ሕቶ:
ጸሎትና ብስም የሱስ፣ ብስም እግዚአብሔር፣ ብስም የሱስ ናዝራዊ፣ ወይስ ብኸመይ ክንዛዝም ኣሎና?
መልሲ:
ከም ብዙሓት ኣረማውያን ሃይማኖታት ዘይኮነስ፣ ቃል ኣምላኽ ክንጽሊ ከለና እንጥቀመሉ ዝተወሰነ ቀመር ኣይሃበናን። ብሓቂ ድማ፣ ኣብ ማቴዎስ 6:7 ጐይታ የሱስ ንሰዓብቱ ክጽልዩ ከለዉ ከንቱ ምድግጋም ከይጥቀሙ ብንጹር ነገሮም። ብዙሓት ክርስትያናት ነቲ ብንጹር ዝገለጾ ወይ ይርስዕዎ ወይ ድማ ፈጺሞም ኣይተረድእዎን፣ ከመይሲ ንዕኡ ኣብ ማቴዎስ 6:9-13 ንጸሎትና ዝሃቦ መምርሒ ወይ ሞዴል ቃል ብቓሉ ደጋጊሞም «ጸሎት ጐይታ» ይብልዎ። እዚ ንጸሎትና ዝኸውን ሞዴል ድማ ብቓላት «ብሽም የሱስ» ወይ ካብቶም ኣብ ላዕሊ ተጠቒሶም ዘለዉ ካልኦት ኣበሃህላታት ከም ዘይዛዘም ኣስተብሂልኩምዶ ትፈልጡ?
ኣብ ፈለማ ኣገልግሎት የሱስ፣ ደቀ መዛሙርቱ ጸገም ወይ ድሌት እንተ ነይርዎም፣ ብቐጥታ ናብኡ ይመጹ ነበሩ። ብስሙ ክጽልዩ ኣየድለዮምን ነበረ፣ ከመይሲ ብቐጥታ ናብኡ ክመጹ ይኽእሉ ነበሩ። ወንጌላት ክንበብ ከለና፣ ናብኡ ንምምጻእ ዝኸብድ ነገር ከም ዘየለ ንረክብ።
ቅድሚ ምስማሩ ብዝነበረት ምሸት ንደቀ መዛሙርቱ ከም ዝኸይድ እሞ ከምቲ ዝገብርዎ ዝነበሩ ድማ ናብኡ ክመጹ ከም ዘይክእሉ ነገሮም። እንተኾነ ግን፣ ንኣምላኽ ኣቦ ብስሙ ክዛረብዎ ከም ዝኽእሉ ኣረጋግጸሎም: «ዝኾነ ነገር ብስመይ ንኣብ እንተ ለመንኩም፣ ንሱ ኺህበኩም እዩ።» ኣቦ ከም ዝፈትዎም ነገሮም፣ ከመይሲ ንሳቶም ንዕኡ ፈትዮምዎ እሞ ካብ ኣምላኽ ከም ዝመጸ እውን ኣሚኖም ነበሩ (ዮሃንስ 16:23-27)። ቅድሚኡ በታ ምሸት እቲኣ ድማ፣ ዝኾነ ነገር ብስሙ እንተ ለመንዎ፣ ንሱ ከም ዝገብሮ ተስፋ ሃቦም (ዮሃንስ 14:13-14)።
የሱስ ኣብ ክልቲኡ እዚ ምዕራፋት እዚ፣ ደቀ መዛሙርቱ ጸሎቶም ብቓላት «ብሽም የሱስ» ወይ ብተመሳሳሊ ኣበሃህላ ከም ዝዛዝሙ ከም ዘይበለ ኣስተብህሉ። ኣብ ዝኾነ ቦታ ድማ፣ ኣብ ጸሎትና እንታይ ቃላት ክንጥቀም ከም ዘሎና ምርጫ፣ ኣዝዩ ድማ ትእዛዝ፣ ኣየመልክተን። ሰብ ንቓላት ክሰምዕ ከሎ፣ ኣምላኽ ግን ንልቢ ይርኢ (1 ሳሙኤል 16:7)። ክንጽሊ ከለና ንኣመለኻኽታ ልብና ይፈልጦ። ጸሎትና ብሓጺሩ ዝተማሃርናዮን እንድግሞ ዘለናን ስነ-ስርዓት ድዩ፣ ወይስ ልሙድ ዓይነት ምልማን? ንኣምላኽ ሓደ ነገር ከነዘኻኽሮ መሰል ከም ዘሎና ንስምዖዶ? ንኣምላኽ ነመስግኖ፣ ነወድሶ፣ ንሰግደሉ፣ ወይስ ንሓደ ሰብ ንምልምነሉ ኣሎና? ብጸሎትና እንታይ ክንፍጽም ንፍትን ኣሎና?
ኣምላኽ ንጸሎትና ስለምንታይ ክሰምዖ ኣለዎ? ንሕና ትሑታት ፍጡራት ሓመድ ንዕኡ፣ ንሉዑላዊ ፈጣሪ ዩኒቨርስ፣ ንምቕራብ እንታይ መሰል ኣሎና? ብስም ወዱ ኢና እንመጽእ። ንሱ ክሰምዖ ስለ ዝሕጐስ፣ ነዚ ስም እዚ ክንጠቅስ መሰል ኣሎና፣ እንተኾነ ግን ንልብና ስለ ዝፈልጦ፣ ከምዚ ዝበለ ምጥቃስ ብፍላይ ኣየድልዮን እዩ።
ሓደ ወተሃደር ናብ ኣቦ ናይቲ ኣብ ውግእ ዝሞተ ዓርኩ ከይዱ ከም ዝረኣዮ ይንገር። እቲ ኣቦ ሃብታም ነበረ እሞ ኣብ ዓቢ ቤት ይነብር ነበረ። እቶም ኣገልገልቲ ነቲ ዝተቐደደ ወተሃደር ከባርርዎ ድሉዋት ነበሩ፣ እንተኾነ ግን ስም ዓርኩ ምጥቃሱ ኩሉ ነገር ለወጦ። ዝተዋህቦ ድማ ዓቢ ኣቀባብላ ነበረ! ንዚ ዓርኪ ናይቲ ኣቦ ብጣዕሚ ዝፈትዎ ወዲ ዝኸውን ዝበለጸ ነገር ኣይነበረን። ኣብ ዓረፍተ ነገራቱ ድማ ንዓርኩ ኣብ ዝኾነ ቦታ ምጥቃሱ ኣይጸገመን። ኩሉ ምዝካር ወዱ ንጆሮ እዚ ኣቦ እዚ ጥዑም ነበረ።
ከምኡ ድማ ምስ ኣምላኽናን ኣቦናን እዩ። ኩሉ ምጥቃስ ናይቲ ፍቑር ወዱ ንጆሮኡ ጥዑም እዩ። ብርግጽ፣ ነቲ ክቡር ስም ምስ ዝኾነ እኩይ፣ ርኹስ ወይ ምስቲ ብሩኽ ሰብነቱ ዘይሰማማዕ ነገር ክነተሓሕዞ ኣይንኽእልን! እንተኾነ ግን፣ ስሙ ኣብ መጀመርታ፣ ማእከል ወይ መወዳእታ ጸሎትና እንጠቅስ፣ ወይ ድማ ብሓጺሩ ብዋጋ እቲ ስም ቅድሚ ኣምላኽ እንህሉ ብዘይ ምጥቃሱ – ብሓቂ ኣገዳስነት የብሉን። እቲ ስም ድማ ክንጽሊ ከለና ኩሉ ግዜ ብሓደ ኣገባብ ዝድገም ጸሎት ኣይኮነን። ኣይፋል፣ እዚ ነቲ ስም እንጥቀመሉ ኣገባብ ካብቲ ዝውክሎ ዝዓቢ ዋጋ ከም ዝህልዎ ይገብር።
ብዙሓት ክርስትያናት ልሙድ ብዝኾነ ኣገባብ ጸሎቶም ናብ ኣምላኽ ኣቦ ብስም ጐይታ የሱስ ይዛዝሙ። እዚ ጌጋ ኣይኮነን፣ ዝኾነ ቓላት እንተ ተጠቐምና። እንተኾነ ግን፣ እዚ ስም ናይ መን ምዃኑን እዚ ቅዱስ ስም እዚ እንታይ ከም ዝውክልን ንዘክር። እዚ ሓደ ጥራይ ብግቡእ እንተ ተነጊሩ ጸሎትና ከም ዝስማዕን ከም ዝፍጸምን ዘረጋግጽ ጥንታዊ ቀመር ኣይኮነን። ናብ ጐይታና የሱስ ባዕሉ ብቐጥታ ክንዛረብ ከለና ድማ፣ ነቲ ብሩኽ ናብኡ ብቐጥታ ምብጻሕ መሰል ንጥቀመሉ ኣሎና። ብስሙ ከም እንጽሊ ክንነግሮ ኣድላዪ ድዩ? ጌጋ ኣይኮነን፣ እንተኾነ ግን ብርግጽ ኣድላዪ እውን ኣይኮነን።
