ራእይ፡ ብሃዋርያ ዮሃንስ እተጻሕፈ፡ ናይ ኣምላኽ ምስ ሰብ ዘለዎ መገዲ ትንቢታዊ መደምደምታ እዩ። ኣብ ዘፍጥረት ብንጹህ ሓድሽነትን ቅልልን ዝጀመረ ታሪኽ፡ ሕጂ ብብዙሕ ምትእስሳራትን ምዝንባዓትን፡ ብሰንኪ እቲ ሰብ ዝኣከቦ በደልን ብፍቓዱ ዝገበሮ ምብታኽን ይዛዘም። ግናኸ እቲ ዓቢ ኣምላኽና፡ ብህድኣትን ብግርማዊ ምምኽኻርን፡ ነቲ እተሓላለኸ ነገር ይፈትሖ፡ ብፍጹም ግዜን ስርዓትን ከኣ ብመሰረት መለኮታዊ ጥበቡ ይፈርድ።
ኣብ ምዕራፍ 1:19 እተዋህበ ሰለስተ ቀንዲ ክፍሊታት ንተመሃራይ ዓቢ ሓገዝ ኪኸውን እዩ።
• «እቲ ዝርኤኻዮ ነገር» (ምዕ. 1)፤
• «እቲ ዘሎ ነገር» (ምዕ. 2–3)፤
• «እቲ ድሕሪ እዚ ዚኸውን ነገር» (ምዕ. 4–22)።
እቲ ቐዳማይ ሓሊፉ እዩ፤ እቲ ኻልኣይ ሕጂ ዘሎ እዩ፡ ንዘመን ቤተ ክርስቲያን ዝምልከት፤ እቲ ሳልሳይ ከኣ ንመጻኢ እዩ። ኣብ ምዕራፍ 2ን 3ን፡ ጐይታ የሱስ ኣብቲ ናይ ሸውዓተ ኣኼባታት ኣብ እስያ ንእሽቶይ ዘሎ ኩነታት ብልዑል ፍርዳዊ ምስትውዓል ይርአ፡ እዚኣቶም ከኣ ንዅሉ ታሪኽ ቤተ ክርስቲያን ካብ መጀመርታኡ ኽሳዕ ምምጻእ ጐይታ፡ ምምጥቃዕ፡ ትንቢታዊ እዮም። ፍርዲ ኻብ ቤት ኣምላኽ ኪጅምር ኣለዎ።
ዓወት ጐይታ የሱስ ኣብ ልዕሊ ዅሉ ነገር፡ ናይ ሽሕ ዓመት መንግስቱ፡ ፍርዲ ዓቢ ጻዕዳ ዝፋኑ፡ ዘለኣለማዊ ክብሪ ኣምላኽ ኣብ ሓድሽ ሰማያትን ሓድሽ ምድርን ገለ ኻብቲ ዓበይቲ ጉዳያት እቲ መጽሓፍ እዩ። ግርማዊ መደምደምታ ናይቲ ግሩም ምኽሪ ኣምላኽ! እዚ ናይ መወዳእታ ቃል ካብ ኣምላኽ፡ ነቶም ዚብብዎን ዚሰምዕዎን ቅዱስ ሓቅታቱ ኸኣ ዚሕልዉን በረኸት ኬውጅህ ክንደይ ዝግባእ እዩ።
