ጐይታ ቀረባ እዩ — ጉንበት 3, 2025: ምሳሌ 31

¹ እኖኡ ዝመሃረቶ ናይ ማሳ ንጉስ ናይ ልሙኤል ቃል፦ ² “ኦ ወደይ፥ ኣታ ውሉድ ከርሰይ፥ ኦ ፍረ ማህፀነይ እንታይ እዩ? ኣታ ውሉድ መብፅዓይ፥ እንታይ እሞ ኽብለካ እየ? ³ ሓይልኻ ንኣንስቲ ኣይተጥፍእ፤ መንገድኻውን ነገስታት ንዘጥፍኡ ኣይትሃብ።” ⁴ “ልሙኤል ስማዕ! ነገስታት ወይኒ ኽሰትዩ፥ መሳፍንቲ ‘ዘስክር መስተ ኽብህጉ?’ ኣይግባእን እዩ። ⁵ ሰትዮም ሕጊ ኸይርስዑ እሞ፥ መሰል ናይቶም ግፉዓት ከይግሕሱስ፥ መስተ ንነገስታት ግቡእ ኣይኮነን።” ⁶ “ብርቱዕ መስተ ነቲ ናብ ጥፍኣት ዝቐረበ፥ ወይኒ ኸዓ ነቶም ነፍሶም ዝተመረረት ሰባት እዩ ዝግባእ። ⁷ ይስተዩ እሞ ድኽነቶም ይረስዑ፤ መከራኦም ከዓ ኣይዘክሩ። ⁸ ክንዲ በሃምን፥ ክንዲ ደኽታምን ኣፍካ ኽፈት። ⁹ ኣፍኻ ኽፈት ብሓቅውን ፍረድ፤ ንድኹምን ንምስኪንን ፍትሒ ኣውፅአሎም።” ¹⁰ ለባም ሰበይቲ መን ይረኽባ? ዋጋኣ ኻብ ዝኸበረ ቐይሕ ዕንቊ የመና ዝኸበረት እያ። ¹¹ ልቢ ሰብኣያ ይእመና፤ ምርኮውን ኣይጐድሎን። ¹² ንሳ ምሉእ ዕድሚኣ ሰናይ ትገብረሉ እምበር ክፉእ ኣይትገብርን። ¹³ ፀጕሪ በጊዕን ልሕፂ እንጣጢዕን ትደሊ፤ ተሓጒሳ ኸዓ በእዳዋ ትሰርሕ። ¹⁴ ንሳ ኸም መርከብ ነጋዶ እያ፤ ካብ ርሑቕ ሃገር ቀለባ ተምፅእ። ¹⁵ ገና ለይቲ እንተሎ፥ ትትስእ እሞ፥ ንስድራ ቤታ ምግቦም ትህቦም፥ ነግራዳ ኸዓ ሰስርሐን ተትሕዘን። ¹⁶ ግራት ትምልከት እሞ ትዕድጎ፤ ብፍረ ኣእዳዋ ገይራ ኸዓ ትተክል። ¹⁷ ሕቘኣ ኣበርቲዓ ትቕነት፤ ቅልፅማውን ተበርትዕ። ¹⁸ ኵሉ ንግዳ ፅቡቕ ከም ዝኾነ ትርኢ፤ መብራህታ ብለይቲ ኣይጠፍእን። ¹⁹ ኣእዳዋ ናብ መፍተል ትዝርግሕ፤ ኣፃብዕታ መፍተል ይሕዛ። ²⁰ ኣእዳዋ ናብ ድኻ ትዝርግሕ፤ ናብ ፅጉማትውን ኣእዳዋ ትሰድድ። ²¹ ንዅሎም ስድራኣ ኻብ ቍሪ በረድ ዝተልዓለ ኣይትፈርሕን፤ ሰብ ድርብ ክዳን እዮም፤ ስለዙይ ኣስሓይታ ኽወርድ እንተሎ ኣይትፈርሕን። ²² ንባዕላ ምንፃፋት ግብረ መርፍእን ስጋጃን ትሰርሕ፤ ኤፉድን ቀይሕ ክዳንን ከዓ ትኽደን። ²³ ሰብኣያ ኣብ ባይቶ ኣብ ማእኸል ዓበይቲ ዓዲ እንትቕመጥ ክቡር እዩ። ²⁴ ፅቡቕ ቀሚሽ ኣእሊማ ትሸይጥ፤ ንነጋዶውን ቅናት ተቕርበሎም። ²⁵ ሓይልን ክብረትን ክዳና እዩ፤ ነቲ ዳሕረዋይ ዘመን ከዓ ትስሕቖ። ²⁶ ኣፋ ብጥበብ ትኸፍት፤ ትምህርቲ ሕጊ ርህራሄውን ኣብ መልሓሳ እዩ። ²⁷ ኩነታት ቤተሰባ ብትግሃት ትከታተል፤ እንጀራ ትህኺትውን ኣይትበልዕን። ²⁸ ደቃ ተሲኦም ብርኽቲ ኢኺ ይብልዋ፤ ሰብኣያ ድማ ኸምዙይ ኢሉ የመስግና፦ ²⁹ “ፅቡቕ ዝገበራ ብዙሓት ኣንስቲ ኣለዋ፤ ካብ ኵላተን ግና ንስኺ ትበልፂ ኢኺ።” ³⁰ ፅባቐ ሓሰት እዩ፤ ቁንጅና ድማ ኸንቱ እዩ፤ ንእግዚኣብሄር እትፈርሕ ሰበይቲ ግና፥ ክትነኣድ ይግብኣ። ³¹ ካብ ፍረ ኣእዳዋ ሃብዋ፤ ኣብ ደገታትውን ተግባራ ይንኣዳ።

¹⁶ “ንእግዚኣብሄር ንፈልጦ ኢና” ይብሉ፤ ብተግባሮም ግና ይኽሕድዎ፤ ዘፀይፉን ዘይእዙዛትን፥ ሰናይ ንምስራሕ ዘይበቕዑን እዮም።

¹ ንስኻ ግና፥ ህይወት ዝርከቦ ቕኑዕ ትምህርቲ መሃር። ² ነቶም ኣረጋውያን፥ ጥንቁቓት፥ ክብሮም ዝሕልዉ፥ ለባማት፥ ብእምነትን ብፍቕርን ብትዕግስትን ጥዑያት ክኾኑ መዓዶም። ³ ነተን ኣረጋውያትውን፥ ከምኡ ብቕድስና ዝነብራ፥ ዘይሓምያ፥ ዘይሰኽራ፥ ሰናይ ዝኾነ ዅሉ፥ ንንኡሳት ኣንስቲ ዝምህራ ክኾና መዓደን። ⁴ እተን ንኡሳት ኣንስትውን፥ ንሰብኡተንን ንውሉደንን ከፍቅራ፥ ⁵ ርእሰን ዝመልካ፥ ንፁሃት፥ ስድራአን ዝከናኸና፥ ሕያዎት፥ ንሰብኡተን ዝእዘዛ ምእንቲ ክኾና ይምሃራአን። እዙይ ከዓ፥ ቃል እግዚኣብሄር ምእንቲ ኸይፅረፍ እዩ።

ምሳሌ 31 · ቲቶ 1:16 · ቲቶ 2:1–5 · ትመ15