ካብዚ ጥቕስታት እዚ፡ ጐይታ የሱስ ኣብ ወጻኢ ኣስዋር የሩሳሌም፡ እቲ ኣይሁዳዊ ሃይማኖታዊ ማእከል፡ ዝተሰቀለን ዝሞተን ምዃኑ ንርድእ፡ እዚ ድማ ፍሉይ ባህርያቱ ኣካላዊ ቤተ መቕደስ፡ ዝተወደበ ክህነት፡ ከምኡ’ውን ኣካላዊ መስዋእቲ ነበረ—እዚ ድማ ሎሚ ጐይታ ዘይደልዮ ግዳማዊ ነገራት እዩ። ንሕና ከም ሓቀኛታት ምእመናን ማሕደር ኣምላኽ ኢና፡ ኩላትና ናብ ቅድሚኡ ናይ ምእታው ናጻ መሰል ዘሎና ኻህናት ኢና፡ መንፈሳዊ መስዋእቲ ድማ ነቕርብ፡ ፍረ ከናፍርና፡ ምፍሳስ ልብና። ሕጂ ናብ ኣካላዊ ቦታ ዘይኰነስ፡ ናብቲ ማእከልን ዕላማን ዝዀነ ሰብ፡ ጐይታ የሱስ ክርስቶስ፡ ብሓደ ስልጣን፡ ቃል ኣምላኽ፡ ብሓደ መምህር፡ መንፈስ ቅዱስ፡ ተኣኪብና ኣሎና።
ሙሴ ነቲ ኣምላኽ ዝሃቦ ጽላት ሕጊ ምስ ተቐበለ፡ ድሕሪ ኣብ ቅድሚ ኣምላኽ ምንባሩ ኻብቲ ኸረን ምስ ወረደ፡ ኣብ ሰፈር እስራኤል ሓጢኣት ረኣየ እሞ ኣብቲ ቅድስና ኣምላኽ ዝተጥሓሰሉ ሰፈር ኣይተረፈን። እኳ ደኣስ ህዝቢ ኣምላኽ እንተ ነበሩ፡ ካባታቶም ተፈልየ እሞ ድንኳኑ ናብ ወጻኢ፡ ርሑቕ ካብቲ ሰፈር ኣግዓዘ፡ እቶም ንጐይታ ኺረኽቡ ዝደለዩ እውን ናብዛ ድንኳን ምርኻብ፡ እታ ኣብ ወጻኢ ሰፈር ዝነበረት፡ ከዱ።
ናብ ጐይታ የሱስ ናብ ወጻኢ ሰፈር ኽንከይድ ከም ዝተነግረና፡ ምስቲ ሎሚ ዘሎ ሃይማኖታዊ ሰፈር ክንጽምበር፡ ምስቲ ብቓሉ ዘይኰነ ነገር ክንሳተፍን ክንተሓባበርን ይግባእ ድዩ? ንጐይታ ዘይተረድኡና ኣሕዋትናን ኣሓትናን፡ ካብቲ ብቓሉ ዘይኰነ ነገር ብዘይምእታው፡ ብዘይምስታፍ፡ ወይ ብዘይምትሕብባር፡ ከምቲ ጐይታ ዝረኣዮ ነቀፌታ እኳ እንተ ሃለወ፡ ሓገዝ ክንከውን ንኽእል ኢና።
