ዘፍጥረት 24 ንባህርያት ጽቡቕን እሙንን ኣገልጋሊ የቕርበልና። ኲሉ ውሉድ ኣምላኽ ብቕኑዕ መንፈሳዊ ኩነታት ንጐይታ የሱስ ክርስቶስ ከገልግል ይደሊ፣ እሞ ሓደ መዓልቲ ካብ ኣፉ እዘን ዘደንቕ ቃላት ክሰምዕ ይደሊ፡ “ጽቡቕ ገበርካ፣ ጽቡቕን እሙንን ኣገልጋሊ!” በዚ ምኽንያት እዚ፣ ንጐይታና ኣብ ምግልጋል ጽቡቓትን እሙናትን ክንከውን ምምሃር ኣገዳሲ እዩ።
ኣገልጋሊ ኣብርሃም ጽቡቕ ኣብነት እዩ። ካብ ጐይታኡ ንጹር መምርሒታት ምስ ረኸበ፣ ናብቲ ዝተመደበ ቦታ ጉዕዞኡ ጀመረ፣ እሞ እቲ ቐዳማይ ዝገበሮ ነገር ምጽላይ ነበረ። ንዕላማኡ ንምዕዋት ጸለየ፣ ምእንቲ ንልቢ ጐይታኡ ሓጐስ ከምጽእ። እሞ እዚ ዕላማኡ ስለዝነበረ፣ ጸሎቱ ከይወድአ መልሲ ኣብ መገዲ ነበረ። ናብ ዝኾነ ተግባር ኣይተሃወኸን፣ እንታይ ደኣ ንጐይታ ኣብ ርብቃ ክሰርሕ ብትኩረት ይዕዘብ ነበረ፣ ክሳዕ ንሱ ንይስሃቅ ብጐይታ ዝተመርጸት ምዃና ርግጸኛ ዝኸውን። “ጐይታ መሪሑኒ እዩ” ኢልካ ብርግጽ ክትብል ክንደይ ክብሪ ዘለዎ ነገር እዩ። ወይለይ እዘን ቃላት እዚኣተን ብቐሊሉ ይዝረባ! ኦ ጐይታ ንእኡ ኣብ ምግልጋል ብእኡ ክንምራሕ ይሃበና።
እቲ ኣገልጋሊ ኢድ ኣምላኽ ብኸምዚ ዝገርም መገዲ ክመርሖ ከሎ ምስ ረኣየ፣ ከምኡ ድማ ንይስሃቅ ኣምላኽ ዝመረጻ ጽብቕቲ መርዓት ምስ ረኣየ፣ ሰጊዱ ኣብ ቅድሚ የሆዋ ሰገደ። ኣምለኸ። ንዘደንቕ ሓገዝ ኣምላኽ ኣፍለጠ እሞ ንጐይታ ባረኸ። ሓጐስ ዓወትኡ ነቲ ዓወት ዝሃቦ ከም ዝርስዕ ኣይፈቐደን። ኣብዛ ዛንታ እዚኣ ክልተ ነገራት ብጣዕሚ ንጹራት እዮም፡ ንሱ ሰብ እምነት ነበረ፣ ከምኡ ድማ ዕላማኡ ንጐይታኡ ሓጐስ ምምጻእ ነበረ።
