“ኣብዚ ኽንደይ ቈልዑ ናብ ሰንበት ቤት ትምህርቲ ወጻእተኛታት ይኸዱ?” ሰላሳን ሾመንተን ኢድ ቻይናውያን ተላዕለ። እቶም ኮሚኒስት ሰባት እዞም ቻይናውያን ቈልዑ ኣእዳዎም ኬልዕሉ ምስ ረኣዩ ኣዝዮም ተቘጥዑ።
“ዓያሹ ቈልዑ!” እቶም ሰባት በሉ። “ሓሶት እዩ ዚምሃረኩም። ንምግቢኹም ክትጽልዩ፡ ምስ ተቐበልኩምዎ ድማ ንኣምላኽ ከተመስግኑ ይምህሩኹም። እንታይ ዕሽነት! ንሰብ ዜድልዮ ዚህቦ ጻዕሪ ሰብ እዩ። ናብ ሰንበት ቤት ትምህርቲ ምኻድ ኣይትቕጽሉ። እንተ ገበርኩም ድማ ክትቅጽዑ ኢኹም!”
ያ-ሉኤን ብትብዓት ደው በለ
መብዛሕትኦም እቶም ቈልዑ ንእቶም ሰባት ዳግማይ ናብ ሰንበት ቤት ትምህርቲ ከም ዘይከዱ ቓል ኣተዉሎም። ግናኸ ሓደ ወዲ፡ ያ-ሉኤን፡ ወዲ ትሽዓተ ዓመት፡ ካብ ክርስትያናዊ ስድራ ቤት እዩ ነይሩ፡ ንብርሃኑ ንየሱስ ኬብርህ ደለየ። ኣብ ቅድሚ እቲ እናወሰኸ ዚኸይድ ቍጥዓ ጸላእቲ ጐይታን ህዝቡን ብትብዓት በይኑ ደው በለ። ኣብ መወዳእታ እቶም ሰባት ብቍጥዓ ንያ-ሉኤን ናብ ጸልማት ክፍሊ ደፍእዎ እሞ ድሕሪኡ ማዕጾ ዓጸዉ፡ ንምሸት ድማ ኣብኡ ሓደግዎ፡ ብዘይ ምሸታዊ ምግቡ።
“እንተ ደሊኹም ጸልዩ!” ኢሎም ሰሓቑ። “የሱስኩም ኣብኡ እንተ ኺምግበኩም ርኣዩ!”
ምጽንናዕ ኣብ ጸልማት
ያ-ሉኤን ንቡር ንእሽቶ ወዲ እዩ ነይሩ፡ ንምግቡ ድማ ይጽበ ነይሩ፡ ግናኸ ጐይታ ዅሉ ስምዒት ጥሜት ኣወገደሉ። ከም ዝበልዐ ዀይኑ ተሰምዖ። ኣብ መሬት ተጠቕሊሉ ኺድቅስ ከሎ፡ እቲ ጸልማት ከም ፍሽኽታን ፈታዊን ኰይኑ ተሰምዖ። በይኑ ኣይነበረን። ህልውና ጐይታ የሱስ ካብቲ ቅድሚ ሕጂ ዝረኣዮ ንላዕሊ ሓቂ ነበረ። ብሓቂ ምጽንናዕ ኣብ ልቡ ሒዙ ኣብ መሬት ተጠቕሊሉ ቕልጡፍ ድቃስ ደቀሰ።
ብሩህ ምስክርነት
“ሕጂ፡ ኣወዳትን ኣዋልድን”፡ እቶም ጨካናት ሰባት ንጽባሒቱ ንግሆ ጸውዑ፡ “ማዕጾ ኽንከፍት ኢና እሞ ሓደ ዝፈርሀ ንእሽቶ ወዲ ኽንርኢ ኢና! ድሕሪ እዚ ተኸታሊ የሱስ ኪኸውን ኣይደልን እዩ!” ኵሉ ሰብ ሓደ ዝፈርሀ፡ ብንብዓት ዝመልአ ገጽ ኪርኢ ብፍጹም ይጽበ ነበረ። እቶም ክፉኣት ሰባት ድማ እዚ ንዅሎም ቈልዑ ትምህርቲ ኪኸውን ደለዩ። ግናኸ እቲ ብርሃን ጸሓይ ዚመስል ገጹ ሒዙ ዝወጸ ንእሽቶ ወዲ ምስ ረኣዩ ብፍጹም ኣይተዳለዉን።
“ኣዝየ ጽቡቕ ደቀስኩ፡ ከመይሲ ጐይታ የሱስ ኣብኡ ዀይኑ ይከናኸነኒ ከም ዝነበረ ተሰምዓኒ” ያ-ሉኤን ንእቶም ሰባት ብሓጐስ ነገሮም። “ገና ድማ ጽጉብ እየ—ከም ዝዓበየ ምግቢ ዶሮ ምስ ሩዝ ዝበልዐ ዀይኑ ተሰምዓኒ!”
ጽልዋን ጸሎትን
እቶም ካልኦት ቈልዑ ንምስክርነት ያ-ሉኤን ምስ ሰምዑ፡ ንኣብነቱ ኺስዕቡን ንብርሃኖም ንጐይታ ኼብርሁን ትብዓት ረኸቡ። ዓበይቲ እውን፡ ድሕሪኡ ናብ በርማ ዝሃደሙ፡ ምስክርነት ያ-ሉኤን ኣብ ቅድሚ ጨካን ስደት ብትብዓት ኪቐውሙ ከመይ ከም ዝሓገዞም ነገሩ።
ሎሚ ኣብ ከምዚ ዝኣመሰለ ቦታታት ፈተና ንብዙሓት ጸልዩ፡ ንርእስና እውን፡ ንሰባት ምእንቲ ኸነሐጕስ ንጐይታና ኽንክሕድ እንተ ተፈተንና። ንእኡ እሙናት ኴንና ኽንቀውም፡ ከም ያ-ሉኤን ድማ ንኣምላኽ ካብ ሰብ ንላዕሊ ኽንእዘዝ፡ ብዝዀነ ይኹን ዋጋ ጸልዩ።
