ግናኸ ብሓቂ እብለኩም ኣሎኹ፡ ካብቶም ኣብዚ ደው ዘለዉ ገሊኦም፡ ንመንግስቲ ኣምላኽ ክሳዕ ዚርእዩ ሞት ኣይኪጥዕሙን እዮም። ድሕሪ እዚ ቓላት እዚ፡ ድሕሪ ሾሞንተ መዓልቲ ዚኸውን፡ ንጴጥሮስን ዮሃንስን ያእቆብን ሒዙ ኺጽሊ ናብ ከረን ደየበ። ኪጽሊ ኸሎ ድማ ቅርጺ ገጹ ተቐየረ፡ ክዳኑ ኸኣ ጻዕዳን ብሩህን ኰነ።» (ሉቃስ 9፡27-29)
ጐይታ ኺጽሊ ናብ ከረን ከም ዝደየበ ብዙሕ ግዜ ነንብብ (ሉቃስ 6፡12፤ ሉቃስ 22፡39-41፤ ማቴዎስ 14፡23 ተመልከት)። እቲ ከረን ብሓደ ወገን ካብ ሰባት ምፍላይ፡ ብኻልእ ወገን ድማ ናብ ኣምላኽ ምቕራብ የርኢ። ዝኾነ ሰብ ከረን ዚድይብ፡ ንሓደ እዋን ንሸለልይ ገዲፉ በይኑ ኪኸውንን ዝሰፍሐ ኣረኣእያ ኺህልዎን እዩ። ካብቲ ከረን፡ ብምሳሌያዊ ኣዘራርባ፡ ገለ ነገራት ብዓይኒ ኣምላኽ ዝያዳ ኺርአ ይከኣል እዩ (ዘዳግም 34፡1 ተመልከት)።
እቲ የሱስ ዝኸዶ መገዲ ብመከራ ኣቢሉ ናብ ክብሪ ኸይዱ። ኣብዚ መገዲ እዚ ንሱ፡ ከም ዝምርኰስ ሰብ፡ ምትብባዕ እውን የድልዮ ነበረ። መዝሙር 110 ቁጽሪ 7 ብትንቢት ብዛዕባኡ፡ «ካብ ሩባ ኣብ መገዲ ኺሰቲ እዩ፡ ስለዚ ኸኣ ርእሱ ኬልዕል እዩ» ይብል። እቲ ኣብ ደብረ ትንሳኤ ዝነበረ ፍጻሜ ብርግጽ ካብቲ ናይ ኣምላኽ ሩባ ምስታይ ነበረ፡ እዚ ድማ ንዓና እውን ኩሉ ግዜ ብማይ ዝመልአ እዩ (መዝሙር 65፡9 ተመልከት)። ኣብኡ ምስ ሙሴን ኤልያስን ብዛዕባ እቲ ኣብ የሩሳሌም ኪፍጽሞ ዝነበሮ ሞቱ ተዛረበ። ኣብቲ እዋን እቲ ኣዒንቲ ሰማይ ኣብኡ ከም ዝነበራ ምፍላጥ ክንደይ ዝበለ ምትብባዕ እዩ። ድሕሪ ሓጺር ግዜ ድማ፡ «መዓልታት ምውሳዱ ምስ ተፈጸመ ድማ፡ ገጹ ናብ የሩሳሌም ኪኸይድ ብትብዓት ገበሮ» (ሉቃስስ 9፡51) ተባሂሉ ኣሎ።
እቲ «መራሒን ፈጻምን እምነት» ንዝመጽእ ክብሩ ኩሉ ግዜ ኣብ ቅድሚ ኣዒንቲ ልቡ ነበሮ። እዚ ተስፋ እዚ ኣብ ምድሪ ንምርሓቕ፡ ንስደት፡ ንመከራን ኪጸንዕ ሓጊዝዎ እዩ፡ ምኽንያቱ፡ «> ነቲ ኣብ ቅድሚኡ ዝነበረ ሓጐስ ኢሉ መስቀል ዝጸረ፡ ንሕፍረት ድማ ዝንዓቐ» (እብራውያን 12፡2) ኢልና ነንብብ።
ምስ ደቀ መዛሙርቱ እውን ከምኡ ኪኸውን ኣለዎ። ጐይታ ንዋጋ ደቀ መዛሙርቱ ምስ ኣቕረበሎም፡ ኣብቲ ከረን ኣምላኽ ንዝመጽእ ፍጻሜታት ግሩም ትንቢታዊ ራእይ ሃቦም። ድሕሪ ዓመታት፡ ጴጥሮስ ነዚ ዘኪሩ፡ ነቶም ኣብ ቅድሚኡ ዝነበሩ ናብ ስቅያቱ ዚወስዱዎ ናይ መወዳእታ ስጉምትታት ትብዓት ወሰደ (2 ጴጥሮስ 1፡14-19 ተመልከት)። እቲ ሓደ ሃዋርያ ድማ ከምዚ ይጽሕፍ፡ «> እቲ ትንቢታዊ ቓል ድማ ዝያዳ ርግጽ ኰይኑልና ኣሎ፡ ንእኡ ድማ (ከም ኣብ ጸልማት ቦታ ዚበርህ ፋኑስ) ክሳዕ መዓልቲ ዚበርህን ኮኾብ ንግሆ ኣብ ልብኹም ዚወጽእን እንተ ኣስተብሃልኩምሉ ጽቡቕ ትገብሩ» (2 ጴጥሮስ 1፡19)።
ሕጂ ኣብዛ ዝተረግመት ዓለም ንመከራ ንቃልዕ፡ ንዝተነጽገ ክርስቶስ እናተኸተልና። ግናኸ ብቕልጡፍ – ምናልባት እውን ሎሚ – ናብ ቤት ኣቦኡ፡ ናብ ዘለኣለማዊ መሕደሪ ኣምላኽ ኪወስደና እንደገና ኪመጽእ እዩ። ንሕና እውን ነታ ንሱ፡ ኣብዚ ዝተነጽገን ዝተሰቕለን፡ ነዚ ፍጥረት እዚ ብሓይልን ክብሪን ዚገዝኣሉ መዓልቲ ንጽበ ኣሎና – እሞ ምስና! ኣምላኽ ብዛዕባ እቲ ኣብ ቓሉ ዚነግረና ዝመጽእ ፍጻሜታት ክንሓስብ ይደልየና። ኣብ መወዳእታ መገዲ ዚጽበየና ዘሎ ነገራት ክንፈልጥ ይደልየና። እዚ ትጽቢት እዚ ንነፍሲ ወከፍ መዓልቲ ዓወት ንምዃን የባራብረና!
ብዙሕ ግዜ ትጽቢት ናይቲ ዚቕጽል ዕረፍቲ እንደገና ንርእስና ኸነልዕልን ነቲ ዝተረፈ ስራሕ ብዝከኣለና መጠን ጽቡቕ ጌርና ኽንሰርሕን ይሕግዘና። እዚ ብዛዕባ ዘለኣለማዊ ህይወት እውን ሓቂ ድዩ? እቲ ብቕልጡፍ ንዘለኣለም ምስ ክርስቶስ ከም እትኸውንን ኣምላኽ ድማ ኩሉ ንብዓት ካብ ኣዒንትኻ ኸም ዚድምስስን ዘሎ ተስፋ፡ ኣብ ህይወትካ ሎሚ ክሳዕ ክንደይ ጽልዋ ኣለዎ? ንሓጺር ደቒቕ ን«ሸለልይ» ገዲፍካ ናብ «ከረን» ከይድካ ምስ ኣምላኽ ብዛዕባ ዕላማታቱን ድሌታቱን እትዛረበሉ እዋናት ኣሎካዶ?
