ጌዴዎን መልኣኽ እግዚኣብሔር ገጽ ንገጽ ከም ዝረኣየ ምስ ፈለጠ፣ ንህይወቱ ፈርሀ። እግዚኣብሔር ድማ «ሰላም ምሳኻ ይኹን፣ ኣይትፍራህ» ብምባል ኣጸናንዖ። ሓደ ኻብቲ ኣብ ህይወት ክርስትያን ዘሎ ምጥርጣር፣ እግዚኣብሔር ንውግእ ምእንቲ ኺሰደና ሰላም ይህበና እዩ! ብምላሽ ድማ ጌዴዎን ንኣምላኽ ንምምላኽ መሰውኢ ሰርሐ፣ እዚ ኸኣ YHWH Shalom : እግዚኣብሔር-ሰላም እዩ ኢሉ ሰመዮ።
በታ ሓንቲ ለይቲ እግዚኣብሔር ንጌዴዎን ነቲ ኣብ ንብረት ኣቦኡ ዝነበረ መሰውኢ ባኣል ከፍርሶን ኣብ ክንኡ ድማ ንእግዚኣብሔር መሰውኢ ኺሰርሕን ኣዘዞ (6:25)። እቲ ኣብ ቊጽሪ 24 ዘሎ ናይ ጌዴዎን ቀዳማይ መሰውኢ ናይ ውልቂ መሰውኢ ኣምልኾ ነይሩ፣ እዚ ኣብ ቊጽሪ 25 ዘሎ ድሕሪኡ ዝመጸ መሰውኢ ኸኣ ህዝባዊ መሰውኢ ምስክርነት ነይሩ። እቲ ቅደም ተኸተል ኣገዳሲ እዩ። ሃዋርያ ጴጥሮስ ከም ህያዋን ኣእማን ንሕናውን መንፈሳዊ ቤት፣ ቅዱስ ክህነት፣ ንኣምላኽ ቅቡል ዝዀነ መንፈሳዊ መስዋእቲ ንምቕራብ ከም እንስራሕ ይነግረና (1 ጴጥ. 2:5)። ቀጺሉ ድማ ንሕና ሕሩይ ወለዶ፣ ንጉሳዊ ክህነት፣ ቅዱስ ህዝቢ፣ ፍሉይ ህዝቡ፣ ካብ ጸልማት ናብ ዘደንቕ ብርሃኑ ዝጸውዓና ንምስጋናኡ ምእንቲ ኽንእውጅ ከም ዝዀንና ይብል (1 ጴጥ. 2:9)። ንሕና ቅዱስ ክህነትን ንጉሳዊ ክህነትን ኢና። ከም ቅዱሳን ካህናት፣ ብእምነት ናብ መቕደስ ሰማይ ንኣምልኾ ንኣቱ። ከም ንጉሳውያን ካህናት፣ ንምስክርነት ናብ ዓለም ንወጽእ።
ምስ ጐይታ የሱስ ብጸሎትን ብቃል ኣምላኽን ግዜ ከይሓለፍና፣ ንዕኡ ፍሩያት ምስክር ክንከውን ኣይንጽበን ኢና። ንሕና ንርእስና ክንልወጥ ኣሎና፣ ንዕኡ ንዝደልያ ዓለም ምስሉ ምእንቲ ኽንገልጽ (2 ቈረ. 3:18)። ንጐይታ ዝጠቅም ክቡር ኣቕሓ ምእንቲ ኽንከውን፣ ክንቕደስን ብመንፈስ ቅዱስ ክንምላእን ኣሎና (2 ጢሞ. 2:21)!
