ንሰብ ቅኑዕ እትመስል መገዲ አላ፤ መወዳእታኣ ግና መገዲ ሞት እያ። (ምሳሌ 14:12)
ኣብ መጽሓፍ ምሳሌ (14:12ን 16:25ን) ክልተ ግዜ፡ ፍርዲ ሰብ ብዛዕባ ቅኑዕ መገዲ ዘይተኣማኒ ምዃኑ ንመሃር።
እቲ ንዕኡ ቅኑዕ ዝመስሎ ብጥፍኣትን ሞትን ይዛዘም። ኣብ እዋን ካልኣይ ውግእ ዓለም፡ እቲ ባሕራዊ ሓይሊ ንኣባላት ነፋሪቱ ብዛዕባ እዚ ንጹር መግለጺ ሂቡ ነይሩ።
ኣብ ዝለዓለ ከፍታ ክነፍሩ ከለዉ ኦክስጅን እንተ ዘይተጠቒሞም፡ ንስምዒቶም ክእመኑ ከም ዘይብሎም ንምግላጽ ይፍትን ነይሩ።
ሓደ ነፋሪት ናብ ክፍሊ ምውሓድ ኣየር ክኣቱ፡ ኣብ ልዕሊኡ ሒሳባዊ ጸገማት ዘለዎ ወረቐት ኣብ ዝነበሮ ጠረጴዛ ኸኣ ክቕመጥ ተነጊርዎ።
ኦክስጅን ካብቲ ክፍሊ ተወሲዱ፡ ንዝለዓለ ከፍታ ንምምሳል። ኣየር ምስ ቀነሰ፡ እቲ ነፋሪት ነቶም ጸገማት ክፈትሖም ተነጊርዎ። ክሳዕ ሕጂ ሓደ እኳ ብግቡእ ከም ዘይፈትሖም እውን ተነጊርዎ። እቲ ነፋሪት ነቶም ጸገማት ብዝለዓለ እምነት፡ ነቲ ስርዓት ከም ዝሰዓሮ ጌሩ ብቐሊሉ ፈቲሑዎም።
እቶም ጸገማት ቀሊል ይመስሉ ነይሮም፡ ንሱ ድማ ፍጹም ነጥቢ ከም ዝረክብ ኩሉ እምነት ነይርዎ። ኣብ ኣእምሮኡ ምንም ጥርጣረ ኣይነበሮን።
ግን ኦክስጅን ናብቲ ክፍሊ ምስ ተመልሰ፡ ወረቐቱ ንኽእረም ምስ ወጸ፡ ክእለት ምፍታሕ ጸገማቱ ብምጕዳል ኦክስጅን ናብ ኣእምሮኡ ብኸቢድ ከም ዝጐደለ ተማህረ።
እቲ ትምህርቲ፡ ብርግጽ፡ ኣብ ዝለዓለ ከፍታ ኦክስጅኑ ከይተጠቕመ እንተ ነፊሩ፡ ንፍርድኡ ክእመን ከም ዘይክእል፡ ከምኡ እውን ምውዳቕ ከም ዝዕድም እዩ ነይሩ።
ፍርዲ ሰብ ብሓጢኣት ብኸቢድ ጐዲሉ እዩ። ናብ ሰማይ ዝወስድ መገዲ ብዝከኣሎ መጠን ጽቡቕ ምግባር ምዃኑ ፍጹም እርግጸኛ ይኸውን።
ብጽቡቕ ግብሪ ሓደ እኳ ከም ዘይድሓነ እንተ ነገርካዮ፡ ንሱ ነቲ ስርዓት ንመጀመርታ ግዜ ከም ዝሰዓሮ ኩሉ እምነት ኣለዎ። ኣምላኽ ካብ ደገታት ሰማይ ከም ዘይመልሶ እርግጸኛ እዩ።
ግን ይጋገ እዩ፡ ኣብቲ «መንፈሳዊ ኦክስጅን» ምጕዳል እንተ ጸኒዑ ድማ ክጠፍእ እዩ። ደሕንነቱ ኣብ ቃል ኣምላኽ ምእማን እምበር ኣብ ፍርድኡ ኣይኮነን። ከምኡ እንተ ገይሩ፡ ካብ ሓጢኣቱ ክንስሕ፡ ንጐይታ የሱስ ክርስቶስ ድማ ጐይታኡን መድሓኒኡን ጌሩ ክቕበል እዩ።
ቃል ኣምላኽ ሓቂ ስለ ዝኾነ፡ ዝኣምንዎ እቲ ቅኑዕ መገዲ ከም ዝስዕቡ እርግጸኛታት ክኾኑ ይኽእሉ እዮም።
