ሓደ ዘሰቅቕ ሕማም ብተኣምር ምሕዋዩ
ለምጽን ናእማንን
«ለምጺ» ዝብል ቃል ኣብ መጽሓፍ ቅዱስ ዘይሓዊ ሕማም ኮይኑ፡ ቅርጺ ኣካላት ዝቕይርን ንሕመም ዘይምፍላጥን ዘስዕብ እዩ። ከምቲ ኣብዚ ግዜና «ለምጺ» ተባሂሉ ዝጽዋዕ ሕማም ሃንሰን፡ ንእኡ ዝኸውን ሕክምና ኣይነበረን። ለምጺ ኣብ ቃል ኣምላኽ ንሓጢኣት ዘመልክት እዩ – ልክዕ ከምቲ ለምጺ ብኣካላዊ መገዲ ቅርጺ ኣካላት ዝቕይር፡ ሓጢኣት ድማ ብመንፈሳዊ መገዲ ቅርጺ ኣካላትና ይቕይር።
ናእማን፡ ሓለቓ ሰራዊት ንጉስ ሶርያ፡ «ሓያል ሰብኣይ እዩ ነይሩ፡ ግናኸ ለምጻም ነበረ» (2 ነገስት 5:1)። ኣብ ሰማርያ (እስራኤል) «ካብ ለምጹ ኸሕውዮ» ዝኽእል ነብዪ ከም ዘሎ ምስ ሰምዐ፡ ንንጉሱ ነገሮ። ንጉስ ሶርያ ድማ ምስ ናእማን «ዓሰርተ ታለንት ብሩር፡ ሽዱሽተ ሽሕ ሰቅል ወርቂ፡ ዓሰርተ ጽሕፍቲ ክዳውንቲ» ሒዙ ናብ ንጉስ እስራኤል ደብዳበ ለኣኸ። እቲ ደብዳበ ድማ፡ «ናእማን ባርያይ ናባኻ ለኣኽኩ፡ ካብ ለምጹ ኸሕውዮ!» ይብል ነበረ (ቁ.6)።
ንጉስ እስራኤል በቲ ደብዳበ ተበሳጭዩ፡ «ክዳውንቱ ቀደደ እሞ፡ ‘ኣነ ኣምላኽ ድየ፡ ንምቕታልን ንምሕዋይን፡ እዚ ሰብኣይ እዚ ንሰብ ካብ ለምጹ ኸሕውዮ ኢሉ ናባይ ዝልእኽ?’ ... ግናኸ ኤልሳእ ሰብኣይ ኣምላኽ ንጉስ እስራኤል ክዳውንቱ ከም ዝቐደደ ምስ ሰምዐ፡ ናብ ንጉስ ለኣኸ እሞ፡ ‘... ሕጂ ናባይ ይምጻእ፡ ኣብ እስራኤል ነብዪ ከም ዘሎ ኸኣ ይፍለጥ’» በለ (ቁ.7-8)።
ለምጺ እንታይ እዩ ዘሕውዮ
ንብረት ሃብትን ሰብኣዊ ሓይልን ንለምጺ – ወይ ንሓጢኣት – ኬሕውዩ ኣይክእሉን እዮም። ኣምላኽ ጥራይ እዩ ንለምጻም ኬሕውዮ ዝኽእል፡ ንሱ ድማ ነቲ መለኮታዊ ዕላማኡ ንምፍጻም ኪገብሮ እዩ። ንናእማን፡ ንጣኦት ዘምልኽ ዝነበረ፡ ኣምላኽ እስራኤል ናይ ሓቂ ኣምላኽ ምዃኑ ኺርኢ ደለየ።
ናእማን ብኸመይ ከም ዝሓዊ ንባዕሉ መደምደምታ ገይሩ ነበረ። ኤልሳእ «ብርግጽ ናብኡ ኺወጽእ፡ ደው ኪብል፡ ስም እግዚኣብሔር ኣምላኹ ኺጽውዕ» ከም ዝገብር ሓሰበ (ቁ.11)። ግናኸ ኣይፋሉን! መገዲ ኣምላኽ ንናእማን «ኪኸይድ እሞ ኣብ ዮርዳኖስ ሾብዓተ ግዜ ኺሕጸብ» እዩ ነይሩ (ቁ.10)። ከምኡ ብምግባሩ፡ ስጋኡ ኺምለስን ካብቲ ሕማም ሓራ ኺኸውንን ከም ዝኽእል ተነግሮ።
እቲ ለምጻም ተቖጥዐ እሞ፡ እቲ ጽሩይ ማይ ሶርያ ኻብቲ ርኹስ ዮርዳኖስ ዝሓይሽ እዩ ሓሰበ። ሰባት መብዛሕትኡ ግዜ ንመገዲ ኣምላኽ ንምጽራዮም ይነጽጉ፡ ዝከኣሎም ከም ዝገብሩ ይገልጹ ወይ «ሓድሽ ሓሳብ ኪጅምሩ» ይምሕሉ። ይኹን እምበር፡ ነፍሲ ወከፍ ሰብ «ሓጢኣት ኣሎኒ» – ሓጢኣተኛ ባህሪ ኻብኡ ኺጸርዩ ዘድልዮም ምዃኑ ኺምድምድ ኣለዎ (1 ዮሃንስ 1:8)። ነፍሲ ወከፍ ሰብ ብርግጽ «ደም የሱስ ... ካብ ኵሉ ሓጢኣት የንጽሓና» ኢሉ ኺኣምን ኣለዎ (ቁ.7)። ስቓይ ክርስቶስ፡ ሞቱ፡ ምፍሳስ ደሙ፡ ትንሳኤኡ ኹሉ «ሓጢኣትና ኣብ ስጋኡ ኣብ ዕንጨይቲ ጾይሩ፡ ንሓጢኣት ምእንቲ ኽንመውት፡ ንጽድቂ ኸኣ ምእንቲ ኽንነብር» ዝገበሮ ምዃኑ ኽንኣምን ኣለና (1 ጴጥሮስ 2:24)። እዚ እዩ ምሕጻብና። እግዚኣብሔር ድማ፡ «ኣነ እንተ ዘይሓጸብኩኻ፡ ምሳይ ግደ የብልካን» በለ (ዮሃንስ 13:8) – ገና ኣብ ሓጢኣትካ ኢኻ።
ኣምላኽ ይቕይረና
ናእማን ኣብ ዮርዳኖስ ሾብዓተ ግዜ ምስ ኣተወ፡ «ከም ቃል ሰብኣይ ኣምላኽ ... ስጋኡ ኸም ስጋ ቘልዓ ተመልሰ፡ ንጹህ ድማ ኾነ» (2 ነገስት 5:14)። ከመይ ዝበለ ለውጢ! ድሕሪኡ ድማ፡ «ኣብ ኵላ ምድሪ ኻብ እስራኤል ወጻኢ ኣምላኽ የልቦን» በለ (ቁ.15)። ከምኡ ድማ፡ ከም ኣካል ስራሑ ምስ ጐይታኡ ናብ ቤት ሪሞን፡ ጐይታኡ ዘምልኽሉ፡ እንተ ኸደ እሞ ንሱ እውን እንተ ሰገደ፡ ይቕረታ ሓተተ (ቁ.18)። ኤልሳእ ድማ ብቐሊሉ፡ «ብሰላም ኪድ» በሎ (ቁ.19)።
ኣመንቲ ምስ ኾንና ሓድሽ ባህሪ ንቕበል እሞ ድሕሪኡ ሓጢኣት ክንገብር ኣይንደልን። ከምቲ እግዚኣብሔር ዝበሎ፡ «ዝሓጸበ ... ብምሉኡ ንጹህ እዩ» ንኸውን (ዮሃንስ 13:10)። ከምኡ ድማ ኣብ ዕለታዊ ህይወትና ክንመላለስ ከለና ኣእጋርና ይርከሳ እሞ ምሕጻብ የድልየን። ድሕሪኡ ከም ናእማን እንተ ተናዘዝናን ይቕረታ እንተ ሓተትናን፡ እዞም ሓጢኣታት እዚኦም ይቕረ ይብሃሉና እሞ ንሱ ድማ «ካብ ኵሉ ዓመጻ የንጽሓና» (1 ዮሃንስ 1:9)።
ምስክርነት ቘልዓ ውጽኢታዊ ኪኸውን ይኽእል እዩ
ሓንቲ ንእሽቶ ጓል ንሰበይቲ ናእማን ብዛዕባ ሓይሊ ኣምላኽ ብነብዪ ኣብ እስራኤል ከም ዝርከብ ነገረታ። ብሓቂ፡ ቘልዑ እኳ እምበር ንእሽቶ ፍልጠት ዘለዎም፡ ንለምጻም ሰብ ናብ ኣምላኽ ኬመልክቱ ይኽእሉ እዮም። ኣብ ሕቡራት መንግስታት ኣሜሪካ ኣብ ቤት ማእሰርቲ ንሞት ዝጽበ ዘሎ ሓደ ነፍሰ ገዳሊ ብሓንቲ ንእሽቶ ጓል ናብ እግዚኣብሔር ከም ዝመጸ ይፈልጥ እየ። ካብ ቤት ማእሰርቲ እኳ እንተኾነ፡ ሕጂ ንእግዚኣብሔር ፍርያም ኣገልግሎት ከም ዘካይድ ምጥቃሱ ኣገዳሲ እዩ!
ኣብ ብሉይ ኪዳን ዘሎ ኣብነት ናእማንን እታ ንእሽቶ ጓልን ንቘልዑ – ንደቂ ኣምላኽ – ብዛዕባ ፍቕርን ሓይልን ጐይታናን መድሓኒናን ንኻልኦት ኪነግሩ የባራትዖም። ብፍላይ፡ ስማ እኳ ኣይንፈልጥን ኢና!
