ብመንፈስ ቅዱስ፡ ይሁዳ ንእምነት ክንቃለስ ይምዕደና። ሓድሓደ ግዜ እዚ ፍቕዲ እዚ ንክርስትያናት ንዝያዳ ፍልጠት ናይቲ እንኣምኖን ስለምንታይ ከም እንኣምኖን ንምጽዋዕ ይውዕል። እዚ ብሓቂ ኣገዳሲ እዩ፡ ግናኸ መልእኽቲ ይሁዳ ብዛዕባ ፍልጠት ካብ ምዃኑ ንላዕሊ ብዛዕባ እግዚኣብሔራዊ ህይወት እዩ። ገለ ሓሰውቲ ናብ ክርስትያናዊ ኣኼባታት ሰሊቖም፡ ጸጋ ኣምላኽ ንዝመረጽዎ ዓይነት ህይወት ከም ፍቓድ ይጥቀሙሉ ነበሩ (ይሁዳ 4)። ንሽዱሽተ መወከሲታት ይሁዳ ብዛዕባ «እዞም» ሰባት ብምስዓብ፡ ባህርያቶም ንመሃርን መጠንቀቕታ ድማ ንቕበልን።
እዞም ሕልምተኛታት ስልጣን ኪቕበሉ ይኣብዩ (ፍ. 8–9)። እዞም ሰባት ከም ዘይርዱኣት እንስሳታት፡ ኣካላቶም ዚነግሮም ዅሉ ብምግባር ንርእሶም የበላሽዉ (ፍ. 10–11)። እዞም ሰባት ንባህታ ክርስትያናዊ ሕብረት ዜበላሽዉ ርኽሰታት እዮም (ፍ. 12–13)። እዞም ዘይእግዚኣብሔራውያን ሰባት ከም ዘይእግዚኣብሔራዊ ባህርያቶም ይገብሩ (ፍ. 14–15)። እዞም ሰባት ብቕሬታ ወይ ብምምስጋን ይዛረቡ፡ እቲ ዝበለጸ ረብሓ ዚህቦም ይመርጹ (ፍ. 16–18)። እዞም ሰባት ድማ ስጋውያን፡ «ነፍሳውያን» ሰባት እዮም፡ ብስምዒታትን ባህርያዊ ምትዕብባስን ዚድፍኡ (ፍ. 19)።
ንእዞም ሓሰውትን ንሓሶት መንፈሳዊነቶምን ንምርኣይ ንቑሓት ክንከውን ኣሎና። ኣብ መንጎ ህዝቢ ኣምላኽ ዝርአ ዝመሳሰል ባህርይ እውን ኪእረም ኣለዎ። እቶም ንሓዋርያቶም ኪግዝኡ ዚኣብዩ፡ ኣብ ኣገልግሎቶም በረኸት ዘየምጽኡ፡ ኣብ ዙርያኦም ንኣሽቱ ጉጅለታት ዚፈጥሩ፡ ወይ ከኣ ከም ድሌቶምን ስምዒቶምን ዚነብሩ ሓቀኛታት ምእመናን፡ ካልኦት ከይረኽሱ ቕድሚኡ ኺእረሙ ኣለዎም።
ምንም እኳ እዚ ጽኑዕ ቃላት እንተሃለወ፡ ይሁዳ ንምእመናን ክልተ ዘተባብዕ መልእኽትታት የጕልሕ። ቀዳማይ፡ ብዛዕባ እዞም ጸገም ፈጠርቲ ከም ዝተጠንቀቕና ምፍላጥና ጥራይ ዘይንናወጽ ማለት እዩ (ፍ. 17)። ካልኣይ፡ ኣብ ልዕሊ እቲ ኣዝዩ ቅዱስ እምነትና ንርእስና ኽንሃንጽ ንኽእል ኢና፤ ክንዕወት የብልናን (ፍ. 20)። ኣብ ክልቲኡ እዋናት፡ «ፍቑራት» ተባሂልና ኢና ዚጽዋዕ። ኣብ ከባቢ መለኮታዊ ፍቕሪ፡ ንእምነት ንቃለስ።
