“ጐይታይ፡ ክንጽሊ ምሃረና”
ክልተ ሰባት ንኻልኦት ክጽልዩሎም ሓተቱ። እቲ ቐዳማይ፡ ካብ ሕማሙ ምእንቲ ኺሓዊ፡ ሓድሽ ስራሕ ምእንቲ ኺረክብ፡ ኣብ ግዜ ብሕትናኡ ምእንቲ ኺተባብዕ፡ ከምኡ’ውን እታ ብዙሕ ዝተጓዕዘት ዝተበላሸወት ማኪናኡ ኽትክእ ሓድሽት ማኪና ኻብ ጐይታ ምእንቲ ኺረክብ፡ ኣዕሩኹ ኺጽልዩሉ ሓተተ።
እቲ ኻልኣይ ሰብኣይ ከኣ፡ እቲ ኻብ ጐይታ ዝረሓቐ ወዱ ናብ ጐይታ ምእንቲ ኺምለስ፡ ሰባት ኪጽልዩሉ ሓተተ። ንሱ ባዕሉ ኸኣ፡ ንጐረባብቱ ብዛዕባ እቲ ዘድልዮም ምድሓን ኪነግሮም ትብዓት ምእንቲ ኺረክብ፡ ከምኡ’ውን ጐይታ ብህይወቱ ምእንቲ ኺዕበን ኪኸብርን ጸሎት ደለየ።
ብቐጻሊ ናብ ኣኼባታት ጸሎት ብምኻድ፡ ከምኡ’ውን ንሕቶታት ጸሎት ብምስማዕ፡ ሓደ ሰብ ኣብ ህይወት ምእመናን እንታይ ቀዳምነት ከም ዘለዎ ኺፈልጥ ይኽእል እዩ። ብዙሓት ናይ ብሕታዊ ጸሎት ሕቶታትን ኣብ ህዝባዊ ጸሎት ዝቐርቡ ምልጃታትን ኣብቶም ኣብ ላዕሊ ተጠቒሶም ዘለዉ ናይቲ ቐዳማይ ሰብኣይ ምድባት ዝተሰረቱ እዮም። እዚ ኸኣ ብዛዕባና ኸም ክርስትያናት እንታይ ይብል?
እቲ ናይ ሃዋርያ ጳውሎስ ኣብነት ብዛዕባ ጸሎት ገለ ኺምህረና ይኽእል እዩ። ንሕና ኸኣ ንሓትት፦
ጳውሎስ ንጥሞቴዎስ ምእንቲ ኺሓዊ ጸለየዶ? ኣይፋሉን።
- ጳውሎስ ካብ ቤት ማእሰርቲ ምእንቲ ኺፈትሕዎ ጸለየዶ? ብፍልጠትና ኣይፋሉን።
- ጳውሎስ ኣይሁድን ሮማውያንን ምእንቲ ኸይሰጉዎ ሓተተዶ? እንደገና ኣይፋሉን።
- እንፈልጦ ግን፡ እቲ ባርያ ጐይታ ሰለስተ ግዜ ካብቲ “ኣብ ስጋኡ ዝነበረ እሾኽ” (2 ቈረንቶስ 12:7 KJV) ምእንቲ ኺሓዊ ሓተተ። ጐይታ ኸኣ፡ “ጸጋይ ይኣኽለካ እዩ፡ ምኽንያቱ ሓይለይ ኣብ ድኻምካ ይፍጸም እዩ” (ቊ.9) ብምባል መለሰሉ። ጳውሎስ ሕቶኡ ኣቋረጸ። ንመልሲ ጐይታ ተቐበለ፡ ከምኡ’ውን ሓይሊ ክርስቶስ ኣብኡ ምእንቲ ኺሓድር፡ ብሕማማቱ “ብፍጹም ባህታ” ኸም ዚምካሕ ኣወጀ (ቊ.9)።
ጳውሎስ ብዛዕባ እቲ ናይ ካልኦት ኣድላይነት እንታይ ጸለየ? ንሱ ንግብሪ ኣምላኽ ደለየ እሞ፦
እስራኤል፡ “ምእንቲ ኺድሕኑ” (ሮሜ 10:1)።
- ሰባት “ምእንቲ ምስ ኣምላኽ ኪዕረቑ” (2 ቈረንቶስ 5:20)።
- ምእመናን “ብዅሉ ጥበብን መንፈሳዊ ምስትውዓልን ብፍልጠት ፍቓዱ ምእንቲ ኺመልኡ፡ ምእንቲ ኸኣ ብዅሉ ባህ ዘብል ብጐይታ ብቑዕ ኣካይዳ ኺመላለሱ፡ ብዅሉ ሰናይ ግብሪ ፍረ ኺፈርዩ፡ ብፍልጠት ኣምላኽ ኪዓብዩ፡ ብኽብራዊ ሓይሉ ብዅሉ ሓይሊ ኺድልድሉ፡ ንዅሉ ትዕግስትን ዓቕልን ብሓጐስ ምእንቲ ኺረኽቡ” (ቈሎሴ 1:9-11)።
- ብኻልእ ሸነኽ ከኣ፡ ጳውሎስ ጸሎት ምስ ሓተተ፡ ምእመናን ምእንቲ ኺጽልዩሉ ሓተተ እሞ፦
“ምስጢር ወንጌል ምእንቲ ኸፍልጥ፡ ብትብዓት ኣፈይ ምእንቲ ኽኸፍት፡ ቃል ምእንቲ ኺወሃበኒ” (ኤፌሶን 6:19)።
- “ኣምላኽ ንምስጢር ክርስቶስ ምእንቲ ኽንዛረብ፡ ማዕጾ ቓል ምእንቲ ኺኸፍተልና” (ቈሎሴ 4:3)።
- “ቃል ጐይታ ብዘይዕንቅፋት ምእንቲ ኺመላለስ፡ ከምኡ’ውን ምእንቲ ኺኸብር” (2 ተሰሎንቄ 3:1)።
- ንሱን እቶም ምስኡ ዝነበሩን ካብ “ዘይዕቑባትን ክፉኣትን ሰባት” ምእንቲ ኺድሕኑ (ቊ.2)።
- እቲ ኣብ ጸሎት እንሓቶ ዝርዝርና ብርእሰ-ምርመራ ኺረአ ይግባእ። እወ፡ ንዅሉ ኣድላይነትና ናብ ጐይታ ኸምጽእ መጽሓፍ ቅዱሳዊ ስልጣን ኣሎና፡ ከምቲ “ንዅሉ ሓልዮትኩም ኣብኡ ደርብዩ፡ ንሱ ይሓልየልኩም እዩ እሞ” (1 ጴጥሮስ 5:7) ተባሂልና እተመሃርናዮ። ይኹን እምበር፡ ንርእስና ኽንምርምር ከለና፡ ኣብ ህይወትና ዝለዓለ ቀዳምነት ኪወሃቦም ዚግባእ ዝዓበዩ ጉዳያት ከም ዘለዉና ኽንረክብ ንኽእል ኢና። ከምቶም ደቀ መዛሙርቲ ኣብ ሉቃስ 11:1፡ “ጐይታይ፡ ክንጽሊ ምሃረና” ኽንሓትት ይግባእዶ?
“ቅድም መንግስቲ ኣምላኽን ጽድቁን ድለዩ፡ እዚ ዅሉ ኸኣ ይውሰኸልኩም” (ማቴዎስ 6:33)።
እቲ ህይወቱ ኣብ መንፈሳዊ ዋጋታት እምበር ኣብ ንብረት ዘይሰረተ ሰብ፡ ንጸገማት ህይወት ኪጻወርን ካብኡ ኺጥቀምን ዝበለጸ ተዳልዩ እዩ። ብሓቂ ኸኣ፡ ኣብኡ ኺሕጐስ እውን ይኽእል እዩ። ብገንዘብ ዚዕደጉ ጽቡቕ ነገራት ምሕጓስ ጌጋ ኣይኮነን፡ ግናኸ ንሓጐስና ኣብኦም ኪንመሃር የብልናን። ምልኣትና ኣብ ንብረት ዝምርኮስ እንተኾይኑ፡ ንኣኦም ምስ ሰኣንና ንሕመቕ ኢና። ሓጐስና ኣብ ጐይታ እንተኾይኑ ግን፡ ሓደ እኳ ኼዕንዎ ኣይክእልን እዩ። እቶም ንጐይታ ዚፈልጡን ዚኣምኑን ኩሉ ግዜ ኺሕጐሱ ይኽእሉ እዮም! —ፍሬድ ኒማየር (ዝተሰማምዐ)
