ፍጹም ፖለቲካዊ ስርዓት ሓሊፉዶ ይፈልጥ እዩ? ብግብሪ፡ ኣይፋሉን። ብጽንሰት፡ እወ። ኣምላኽ ህዝቡ እስራኤል ከመይ ጌሮም ክመሓደሩ ከምዘለዎም፡ ክሳብ ብዙሕ ዝርዝራት፡ ኣፍሊጡ ነበረ። ንጉስ ክደልዩሉ ዝኽእሉ ግዜ ኣቐዲሙ ርእዩ ነበረ። ኣብዚ ድሮ፡ ኣብ ናይ ሙሴ ናይ ስንብት መደረ፡ ንእቲ ግዜ ምድላው ተገይሩ ነበረ።
እቲ ንንጉስ እስራኤል ብመሰረት ፍቓድ ኣምላኽ ሓቂ ዝነበረ፡ ብመርሆ፡ ንኹሉ መራሒ ሓቂ እዩ። ብተወሳኺ፡ ንኹሉ ምእመን ኣዝዩ ተግባራዊ ትርጉም ኣለዎ፡ ከመይሲ ገና ኣይንገዝእን – ክርስቶስ ብግልጺ ክገዝእ ከሎ ጥራይ ኢና ክንገዝእ – ግናኸ ሕጂ ድሮ “ነገስታት ገይሩና”፡ ድሮ ኸኣ ንጉሳዊ ክህነት ኢና (ራእይ 1:6፤ 1 ጴጥሮስ 2:9)።
እቲ ንጉስ ኣብ እስራኤል ስልጣን ምስሓዘ ብኡብኡ ናብ ስራሕ ምምሕዳር ኣይክኣትውን ነበረ። ብኣንጻሩ፡ ቅድም ነቲ ብኣምላኽ ዝተዋህበ ምሉእ ጽሑፍ ሕጊ ንምቕዳሕ ግዜ ክወስድ ነበሮ። ሓደ ግዜ ጥራይ ከንብቦ ዘይኮነስ፡ ወይ ንኻልኦት ከየንብቦም፡ የግዳስ ብኢዱ ኣብ መጽሓፍ ክጽሕፎ ነበሮ! እቲ “ብኣጻብዕቲ ዝሓለፈ”፡ ከም ዝበሃል፡ ብዝኽሪ ይሕሎ። ንሕና እውን ጽሑፋት መጽሓፍ ቅዱስ፡ ምናልባት ብምጽሓፍ፡ ንምዝካር ልምዲ ኣሎናዶ? ብዚ ኣገባብ እዚ እትዝክሮ ነገር ንህይወትካ ክቕርጾ እዩ። እቲ ንጉስ ንውልቃዊ ህይወቱ ብፍርሃት ኣምላኽ ክመርሕ ግዴታ ነበሮ። ኣብዚ፡ ንህዝቡ ኣብነት ክኸውን ነበሮ። ከምኡውን፡ ኣብ ምሉእ ኣካይዳ ስልጣኑ፡ ኣብ ትሕቲ ሕጊ ነበረ። እቲ ሕጊ ዝሃበ ንሱ ባዕሉ ዘይኮነስ፡ ኣምላኽ እዩ ነበረ። ንእኡ ድማ ተሓታቲ ነበረ።
ከምዚኣቶም “ነገስታት” ክንከውን ንደሊ ኢና ኣብ ንእሽቶ ወይ ዓቢ መዳይ ህይወትና፡ ፍቓድ ኣምላኽ ዝፈልጡን ንውልቃዊ ህይወቶምን ንኣገልግሎቶምን ንጐይታ ብመሰረትኡ ዘሰማምዑ ሰባት።
