ጳውሎስ ንቕዱሳን ተሰሎንቄ «ኣሕዋት ብእግዚኣብሔር እተፈተውኩም» (ቊ. 13) ኢሉ ከመስግኖም ከኣለ። ንሕና ኵሉ ግዜ ፍቑራት ከም ዝዀንና ኣይስምዓናን ይኸውን፣ ግናኸ ካብቲ ክንርድኦ እንኽእል ንላዕሊ ብእግዚኣብሔር ፍቑራት ኢና።
ኣምላኽ ነዞም ምእመናን (ንኣናውን) ካብ መጀመርታ ንምድሓን ብቕድስና መንፈስን ብእምነት ሓቅን ከም ዝመረጾም ተነጊርና ኣሎ። ቕድስና ናይ መንፈስ ቅዱስ ዕዮ እዩ፣ ንሱ ድማ ንኣምላኽ ይፈልየና። ምእመናን ንኣምላኽ ዝያዳ ዝፍለዩሉን ብቕድስናን ብምምሳል ክርስቶስን ዝዓብዩሉን «ዕቤት ቕድስና» እንተሎ እኳ፣ ኣብ ቃል ኣምላኽ ቕድስና ብብዝሒ ንሓንሳእ ንሓዋሩ ንኣምላኽ ምፍላይ ከም ዝውዕል ምርኣይ ኣገዳሲ እዩ።
ቀጺልና፣ ምድሓንና ብእምነት ሓቂ እዩ። እዚ ኸኣ ወገንና እዩ። ካብቲ ተንኮለኛ ልብናን ካብቲ ኻብ መጀመርታ ሓሳዊ ዝዀነ ድያብሎስን (ዮሃ. 8:44) ሓራ ወጺእና ኢና።
ድሕሪኡ፣ ኣምላኽ ነዞም ቕዱሳን (ንኣናውን) ብወንጌል ጸዊዕዎም: «ብወንጌልና ጸዊዕኩም» (ቊ. 14)። ኣምላኽና ንሰባት ናብኡ ንምጽዋዕ ነቲ ብስራት ወንጌል ይጥቀመሉ። እቲ ሕጂ እውን ዝቕጽል ዘሎ ጸዋዕታ ወንጌል ንጸሊ!
ዕላማ ጸዋዕታ ኣምላኽ እንታይ እዩ ነይሩ? ንኽብሪ ጐይታና የሱስ ክርስቶስ ንምርካብ ተጸዊዕና ኢና። ሓሳባት ኣምላኽናን ኣቦናን ክንደይ ዓብዪ እዩ! ንሱ ጸዊዑና እዩ፣ ኣብቲ ዝነበርናዮ ዅነታት ንኽንተርፍ ዘይኰነስ፣ ንኽብሪ ጐይታና የሱስ ክርስቶስ ምእንቲ ኽንካፈል እዩ። ቅድም ክብሪኡ ኣብ ሰማይ ክንካፈል ኢና። ብተወሳኺ፣ «ክርስቶስ ህይወትና ምስ ተገሃደ፣ ሽዑ ንስኻትኩምውን ምሳኡ ብኽብሪ ኽትግሃዱ ኢኹም» (ቈሎ. 3:4)። ጐይታ እንደገና ናብ ምድሪ ምስ መጸ፣ ኣብዚ ኣብ ህዝባዊ ክብሩ ክንካፈል ኢና። ዘደንቕ ጸጋ!
