2 ንዅሎም ህዝቢ እስራኤል፥ ንዓበይቶምን ነሕሉቖምን ንፈራዶኦምን ንሹመኛታቶምን ፀዊዑ፥ ከምዙይ በሎም፦ “ኣነ ኣሪገ እየ፤ ብዕድመውን ሸምጊለ እየ፤ 3 እግዚኣብሄር ኣምላኽኩም ምእንታኻትኩም ተዋጊኡልኩም እዩ፤ ኣብዞም ኵሎም ኣህዛብ እዚኣቶም ከዓ ምእንታኻትኩም ዝገበሮ ባዕልኻትኩም ርኢኹም ኣለኹም። 4 ረአዩ! ንምድሪ እዞም ተሪፎም ዘለዉ ኣህዛብ እዚኣቶምን ንምድሪ እዞም ዘጥፋእኽዎም ኵሎም ኣህዛብን ካብ ዮርዳኖስ ክሳዕ እቲ ዓብዪ ባሕሪ ብወገን ምዕራብ ፀሓይ፥ ንነገዳትኩም ርስቲ ብዕፃ ኸፈልኩልኩም። 5 እግዚኣብሄር ኣምላኽኩም ድማ ኻብ ቅድሜኹም ክሰጎም፥ ካብ ቅድሜኹም ከዓ ኸርሕቖም እዩ፤ ከምቲ እግዚኣብሄር ኣምላኽኩም ዝተዛረበኩም ድማ፥ ምድሮም ክትወርሱ ኢኹም።
6 “ነቲ ዅሉ ኣብ መፅሓፍ ሕጊ ሙሴ ዝተፅሓፈ ኽትሕልውዎን ክትገብርዎን፥ ካብኡ ኸዓ ንየማን ኮነ ንፀጋም ከይትብሉ፥ ፅንዑ። 7 ምስዞም ዝተረፉ እሞ ምሳኻትኩም ዘለዉ ኣህዛብ እዚኣቶም ኣይትተሓወሱ፤ ስም ኣማልኽቶም ኣይትፀውዑ፤ ብኣማልኽቶም ኣይትምሓሉ፤ ንኣማልኽቶም ኣይተምልኽዎም፤ ኣይትስገዱሎምውን። 8 ከምቲ ኽሳዕ ሎሚ ዝገበርኩምዎ ደኣ ኣብ እግዚኣብሄር ኣምላኽኩም ፅንዑ።
9 “እግዚኣብሄር ነቶም ዓበይትን ሓያላትን ዝኾኑ ኣህዛብ ካብ ቅድሜኹም ስለ ዝሰጐጎም ክሳዕ እዛ መዓልቲ እዚኣ ሓደ እኳ ኣብ ቅድሜኹም ደው ዝበለ የለን። 10 እግዚኣብሄር ኣምላኽኩም ከምቲ ዝተዛረበኩም፥ ንሱ እዩ ዝዋግአልኩም እሞ፥ ካባኻትኩም ሓደ ሰብ ንሽሕ ክሰጎም እዩ። 11 ስለዙይ ንእግዚኣብሄር ኣምላኽኩም ክተፍቅርዎ ንባዕልኻትኩም ሓልዉ።
12 “እንተ ኸሓድኩም እሞ ምስ እዞም ምሳኻትኩም ዝተረፉ ኣህዛብ እንተ ተሓወስኩም፥ ምስኣቶም ድማ እንተ ተዋሰብኩም፥ ከምኡውን ብመውስቦ ምስኣቶም እንተ ተሓዋወስኩም፥ 13 ካብዛ እግዚኣብሄር ኣምላኽኩም ዝሃበኩም ፅብቕቲ ምድሪ ኽሳዕ እትፈልሱ፥ ንኣኻትኩም መሐንኰልን መፃወድያን፥ ንእንግዳዕኹም መግረፊ፥ ነዒንትኹም ከዓ እሾዅ ክኾኑኹም እዮም እምበር፥ እግዚኣብሄር ኣምላኽኩም ነዞም ኣህዛብ እዚኣቶም ደጊም ካብ ቅድሜኹም ከም ዘየውፅኦም፥ ብርግፅ ፍለጡ።
14 “እንሆ ኸዓ፥ ኣነ ሎሚ መንገዲ ኵላ ምድሪ ኣኸይድ ኣለኹ እሞ፥ ካብቲ እግዚኣብሄር ኣምላኽኩም ብዛዕባኻትኩም ዝተዛረቦ ዅሉ ሰናይ ነገር፥ ሓደ ነገር እኳ ኸም ዘየጕደለ፥ ብምሉእ ልብኹምን ብምሉእ ነፍስኹምን ፍለጡ። ኵሉ ተፈፀመ እምበር፥ ካብኡስ ሓደ ነገር እኳ እንተይተፈፀመ ዝተረፈ የለን።
ኢያሱ 23:2–14 · ትመ15
እያሱ ንምድሪ ድሕሪ ምውራርን ኣብ መንጎ ነገዳት እስራኤል ድሕሪ ምምቕቓልን ንነዊሕ ዓመታት ነበረ። ኣብ መወዳእታ ህይወቱ ንእስራኤል ብሓንሳእ ጸዊዑ እግዚኣብሔር ዝገበረሎም ነገር ገምጊሙ ብዛዕባ መጻኢኦም መምርሒን መጠንቀቕታን ሃቦም።
እግዚኣብሔር ብዛዕባኦም ካብ ዝበሎ ጽቡቕ ነገር ሓንቲ እኳ ኣይተረፈትን። ኩሉ ከም ዝኾነ ኣዘኻኸሮም። ልክዕ ከምቲ ኣምላኽ ንኹሉ ጽቡቕ ተስፋታቱ ብእምነት ዝሓለወ፣ ከምኡ ድማ ካብኡ ናብ ኣማልኽቲ እቶም ኣብ ከባቢኦም ዝነበሩ ህዝብታት እንተተመልሱ፣ ብዝዛረቦ ኩሉ ክፉእ ከምጽኣሎም እዩ።
ብመጽሓፍ እያሱ ምሉእ፣ ኣብ ቃሉ ዘሎ ኩሉ ኣምላኽ ዝነግረና ምሕላውን ምግባርን ክንዝክር ንግበር። ንእስራኤል፣ ቃሉ “መጽሓፍ ሕጊ ሙሴ” ነበረ። ሎሚ፣ ንሕና ምእመናን ምሉእ ቃል ኣምላኽ፣ መጽሓፍ ቅዱስ ኣለና። ደጋጊሙ፣ ኣምላኽ ኣብ ቃሉ እተጻሕፈ ኩሉ ኣገዳሲ ምዃኑ የዘኻኽረና፤ ናብ የማን ወይ ናብ ጸጋም ክንዘምብል የብልናን።
ምኽንያት ምእዛዝና ንቃል ኣምላኽ ፍቕርና ንእኡን ንዝገበረልና ነገር ዘሎና ኣድናቖትን ክኸውን ኣለዎ። እስራኤል ንምምስጋን ምኽንያት እንተነበሮም፣ ንሕና ሎሚ ዝበለጸ ኣለና። ኣምላኽ ናብ ምድሪ ተስፋ ኣእትይዎም ንጸላእቶም ክስዕሩ ሓጊዝዎም። ኣብ ክርስቶስን ብእኡን ዘሎና ነገር እቲ ዝዓበየ ኣይኮነንዶ፧ ዘለኣለማዊ ህይወት፣ ምስ ኣምላኽ ከም ኣቦ ዝኾነ ርክብ፣ ኣብ ሰማያት ኣብ ክርስቶስ የሱስ ዘሎ ኩሉ መንፈሳዊ በረኸት!።
