«ብፁዕ እቲ ብምኽሪ ረሲኣን ዘይመላለስ፣ ብመገዲ ሓጥኣን ዘይቀውም፣ ኣብ መንበር መላገጽቲ ዘይቕመጥ። ግናኸ ብሕጊ እግዚኣብሔር እዩ ፍስሃኡ፣ ብሕጉውን ለይትን መዓልትን የስተንትን። ንሱ ኸኣ ከምቲ ኣብ ጥቓ ሩባታት ማይ እተተኽለ፣ ፍሬኡ ብጊዜኡ ዚህብ፣ ቈጽሉ ዘይረግፍ ኦም ኪኸውን እዩ። ዚገብሮ ዅሉ ኸኣ ይሰልጦ።» (መዝሙር 1:1-3)
ብዛዕባ ሓቅታት ኣምላኽ እናፈለጥካ፡ ንሓንቲ እኳ ኻብኣተን ከይረኸብካ ንብምሉኡ ህይወትካ ከተሕልፎ ይከኣል እዩ። ብዛዕባ ሓቅታት ኣምላኽ ምፍላጥ ጥራይ፡ እዘን ሓቅታት እዚኤን ከም ክፋል ህይወትካ ዀይነን ማለት ኣይኰነን። እዚ ኣገዳሲ ሕቶ እዚ እንሆ፦ ንቓል ኣምላኽ እንታይ ትገብሮ ኣሎኻ፧ ገሊኦም ሰባት፡ ቃል ኣምላኽ ንዕኦም ፍልልይ ከይገበረሎም፡ ብሓሳብ ረሲኣን ኪጽለዉ ይፈቕዱ። ምኽርኻ ኻብ ረሲኣን ሰባት እንተ ደሊኻ፡ ካብቲ ቓል ኣምላኽ ዚእዝዞ ኣንፈት እናረሓቕካ ኸም እትኸይድ ክትረክብ ኢኻ። ንሓጥኣን ብፍቓድካ መሓዙትካ እንተ ገይርካዮም፡ ካብ ኣምላኽ ርሑቕ ዝዀነ መገዲ ኺመርሑኻ እዮም። ምስቶም ዚላገጹ ሰባት ክትሓብር እንተ መሪጽካ፡ ኣብ መወዳእታ ንስኻ እውን ተላጋጺ ኽትከውን ኢኻ።
እቲ ጻድቕ ሰብ፡ ምትብባዕ ኣብ ርእይቶታት ካልኦት ዘይኰነስ፡ ኣብ ቃል ኣምላኽ እዩ ዚረክብ። ብውሽጣዊ ፍልጠት ቅዱሳት ጽሑፋት ኣይዕገብን፡ የግዳስ፡ ዜንብቦ ነገር ንገዛእ ፍልጠቱ ኸም ዜንጸባርቕ ክሳዕ ዚእመን፡ ለይትን መዓልትን የስተንትነሉ። ኣብ ገምገም ሩባ ኸም እተተኽለት ኦም ፍረ ይኸውን። እታ ኦም ጽቡቕ ዝምግብን ጥዑም ፍረን ብዙሕ ቈጽልን እያ እተፍሪ። ሰባት ካብ ርሑቕ ቦታታት መጺኦም ኣብ ጽላልኣ ኺቕመጡን ፍረኣ ኺበልዑን እዮም።
ኣምላኽ ቃሉ ኣብ ህይወትካ ኺፍጽም እንተ ፈቒድካሉ፡ ካልኦት ካባኻ ምትብባዕ ኪረኽቡ እዮም። ኣብ ጽድቂ ኣምላኽ እናዓበኻ ብዝኸድካ መጠን፡ እናበሰልካ ኽትከይድ ኢኻ። ገሊኦም ሰባት፡ ዜተባብዕዎ ሰብ ንምርካብ ብኸንቱ ይደልዩ፡ እቲ ጻድቕ ሰብ ግና ከምኡ ኣይኰነን። ህይወትካ በረኸት ከም እትኸውን ስለ ዚፈልጡ፡ ብዙሓት ሰባት ኪደልዩኻ እዮም።
