«ዳንኤል ድማ ብምግቢ ንጉስ ወይ ብዝሰትዮ ወይኒ ርእሱ ከየርክስ ወሰነ።» (ዳንኤል 1:8) ኣምላኽ፡ ንኣኻ ዝጸውዓካን ብመንፈሱ ዘዐጥቐካን፡ ብኣኻ ኣቢሉ ብሓይሊ ኺዓዪ ከም ዚኽእል ክትኣምን ትደፍርዶ? ኣብ መንጎ እቲ እትነብረሉ ዘለኻ ግዜን ቦታን ምስቲ ኣምላኽ ዝጸውዓካ ምትእስሳር ገይርካዶ? ፍጻሜታት ዓለም ንኣምላኽ ፈጺሙ ኣየስደምሞን። ንሱ ንኣኻ ብፍሉይ ዕላማ ኣብቲ ዘለኻዮ ቦታ ኣንቢሩካ።
ዳንኤል ፈተናታት ዘመኑ ምስ ጐይታ ዘለዎ ርክብ ከም ዘይዕንቅፍ ኣይፈቐደን። ህይወቱ ንኣምላኽ ጠቓሚ ንምግባር ኣብ ኩሉ ነገር ታዛዚ ኪኸውን ከም ዘለዎ ይፈልጥ ነይሩ። እቲ ኣብ ዓለም ዘሎ ዝበለጸ ሓያል ንጉስ ዝኣዘዞ ይኹን እምበር፡ ዳንኤል ኣምላኽ ካብኡ ዝደልዮ ዝፈልጦ ነገር ኪጥሕስ ኣበየ።
ታሪኽ ብኣብነታት ክርስትያን ሰብኡትን ኣንስትን ምሉእ እዩ፡ እዚኦም ድማ ኣምላኽ ብኣታቶም ኣቢሉ ንመንግስቱ ዓብዪ ፍልልይ ኪገብር ከም ዚኽእል ዝኣመኑ እዮም። ኣምላኽ ንኤስቴር ብስልታዊ መገዲ ኣብ ኣደራሽ ንጉስ ኣብ ኣገዳሲ እዋን ኣንበራ፡ እዚ ድማ ህይወት ህዝቢ ኣምላኽ ከተድሕን ከም እትኽእል ገበራ (ኤስቴር 4:14)። ኣምላኽ ንዮሴፍ ብስልታዊ መገዲ ኣንበሮ፡ እዚ ድማ ንሱ ዝበለጸ ሓያል ኣማኻሪ ፈርኦን ኣብ ግብጺ ኪኸውንን ንያቆብን ስድራቤቱን ካብ ዘስካሕክሕ ድርቂ ኬድሕንን ገበሮ (ዘፍጥረት 41:39-40)።
ከባቢኻ ህይወትካ ከመይ ጌርካ ኸም እተዋፍር ኪውስን ትፈቕደሉ ዲኻ? ወይስ ኣምላኽ ኣብ ወለዶኻ ፍልልይ ንምግባር ኪጥቀመካ ትፈቕደሉ ዲኻ? ኣምላኽ ዕላማታቱን ፍቓዱን ንህይወትካ ሎሚ ኺገልጸልካ ለምን።
ኤች.ቢ.ኣር.ቢ.
