ቀሊል ግናኸ ሓያል መልእኽቲ
«ኣይፋልኩምን እብለኩም ኣሎኹ፡ ግናኸ እንተ ዘይተነስሑ ኵላትኩም ከምኡ ኽትጠፍኡ ኢኹም።» – ሉቃስ 13:3 NKJV
ኣብዚ ምዕራፍ ሉቃስ፡ ዝደሓኑን ምስ ኣምላኽ ቅኑዓት ዝዀኑን ኰይኖም ዚሓስቡ ሰባት ንረክብ፡ ግናኸ ከምኡ ኣይኰኑን። ገና ኺንስሑን ኪኣምኑን የድልዮም ነይሩ። በዚ ምኽንያት እዚ፡ የሱስ ብዛዕባ ሓንቲ በለስ፡ ቅድሚ ምቝራጻ ሰለስተ ዓመት ፍረ ኽትፈሪ ዕድል ከም ዝነበራ ነገረ፡ እዚ ኸኣ ኣብቲ ግዜ እቲ ብዛዕባ ህዝቢ እስራኤል ዚዛረብ ነይሩ ኪኸውን ይኽእል እዩ። ንሳቶም ንኣምላኽ ዜምልኹ ኸም ዝነበሩ ይሓስቡ ነይሮም፡ ብሓቂ ግና ንወዱ፡ ንጐይታ የሱስ ክርስቶስ ብምእባይ ይነጽግዎ ነይሮም። እቶም ውልቀ ሰባት ናብ ሰማይ ኪኣትዉ ይጽበዩ ነይሮም፡ ጐይታ ምሳኦም ስለ ዝበልዐን ኣብ ጎደናታቶም ስለ ዝመሃረን ጥራይ። ግናኸ ንሳቶም፡ «ኣይፈልጠኩምን እየ፡ ካበይ ከም ዝመጻእኩም ኣይፈልጥን። ኵላትኩም ገበርቲ ዓመጻ፡ ኻባይ ርሓቑ» (ሉቃስ 13:27) በሎም።
እቶም ሰባት፡ ጸገማት ብሰንኪ ሓጢኣት እዩ ዚብሉ ነይሮም፡ ጽቡቕ ሰባት በረኸት ይቕበሉ፡ ሕማቕ ሰባት ከኣ ይፍረዱ ብምባል ይሓስቡ ነይሮም። ብኣተሓሳስባኦም፡ ንሳቶም ኣዝዮም ጽቡቓት ነይሮም፡ እቶም መከራ ዝረኸቦም ሰባት ከኣ ኣዝዮም ሕማቓት ነይሮም። ግናኸ ኣምላኽ ከምዚ ይብል፡
«ኵሉ ሰብ ሓጢኣት ገበረን ክብሪ ኣምላኽ ኣይበጽሐን» (ሮሜ 3:23)።
እዞም ርእሶም ጻድቕ ዚገብሩ ኣይሁድ፡ ኪንስሑ ኸም ዜድልዮም ተነጊርዎም ነይሩ። እዚ እንታይ ማለት እዩ፧ መጽሓፍ ቅዱስ ብሓፈሻ ብእምነት ብክርስቶስ ምድሓን ይዛረብ፡ እሞ ስለምንታይ ኣብዚ ሓሳብ እዚ ንስሓ ዜድሕን ዚመስል፧
ንመጽሓፍ ቅዱስ ክንርኢ ኸለና፡ ብዛዕባ ንስሓን እምነትን ብሓንሳብ ኪዓይዩ ኸለዉ ሓደ ዓይነት ነገራት ከም ዝተባህሉ ንረክብ። የድሕኑ (ኤፌሶን 2:8፤ 2 ጴጥሮስ 3:9)፡ ግብሪ ኣለዎም (ኤፌሶን 2:10፤ ማቴዎስ 3:8)፡ ከምኡ እውን ይእዘዙ (ማርቆስ 1:15)።
ንስሓ ምቕያር ኣንፈት እዩ። ካብ ምእማን ብጐይታ ዚዓግተና ዘሎ ዝዀነ ይኹን ነገር ኣተሓሳስባና ኽንቅይር ኣሎና። እቶም ተሰሎንቄያውያን ካብ ጣኦታት ናብ ኣምላኽ ተመሊሶም። እዞም ኣብ ሉቃስ ዘለዉ ኣይሁድ ካብ ርእሰ-ጽድቂ ተመሊሶም ሓጥኣን ምዃኖም ኪእመኑ የድልዮም ነይሩ። ብመጽሓፍ ቅዱሳዊ ትርጉም ብሓቂ ዝተነስሐ ሰብ ናብ እምነት ብክርስቶስ መጺኡ እዩ። ሓደ ሰብ ናብ እምነት ብክርስቶስ እንተ ዘይመጺኡ፡ እቲ ሰብ ብሓቂ ስለ ዘይተነስሐ፡ ማለት ኣብ መንጎኡን ኣብ መንጎ ኣምላኽን ካብ ዚዓግቶ ሓጢኣት ስለ ዘይተመለሰ እዩ። እቲ ዝተነስሐ ሰብ፡ ኣምላኽ ቅኑዕ ምዃኑን ንሱ ወይ ንሳ ጌጋ ምዃኖም ምስ ተኣመነ፡ ክርስቶስ ምእንቲ ዘይተኣምኑ ኸም ዝሞተ (ሮሜ 5:6) ኣብ ሓቂ ምእማን ኣይጸግሞን።
ስለዚ እዚ ሓያልን ኣገዳሲን መልእኽቲ እዩ፡ «እንተ ዘይተነስሑ ኵላትኩም ከምኡ ኽትጠፍኡ ኢኹም!» እቶም ኣይሁድ ብሓፈሻ ነዚ መጠንቀቕታ እዚ ኣይተግበርዎን፡ ከም ህዝቢ ኸኣ ንመድሓኒኦም ብምእባይ ተፈሪዶም። እዚ ጌጋ እዚ ኸይትገብር በጃኻ! ዝያዳ ኽንነግረካ ንኽእል ኢና።
