ድሕሪ ሞት ሃማን፡ ጸላኢ ኣይሁድ፡ ንጉስ ኣሓሽዌሮስ ነቲ ኻብ ሃማን ዝወሰዶ ቀለቤት ማሕተሙ ንመርዶካይ ሃቦ፡ ንመርዶካይ ከኣ ኣብ መንግስቲ ካልኣይ ዝለዓለ ገበሮ። ድሕሪኡ፡ ኣብታ ሃማን ኣይሁድ ኪጠፍኡ ዝሓሰበላ መዓልቲ፡ ህይወቶም ኣድሓኑ፡ ካብ ጸላእቶም ዕረፍቲ ረኸቡ፡ ኣብታ መንግስቲ ኸኣ ብዙሓት ኣሽሓት ጸላእቶም ቀተሉ።
ኣብ መበል ዓሰርተ ኣርባዕተ መዓልቲ ኣዳር ዓረፉ። እዚ ዓቢ መዓልቲ በዓልን ሓጐስን፡ በዓል፡ ንሓድሕድ ህያባት ንምልኣኽን ንድኻታት ህያባት ንምሃብን ዝኸውን መዓልቲ ነበረ። መርዶካይ ንዅሎም ኣይሁድ ኣብታ መንግስቲ ቐረባን ርሑቕን ዝነበሩ ጽሒፉ፡ ነዛ መዓልቲ እዚኣን እታ ቐጺላ ዘላን ዓመት ዓመት ኣብ ዅሉ ስድራ ቤት፡ ኣብ ዅሉ ከተማ፡ ኣብ ዅሉ ኣውራጃ ኺሕልውዋ ኣዘዘ፡ ምእንቲ ትዝታኦም ኣብ መንጎ ወለዶኦም ከይጠፍእ። እዚ በዓል እዚ ፑሪም ተባሂሉ ተሰምየ። ኣይሁድ ሎሚ እውን ነዚ ሓጐስ ዝመልኦ በዓል፡ ዓቢ ምድሓኖም ዝዝክር፡ ይሕልውዎ።
ዮሃንስ 10:22 ሓደ ኻልእ በዓል፡ በዓል ምውፋይ—ሕጂ ሓኑካ ተባሂሉ ዝጽዋዕ—ኣይሁድ ድሕሪ ሓደ ኻልእ ሓጐስ ዝመልኦ ፍጻመ ኣብ ታሪኾም ከም ዝጀመሩ ይገልጽ። ምሕረትን ምድሓንን ጐይታ ብልቢ ንእኡ ብምሕረቱ እናመስገንካ ምዝካር ብርግጽ ቅኑዕ እዩ። ብዙሓት መዝሙራት ንኣምላኽ ንህዝቡ ኻብ መጽበብቶም ስለ ዘድሓኖም የመስግኑ።
ጐይታና የሱስ ንስቓዩን ሞቱን ንምዝካር ምብታኽ እንጌራ ከም ዝሰርዐልና ፈጺምና ኣይንረስዕ። ኣብ ዅሉ መዓልቲ ጐይታ ብፍቕርን ብኣምልኾን ዝመልአ ልቢ ሒዝና ንእኡ እናዘከርና፡ ነምልኾ፡ ነመስግኖ፡ ነወድሶ።
