ዮሃንስ ነዚ «በዅሪ ኻብ ምዉታት» ዝብል ቃል ንጐይታ የሱስ ንምግላጽ ኪጥቀመሉ ኸሎ፡ ንሱ ኻብ ምዉታት ዝተንስአ ናይ መጀመርታ ሰብ ምዃኑ ኣይዛረብን። ኣብ ብሉይ ኪዳን ኻብ ምዉታት ዝተንስኡ ነበሩ፡ ከም ወዲ እታ ኻብ ጻረፋት ዝነበረት ሰበይቲ (1 ነገስት 17:8–24)፡ ወይ ወዲ እታ ሹላማዊት (2 ነገስት 4)፡ ወይ እቲ ንኣዕጽምቲ ኤልሳእ ዝተንከየ ሰብ (2 ነገስት 13)። ኣብ ሓድሽ ኪዳን ብዛዕባ ጓል ያኢሮስ፡ ወዲ እታ መበለት ናይን፡ ከምኡ እውን ብዛዕባ ኣልኣዛር ንመሃር—ዅሎም ኻብ ምዉታት ተንስኡ።
ግናኸ ኣብዚ ጥቕስና፡ ጐይታና በዅሪ ኻብ ምዉታት ምዃኑ ንመሃር። እዚ ቃል እዚ ናይ መጀመርታ ብደረጃን ብኽብርን ወይ ብቦታን ዝብል ሓሳብ ኣለዎ። ብግዜ ናይ መጀመርታ ዝተወልደ ማለት ኣይኰነን፡ ግናኸ ብልዕልና። ጐይታ የሱስ እቲ ዝለዓለ ቦታ ይወስድ። እዚ ኸኣ ኣብ ሓደ መሲሓዊ መዝሙር ብንጹር ይረአ፡ «ኣነ በዅረይ ክገብሮ፡ ካብ ነገስታት ምድሪ እቲ ዝለዓለ» (መዝሙር 89:27)።
እቲ ብዛዕባ ጐይታ የሱስ እንብቦ ቐጺሉ ዘሎ ነገር፡ «ገዛኢ ነገስታት ምድሪ» ምዃኑ እዩ። ካብ ዅሉ ስለ ዝዓበየ፡ ገዛኢ ዅሎም ነገስታት ምድሪ እዩ! ጐይታ ጐይቶትን ንጉስ ነገስታትን እዩ (ራእይ 17:14)። እዚ ኸኣ ኣብ ዝመጽእ መዓልቲ፡ ክርስቶስ ብኽብሪ ምስ ተገለጠ (19:11–16)፡ ንዅሉ ኺግለጽ እዩ። ጐይታ የሱስ ከምቲ ብብሉይ ኪዳን ዅሉ እተነበየ (መዝሙር 2:6–8፤ ኤርምያስ 23:5፤ ዘካርያስ 9:9)፡ ንጉስ ምድሪ ምዃኑ ኺርአ እዩ።
ኣብ ፍቕዲ 4ን 5ን፡ ዮሃንስ ንጐይታ የሱስ ንምምላኽ ብዙሕ ምኽንያታት ሂቡ እዩ። ንሱ እሙን ምስክር፡ በዅሪ ኻብ ምዉታት፡ ገዛኢ ዅሎም ነገስታት ምድሪ እዩ። እቲ ብሩኽ ጐይታና ብሰንኪ ክብሪ ሰብነቱን ክብሪ እቲ ዝፈጸሞን ኪምለኽ ይግባእ!
