ኣብ ጥቕስታት 4ን 5ን፡ ጐይታ የሱስ ከም እሙን ምስክር፡ ካብ ምዉታት በዅሪ፡ ከምኡውን ኣብ ልዕሊ ነገስታት ምድሪ ገዛኢ ዀይኑ ይርአ። ነዚ ነገር እዚ ምምርማር ንዮሃንስ መዝሙር ምስጋና ኺጅምር ይገብሮ። እዚ ናይ ምስጋና ፍንትሕታሕ እዚ ናብ ጐይታ የሱስን ናብ ኣቦን ዚምርሕ ይመስል። ዮሃንስ ድምጹ ኣልዒሉ ንጐይታ የሱስ ኬመስግን ከሎ፡ ፍሉያት መዳያት ምስጋና ይጠቅስ።
ቐዳማይ፡ “ነቲ ዘፍቀረና”—“ነቲ ዜፍቅረና” (jnd)። ንሱ ኣብ ዝሓለፈ እዋን ጥራይ ኣየፍቀረናን፡ እዚ ፍቕሪ እዚ ይቕጽል ኣሎ! ዘይቅየር ፍቕሪን ዘይውዳእ ፍቕሪን እዩ! ንሱ እቲ ፈጺሙ ዘይቅየር (ሚል. 3:6) ባህርይ እዩ። ከም ጳውሎስ፡ “ወዲ ኣምላኽ፡ ነቲ ዘፍቀረኒን ንርእሱ ምእንታይ ዝሃበኒን” (ገላ. 2:20) ኽንብል ንኽእል ኢና። እዚ ዜደንቕ ፍቕሪ እዚ እቲ ንቐጺሉ ዚመጽእ መሰረት እዩ።
እቲ ኻልኣይ ክፋል ናይ ዮሃንስ መዝሙር ምስጋና፡ ጐይታ የሱስ፡ ኣፍቂሩና ኸሎ፡ “ብገዛእ ደሙ ኻብ ሓጢኣትና ዘንጽሃና” ምዃኑ እዩ። ኣምላኽ ንሓጢኣት ምሕረት ንምግባር ደም ከም ዝሓተተ ንርድእ ኢና። ናብቲ ፋስጋ በጊዕ ንጥምት፡ “ደም ምስ ረኣኹ፡ ክሓልፈኩም እየ” (ዘጸ. 12:13) ኸኣ ይብል። ኣብ ራእይ 5:6–10፡ ንጐይታ የሱስ ከምቲ ሕጂ እተሓርደ በጊዕ ንርእዮ፡ እቶም ዕስራን ኣርባዕተን ሽማግለታት ድማ ወዲቖም ንበጊዕ ይሰግዱ፡ ሓድሽ መዝሙር፡ መዝሙር እቶም ዝደሓኑ፡ ይዝምሩ።
እዚ ናብ ሳልሰይቲ ክፋል ናይዚ መዝሙር ምስጋና እዚ ይመርሓና፡ ንሱ ድማ ንኣምላኹን ኣቦኡን ነገስታትን ካህናትን ከም ዝገበረና እዩ። ሕጂ ኸምቶም ኣብ ቅድሚኡ ኪህልዉ ብቑዓት ዝተገብሩ፡ ንፍቑር ወዱ ኢልና ንኣምላኽናን ኣቦናን መስዋእቲ ምስጋና ኻብ ኣፍና ኸነቕርብ ንኽእል ኢና (1 ጴጥ. 2:5፤ እብ. 13:15)። ከም ዮሃንስ፡ “ክብርን ስልጣንን ንዘለኣለም ኣሜን!” ኽንብል ንኽእል ኢና።
