«ባልዲኻ ኣውርድ!»
ቅድሚ ብዙሕ ዓመታት ሓንቲ መርከብ ካብ ኤውሮጳ ናብ ወደብ ደቡብ ኣሜሪካ ተጓዒዛ። ብሰንኪ ማዕበልን ካልእ ጸገማትን፡ እቲ ጉዕዞ ስለ ዝነውሐ፡ እቲ ናይ መርከብ ማይ እናነከየ ከደ። ብጥንቃቐ እኳ እንተ ተሓዝ፡ እቶም መርከበኛታት ኣብ መወዳእታ ንምስታይ ዝኸውን ማይ ኣይነበሮምን።
ድሕሪ ሒደት መዓልታት፡ ኣብ ጸጥ ዝበለ ባሕሪ ኣብ ትሕቲ ዘሕንቕ ሙቐት ከለዉ፡ ምስ ካልእ መርከብ ስለ ዝተራኸቡ ብብዙሕ ሓጎስን ዕረፍትን ተመልኡ። ምስ ቀረቡ፡ ተስፋ ዘቑርጽ ኩነታቶም ዝገልጽ መልእኽቲ ብባንዴራኦም ኣልዓሉ: «ብጥሜት ማይ ንመውት ኣለና!»
እቶም መርከበኛታት በቲ መልሲ ደንጸዉ፡ እዚ ድማ ንጸገሞም ዝንዕቕ ይመስል ነበረ: «እቲ ማይ ኩሉ ኣብ ከባቢኹም እዩ ዘሎ፤ ባልዲኹም ኣውርዱ!» ኣብቲ እዋን እቲ ነቲ ሓያል ናይ ኣማዞን ውቅያኖስ ከም ዝሰግሩ ኣይፈለጡን ነበሩ፤ ኣብ ከባቢኦም ኩሉ ጥዑም ጽሩይ ማይ ነበረ፡ ካብ ምድሪ ርሑቕ እኳ እንተ ነበሩ። እንታይ ደኣ፡ ሩባ ኣማዞን ብዙሕ ማይ ናብ ኣትላንቲክ ውቅያኖስ ስለ ዝልእኽ፡ ንብዙሕ ማይላታት ናይ ውቅያኖስ ብምሉኡ ንምስታይ ዝኸውን ይገብሮ።
ከምቶም ማይ ዘይብሎም መርከበኛታት፡ ምናልባት ንስኻ እውን ኣብ ከምኡ ዝኣመሰለ ጸገም – ተስፋ ዘይብሉ – ትርከብ ትኸውን። «ንኽድሕን እንታይ ክገብር ኣለኒ?» ኢልካ ትጭድር ትኸውን – እቲ ናይ ፍቕሪ ኣምላኽ ወሓዚ ኣብ ውቅያኖስ ህይወትካ ኣብ ከባቢኻ ብሓይሊ ከም ዝውሕዝ ከይተገንዘብካ። ባልዲኻ ኣውርድ! «ብጐይታና የሱስ ክርስቶስ እመን፡ ክትድሕን ኢኻ» (ግብሪ ሃዋርያት 16:31 NKJV )።
«‘እቲ ቃል ኣብ ጥቓኻ፡ ኣብ ኣፍካን ኣብ ልብኻን እዩ ዘሎ’ (እዚ ድማ እቲ እንሰብኮ ቃል እምነት እዩ): ብኣፍካ ንጐይታ የሱስ እንተ ተኣመንካ፡ ኣምላኽ ከኣ ካብ ምዉታት ከም ዘተንስኦ ብልብኻ እንተ ኣመንካ፡ ክትድሕን ኢኻ» (ሮሜ 10:8-9)።
ቀሊል ነገር እዩ፡ ንኣኻ ድማ ኣዝዩ ቀረባ እዩ። እግዚአብሔር ኩሉ ንኣኻ ይከኣል ገይርዎ። ንሱ ንሓጢኣትካ ኣብ መስቀል ኣዝዩ ብርቱዕ ዋጋ ከፊሉ እዩ፡ ምእንቲ ንጽምእ ህይወትካ ከተርዊን ንዘለኣለማዊ ሞትካ ከተጥፍእን። ኣብቲ ሕጂ ዘንበብካዮ ቃል ኣምላኽ፡ ናይ ዘለኣለማዊ በረኸትካን ሓጎስካን መፍትሕ ኣሎ። እንደገና ብዓውታ ኣንብቦም።
ምናልባት ንምድሓን ከምዚ ዝኣመሰለ ዕድል ቀሪብካ ኣይትፈልጥን ትኸውን። ንርእስኻ ናይ ኣምላኽ ተስፋ ተጠቐመሉ እሞ ሕጂ ብምሉኡ ስተ!
«እቲ ኣነ ዝህቦ ማይ ዝሰቲ ዘበለ ግና፡ ከቶ ኣይጸምእን እዩ። እቲ ኣነ ዝህቦ ማይ ግና፡ ኣብኡ ናብ ዘለኣለማዊ ህይወት ዝፍልፍል ዓይኒ ማይ ኪኸውን እዩ» (ዮሃንስ 4:14)።
«የሱስ ከኣ፡ ‘... ብኣይ ዝኣምን ከቶ ኣይጸምእን እዩ’ በለ» (6:35)።
«ንጹህ ሩባ ማይ ህይወት፡ ከም ክሪስታል ዝንጸር፡ ካብ ዝፋን ኣምላኽን ካብቲ ገንሸልን [የሱስ] ዝወጽእ ኣርኣየኒ ... ዝጸምእ ይምጻእ። ዝደሊ ዘበለ፡ ማይ ህይወት ብነጻ ይውሰድ» (ራእይ 22:1,17)።
ብሓቂ እንተ ደሊኻ፡ ከምዚ ዝኣመሰለ ጸሎት ክትጽሊ ትኽእል ኢኻ: «ጐይታ የሱስ፡ ንስኻ ጐይታ ምዃንካን ንስኻ ንሓጢኣተይ መቕጻዕቲ ከም ዝወሰድካን እእመን። ኣምላኽ ካብ ምዉታት ከም ዘተንስኣካ ብምሉእ ልበይ እኣምን። በጃኻ ኣድሕነኒ። እዚ ንኣይ ስለ ዝገበርካለይ የቐንየለይ። ኣሜን።» ዝያዳ ክንነግረካ ንኽእል ኢና።
