ሕቶ፦ ክርስትያናት ንክርስቶስ «የሱስ» ዝብልዎ ስለምንታይ እዮም?
መልሲ፦ ብሓቂ፡ ክርስትያናት ንዕኡ «የሱስ» ዝበልዎ ንሳቶም ኣይኰኑን። ኣምላኽ መልኣኽ ገብርኤል ናብ ማርያም ለኣኸ፡ ንሳ ድማ «ስሙ የሱስ ክትሰምዮ ኢኺ» (ሉቃስ 1:31 NKJV) በላ። ገብርኤል ድማ ንዮሴፍ፡ «ስሙ የሱስ ክትሰምዮ ኢኻ፡ ንሱ ንህዝቡ ኻብ ሓጢኣቶም ኬድሕኖም እዩ እሞ» (ማቴዎስ 1:21) በሎ።
እቲ «የሱስ» ዝብል ስም ብቛንቋ እብራይስጢ ኻብ ክልተ ቓላት ዝተወስደ እዩ፡ ትርጉሙ ድማ «እቲ ዜድሕን ጐይታ» ማለት እዩ። የሱስ እቲ ዜድሕን ጐይታ እዩ፡ ምኽንያቱ ክርስቶስ ንሰብ ንምድሓን ናብዛ ዓለም እዚኣ መጸ። መጽሓፍ ቅዱስ ኣምላኽ ንዕኡ ለኣኾ፡ ዓለም ብእኡ ምእንቲ ኽትድሕን (ዮሃንስ 3:16-17) ይብል። ብኻልእ ከም ዘድሕን እውን ይነግረና (ግብሪ ሃዋርያት 4:12)።
እቲ ብዛዕባ ልደቱ ዝነበረ ትንቢት ብኢሳይያስ እውን ተጠቒሱ ነበረ፡ ንሱ ድማ፡ «ድንግል ክትጸንስን ወዲ ኽትወልድን እያ፡ ስሙ ድማ ኣማኑኤል ክትሰምዮ እያ» (ኢሳይያስ 7:14) በለ። እቲ ስም ብሓቂ «ኣምላኽ ምሳና» (ማቴዎስ 1:23) ማለት እዩ። ክርስቶስ ናብዛ ምድሪ ምስ መጸ፡ ኣምላኽ ናባና መጸ። ብዚ መገዲ እዚ ንኣምላኽ ዝያዳ ፈለጥና፡ ምኽንያቱ ኣምላኽ «ብስጋ ተገሊጹ» ነበረ (1 ጢሞቴዎስ 3:16)።
ሓደ ኻብ ኣርእስቲ ጐይታ የሱስ ክርስቶስ «ቓል ኣምላኽ» (ዮሃንስ 1:1) ምዃኑ ብሓፈሻ ዝፍለጥ እዩ። እቲ ቓል ሓሳብን ፍልጠትን ይገልጽ፡ ክርስቶስ እቲ ናይ ኣምላኽ ሓሳብን ምሉእ ፍልጠትን ዝገልጽ እዩ። መጽሓፍ ቅዱስ፡ «እቲ ቓል ስጋ ዀነ፡ ኣብ ማእከልና ድማ ሓደረ፡ ክብሩ ድማ ረኤና፡ ከም ክብሪ ሓደ ወዲ ኻብ ኣቦኡ፡ ምሉእ ጸጋን ሓቅን» (ቁ.14) ይብል።
ስለዚ፡ ካብ ዝዀነ ይኹን ሰብ ቅድሚኡ፡ ኣምላኽ ንዕኡ «የሱስ» ኢሉ ጸውዖ፡ ምኽንያቱ ንሱ ጐይታን መድሓኒን – እቲ እንኮ መድሓኒ – እዩ።
መልሲ ተዋሂቡ
