ነቶም ብርሃናውያን ሰራሕተኛታት ክርስቶስ ክትርኢ ኸለኻ፡ እዚ ንምብትታን ዘሎ ባህጊ ሓቂ ምዃኑ ኸይረኣኻዮ ክትሓልፍ ኣይትኽእልን ኢኻ፦ ሙሴ፡ እያሱ፡ ዳዊት፡ ኢሳይያስ፡ ኤርምያስ፡ ህዝቅኤል፡ ዳንኤል፡ ብግዜ ብሉይ ኪዳን፤ ጴጥሮስ፡ ጳውሎስ፡ ዮሃንስ ድማ ብግዜ ሓድሽ ኪዳን፡ ኩሎም ከም ብሩህ መርኣያ ናይቲ ዝተሰባበረ ነገር ዋጋ ኮይኖም ይቐርቡልና። እዞም ኩሎም ፍቑራትን ክቡራትን ኣገልገልቲ፡ ምሉኣት ምእንቲ ኪኾኑ፡ ምእንቲ ኺመልኡ፡ ብሓይሊ ክርስቶስ ንዝኾነ ይኹን ነገር ድሉዋት ምእንቲ ኪኾኑ፡ ብገዛእ ርእሶም ገለ እኳ ኺገብሩ ኸም ዘይክእሉ ምእንቲ ኺፈልጡ፡ ኪብተኹ ነበሮም።
እዚ ሕጊ ቤት፡ ሕጊ ኣታኽልቲ ወይኒ፡ ሕጊ መንግስቲ እዩ። ጊድዮን ድማ ብግዜኡ ረኺብዎ። እቲ “ወይለይ!” ዝብል ቃሉ፡ ብ“ሰላም፤ ኣይትፍራህ” ናይ የሆዋ ተኸቲሉ፡ ድሕሪኡ ድማ ኪጅምር ድሉው ነበረ። ምስ መልኣኽ ኣምላኽ ገጽ ንገጽ ተራኺቡ ነበረ፡ ኣብኡ ድማ ስድራቤቱ ኣብ ምናሴ ድኻ ምዃኖም፡ ንሱ ድማ ኣብ ቤት ኣቦኡ ዝነኣሰ ምዃኑ ጥራይ ዘይኮነስ፡ ብገዛእ ርእሱ ምሉእ ብምሉኡ ሓይሊ ዘይብሉ ምዃኑ፡ ኩሉ ምንጩ ድማ ኣብ ህያው ኣምላኽ ኪርከብ ከም ዘለዎ ተማህረ። እዚ ንወዲ ዮኣስን ንኹላትናን ክቡር ትምህርቲ እዩ! ኣብ ኣብያተ ትምህርትን ኮሌጃትን ናይዛ ዓለም እዚኣ ዘይኮነስ፡ ኣብቲ ዓሚቝን ቅዱስን መቕደስ ኣምላኽ ጥራይ ዚምሃር ትምህርቲ።
