እንታይ ዝኸውን ዕላማ ንነፍስና! “ግናኸ እዚ ሰብኣይ እዚ!” እዚ ሰብኣይ እዚ፡ ጐይታ የሱስ፡ ምስ ኵሉ ኻልእ ቄስ “ኵሉ መዓልቲ ዚቐውም፡ ነቲ ሓጢኣት ኬርሕቕ ዘይከኣል ሓደ ዓይነት መስዋእቲ ኸኣ ደጋጊሙ ዜቕርብ” (እብ. 10:11) ይጻረር። እቲ ጸሓፊ መጽሓፍ እብራውያን ነዚ ሰብኣይ እዚ ኣብዛ መጽሓፍ እዚኣ ኵሉ ሳዕ ኣብ ቅድሜና ኣንቢርዎ ኣሎ፤ ኣብዚ ፍቕዲ እዚ ድማ ኣብቲ እዚ ሰብኣይ እዚ ኣብ መስቀል ዝፈጸሞ ስራሕ ንምኩር ኢና።
ኣብ እብራውያን 9:28 ከምዚ ንብብ፡ “ከምኡ ድማ ክርስቶስ ንሓጢኣት ብዙሓት ኪጸውር ሓንሳእ ተሰውኤ። ነቶም ብትዕግስቲ ዚጽበይዎ ድማ ካብ ሓጢኣት ወጻኢ ንምድሓን ካልኣይ ግዜ ኪርአ እዩ።”
እዚ ሰብኣይ እዚ ኣብ ታሪኽ ክህነት ሌዋውያን ዝኾነ ይኹን ካልእ ቄስ ኪፍጽሞ ዘይከኣለ ነገር ፈጺሙ፡ ንስራሕ ወዲኡ። ንሓጢኣት እቲ ናይ መወዳእታን ዝዓበየን መስዋእቲ፡ ንርእሱ መስዋእቲ ገይሩ። ንርእሱ ምስ ኣቕረበ፡ ድሕሪኡ ኪቕመጥ ከኣለ፤ ስርሑ ተወዲኡ! ንስራሕ ምስ ወድአ፡ በዚ ድማ ኣምላኽ ረኺቡ፡ ኣቦ ድማ ንእኡ፡ “ክሳዕ ንጸላእትኻ መርገጽ እግርኻ ዝገብሮም፡ ኣብ የማነይ ተቐመጥ” (መዝ. 110:1) ኢልዎ። ንሱ ዓወት ረኺቡ ሕጂ ድማ ልዕል ኢሉ! ብሰንኪ ዓወቱ፡ እቶም ንምድሓን ናብኡ ዚምለሱ ንዘለኣለም ፍጹማት ይኾኑ። ንሕና ኣብኡ ፍጹማት ኢና (ቈሎ. 2:10)።
ኣብ ቅድሚ ኣምላኽ ፍጹም ቦታ ኸም ዘሎና ከመይ ንፈልጥ? “ግናኸ መንፈስ ቅዱስ እውን ንኣና ይመስክር … ‘ንሓጢኣቶምን ንዓመጻቶምን ድማ ደጊም ኣይዝክሮምን።’ ሕጂ ድማ እዚኦም ሕድገት ኣብ ዘለዎም፡ ደጊም ንሓጢኣት መስዋእቲ የልቦን” (እብ. 10:15–18)።
