃበ (ብሓቂ፡ “ኣውገደ”)። ሰብ፡ ንወዲ ኣምላኽ ንምቕታል ፈጺሙ ዘይከኣል እኳ እንተኾነ፡ ንየሱስ ብምስቓሉ ግና በዳሊ እዩ፡ ህይወቱ ብነጻ ንዝሃበና ንምቕታል ድማ ኣብ ቅድሚ ኣምላኽ ሓላፍነት ኣለዎ።
