ኣቦ ኣብ ክሳድ እቲ ዝተነሰሐ ወዲ ወደይ ምስ ወደቐ፡ ናይ ፍቕሪ ስዒሙ ድማ፡ ንገላዉኡ፡ “እቲ ዝበለጸ ክዳን ኣምጽኡ እሞ ኣልብስዎ” (ሉቃ. 15:22) በሎም። እቲ ዝበለጸ ክዳን እዩ ነይሩ። ካብኡ ዝበልጽ የልቦን። ንኣብ ቅድሚ ኣቦ ምቕራብ ዝኸውን ዝለዓለ ባህርይ ብቕዓት እዩ ነይሩ። ግናኸ እቲ ምስላ፡ ነቲ ሎሚ ኵሉ ምእመን ብክርስቶስ ዝኸውን ዘሎ ምሉእ በረኸት ጽድቂ ኣይገልጽን እዩ፣ ከመይሲ ንሱ ንኣብ ቅድሚ ኣቦ ምቕራብ ጥራይ ኣይኮነን ዝጸብቕ፣ የግዳስ ኣብ ካልእ—ኣብቲ ፍቑር—ተቐባልነት ኣለዎ፣ ስለዚ “ጽድቂ ኣምላኽ ብእኡ” ኴንና ኣሎና።
እቶም ምእንትኡ ዝተሰቀዩ ብእኡ ጻድቃን ጌርካ ምቑጻሮም—‘እግዚኣብሔር ጽድቅና’—ብዘለኣለማዊ ዕላማ መሰረት፡ ብምኽንያት እቲ ንኣምላኽ ዘኽብር ዕዮ ምእዛዙ፡ ንክርስቶስ ዝግብኦ እዩ። ኣምላኽ ብጸጋኡ ድማ ንእኡ “ጽድቂ” (1 ቈረ. 1:30) ገበሮልና፣ እዚ ድማ ብመርገጺ እምነት እዩ (ሮሜ 1:17)። ነፍሳት ብደሙ ምሕረት ሓጢኣት ብምሃብን ብክርስቶስ ጻድቃን ብምቑጻርን ጽድቂ ኣምላኽ ክሳዕ ዘይርእያ፡ ጽኑዕ ሰላም የብለንን። ወንጌል ኣምላኽ ጽድቂ ኣምላኽ ክንደይ ብቡሩኽ ይገልጽ!
ክርስቶስ ጽድቅና ምዃኑ፡ ብዘይመወዳድር ጸጋ ድማ ጽድቂ ኣምላኽ ብእኡ ምዃንና ክንፈልጥ ክንደይ ጥዑም እዩ። ክርስቶስ ድማ ኣብ ቅድሚ ኣምላኽ ዘሎና ጽድቅና እዩ፣ ኣብኡ ዘሎ ኩሉ ግዜ ዝርአ ምስክር ድማ፡ ሓጢኣትና ብጽድቂ ምሕረት ከም ዝረኸበ ጥራይ ዘይኮነስ፡ ንሱ ኻብ ኣምላኽ ጽድቂ ኸም ዝኾነልና እዩ። እዚ ንልቢ ክንደይ ዕረፍቲ ይህብ! ኣብ መዓልቲ ፍርዲ ድማ ክንደይ ትብዓት ይህብ፡ ከመይሲ ንሱ ከም ዘሎ፡ ከምኡ ድማ ንሕና ኣብ ዓለም ኣሎና (1 ዮሃ. 4:17)። እዚ ሓቅታት እዚ ልብና ክንደይ የቕልጥፎ፡ ናብ ኣምልኾን ምስጋናን ድማ የውጽኣና!
